Ka Hoku o ka Pakipika, Volume I, Number 14, 26 December 1861 — Page 1
Ka Hoku o ka Pakipika.
BUKE I. HONOLULU, DEKEMABA 26, 1861. HELU 14.
KA HOKU
O KA
PAKIPIKA.
E HOOPUKA ia ana ka Hoku o ka Pakipika i kela poaha keia poaha a pau ka makahiki. O
J. W. H. KAUWAHI,
Oia no ka LUNA NUI, a o G. W. Mila, oia ka Luna Hooponopono a me ka Puuku. He nupepa a na kanaka maoli keia, na ko Hawaii nei poe keiki papa o ka aina i kukulu a ua manao ka Ahahui e kokua ana ko Hawaii nei i keia hana. Nolaila, aole i manao keia Ahahui e pono e paipai nui i ka lehuehu e lawe, no ka mea, ua ike lea ka Ahahui, e lawelawe no na kanaka Hawaii ma na oihana a na kanaka Hawaii.
Eia ke kumu manao paa.
He nupepa ku i ka wa keia, aole no e hio io a ia nei, o ka hoonioniolo kana hana, a na na keiki papa o ka aina ka oihana luna maoli ana o ka hoopuka ana. He nupepa keia no ka lahui Hawaii, a ke noi ia aku nei na kanaka o na aoao a pau e hooili mai i ko lakou mau manao e pai.
Hoku o ka Pakipika.
He mele no ka Haku o Hawaii.
Auhea wale ana oe,
Ka onohi kau o ka moe,
I popohe i ka ili kai,
I ka maka o ka Opua,
He pua lei hulu mamo,
Na'u i kui alawa,
Lei hahei i ka lipo
Pala memele i kanahele,
He nahele haiwa pua,
I ka hala me ka Hinano,
Hoohihi mai la Palea,
I ka hala o Halaiku,
E aku no e inu,
I ka wai lohi o ke kino,
Wai makaala ka manu,
I lana i Lehuakona,
Kapio maila ka noe,
I ka hale kai olalo,
Kahiko mai la ka pua,
Ka uko Kalehuawehe,
E pua mai e ka nani,
Kauluwela i ke kula,
I panea mai e ka manu,
Haa e Apuakea,
No u-u Mololani,
I ka uhi a ke Holio,
Lu ke laa mokihana,
I ka uka e Moelana,
Pi pi mai Hoohila,
I ka wai anehenehe,
Pulupe ka maha Lehua,
Ku paoa i ka lai,
I ka lai o Hauola,
E ola no kuu lani,
Lei Haku o Hawaii,
Lei aloha a Iolani,
Milimili kaumaka oe,
Na maikai Waipio,
I imoimo kulana,
I ka lipo lau o Lono,
Ua lono mai nei au,
I ke kiu wailaahia,
I ka ula ai Hawane,
O Nuaielelani,
Kamala mai la ka leo,
O Kaweloheaikekai,
Aheahe i kuu manawa,
Mahoa i kuu nui kino, HULAMA.
Kailua, Kona Ak. Hawaii, Dek. 19, 1861.
HE MOOOLELO NO KAILIOKALAUOKEKOA—Helu 7.
Ia hoi ana a laua nei, iuka o Pihanakalani, mahope iho o ko laua halawai ana i kai o Wailua, a liuliu laua nei o ka noho pu ana, e like me ko laua noho pu ana mamua i oleloia ma ka Helu 5 e Hinau, me ke aloha nui loa o Kailiokalauokekoa ia Kauakahialii, aka, he manao e no ko ke kane iloko ona, me ka manao e hoohalike, e like me ka Kailiokalauokekoa hana ana.
Ua aneane ekolu puni (makahiki) paha, kupu ka manao o Kauakahialii e iho hou i kai o Wailua; ala ae la keia i ka wanaao, a lalau aku la i ke kia manu, puka aku la iwaho, no ka manao no e hele i ke kapili manu.
I ke ahiahi aku nae, ua olelo mua aku o Kauakahialii ia Kailiokalauokekoa; Eia wau ke hele nei i kapili manu i keia wanaao ae, ina i kali oe ia'u, a i ahiahi, mai haohao oe, mai manao oe ua pilikia au, ina i haohao oe, a ohumu liilii paha, oiai aia no au i ka nahelehele, alaila, make au, nolaila e noho lai loa oe me ka manao maikai, no ka mea, he moe ino ka'u.
I aku o Kailiokalauokekoa ke ike la no ka oe he moe ino kau, lapa no ka hele.
Alaila i aku ke kane, ua lohe no oe aole au e haalele i ka'u puni o ke kapili manu, ina i haule kekahi la ia'u, huhu mai o'u mau akua, a make hoi au. E hoolohe loa no oe i ka'u, mai haohao oe.
Alaila, ua maikai ia mea imua o kana wahine? I papa aku la keia, aole e haohao, no ka mea, e manao ana keia e iho i kai o Wailua, no ko ia nei manao nui ia Makaweli, i ke kaikamahine a ka wahine kamaaina nana ia nei i hookipa, i ka wa a ia nei i iho ai e hoomakakiu ia Kailiokalauokekoa, e like me ka mea i oleloia ma ka Helu 6 o keia kaao.
Ia la a ia nei iho ai, a launa me Makaweli, a hiki i ke ahiahi, hoi keia iuka o Pihanakalani, ia hiki ana aku a ia nei, ua uwe aku o Kailiokalauokekoa ia Kauakahialii no ka manao ua make.
Ia manawa, olelo aku la o Kailiokalauokekoa, akahi ka hoi kuu pono ole ia oe i keia la no ko ahiahi loa; olelo aku kana kane, ua kauoha iho hoi au ia oe, mai haohao oe ia'u ke poeleele au.
A pau ka laua nei olelo ana no keia mea, alaila, hapai hou o Kauakahialii i kana olelo imua o ka wahine. I pii hou wau i kapili manu i kakahiaka, a i poeleele au, a aumoe, mai haohao hou oe, no ka mea, ua loaa hou ia'u, he wahi hou aku e kawili manu ai, he oi aku ka manu! aia nae ko laila manu i ke ahiahi, o ka napoo ana a ka la ka wa manu loa aku, he uhai wale mai no ka manu ke poeleele loa aku.
Oia ka olelo hoopunipuni a ke kane ia Kailiokalauokekoa.
Moe laua nei ia po a ao ae, i ka wanaao pii aku la o Kauakahialii, a pelu hou i ke alanui e iho ai i kai o Wailua. A hiki keia i ka hale o Makaweli, launa hou laua nei, o ka lua ia o ko laua launa kolohe ana.
Noho keia a ahiahi poeleele, hoi keia i uka o Pihanakalani, ma ka waena konu o ka po kona hiki ana iuka.
Ia Kauakahialii i hiki aku ai, e uwe hou mai ana no o Kailiokalauokekoa, no kona manao ua poino, no ka mea, ua hala ka manawa a Kauakahialii i kauoha ai o ka manawa poeleele ka manawa e hoi aku ai, aka, ua aumoe loa.
I ka manawa a Kauakahialii i hoi aku ai, olelo mai kana wahine, kupanaha no hoi kau hele e ke kane, kai noa i hele oe no ke kawili manu, a hiki i ka manawa poeleele hoi mai, ina no hoi e loaa iho kau huaolelo ia'u, aia i ke aumoe ko'u hoi mai, ina no hoi paha aole au e haohao ia oe.
I mai o Kauakahialii, he mea kupanaha paha, akahi wale no wau a ike i ko'u lalau. I ka napoo ana aku o ka la, loaa ia'u hookahi lau manu, a no kuu manao e loaa hou ia'u he mau manu hou, nolaila, nanea loa wau i ke kapili manu, a poeleele loa, huli hoi mai au, nalowale ke alanui a'u i hele aku ai; o na manu mua hoi a'u i loaa'i, lalau loa ko'u hele ana.
Nolaila, aole i loaa iki kela mau manu a'u i kapili ai, a ua loaa hoi na manu hou, a no ko'u hu hewa ana, nolaila haalele au, e aho hoi ka hoi wale; ia hoi ana mai nei, i ka lalau hele wale mai nei no a puka iho la, oia ke aumoe.
Mahope iho oia manawa a laua e kamailio ana, a i loko o ko laua manawa e hoomakaukau ana e moe, olelo aku o Kauakahialii ia Kailiokalauokekoa.
Ma keia wanaao, e pii hou ana au i ke kapili manu, ina i ao ka po o ka la apopo, mai haohao oe, a i po ia la, mai haohao no oe, a ina e ao ua po hou aku, alaila e manao oe ua make au, alaila, ua maikai ia mea imua o kana wahine.
Moe laua nei ia po a wanaao, pii hou o Kauakahialii ma kahi ana e hele mau ai, a iho hou i kai o Wailua, ia iho ana, noho keia i kai me Makaweli, elua la hookahi po, hoi keia iuka o Pihanakalani.
Ia hiki ana o Kauakahialii i ko laua wahi, aole i loaa ia Kailiokalauokekoa ka haohao, no ka mea, ua kupono i ka manawa i oleloia e Kauakahialii.
Pela mau ka ia nei hana ana me ka haohao ole o kana wahine, ua aneane eno paha malama, o ko laua launa ana me Makaweli.
I kekahi la, i ka wanaao, loaa ia Kailiokalauokekoa, he wahi hihio, e olelo mai ana kekahi manu ia Kailiokalauokekoa, o Makaweli ka wahine a kekahi kanaka o kou aina e noho nei, ia manawa puoho ae keia, eia ka he hihio.
Ia puoho ana ae a ia nei, e hoomakaukau ana o Kauakahialii i ke kia manu no kana hana mau he iho i kai o Wailua i o Makaweli la.
Olelo aku o Kailiokalauokekoa, ke haohao nei au ia oe e ke kane, no ke ano e loa o keia manawa ou, no ka mea, i kou manawa mamua, pii no oe i kapali manu, aia kou manawa hoi mai ma ka aui ana a ka la, i keia mau la aku nei mamua, aia i ke aumoe kou hoi mai, a i keia manawa hoi, aia kou hoi mai i hookahi po me alua ao, a ke hele nei i ke ono o kou malama o keia hana au.
Nolaila, ma keia hihio o'u i moe iho nei a puoho ae nei, e olelo mai ana no kekahi manu a kaua, aia no ka oe i kai me Makaweli.
Nolaila, ina he oiaio ka olelo a keia manu a kaua ma ka hihio ia'u, alaila, ke hai aku nei au ia oe, aole au e ae iki aku ia oe e hele hou i ke kapili manu, no ka mea ua pono ole kau hana.
I aku o Kauakahialii, he oiaio no kau moe, no'u nae ka olelo a ka hihio i ka po, a no hai ka olelo o ke ao, mai manao oe i ka ka po olelo he oiaio, e hele no au i kau hana, ua ike no oe i kau kane iloko o ko kaua mau la, aole au i haalele ia oe ua noho no au me ka maluhia a hiki i kou haalele ana ia'u, o oe no o kaua kai lalau, a o wau no ko kaua i hoaa aku ia oe, a loaa oe ia'u iloko o ka papai kilu me na kane elua, nolaila, mai aua oe ia'u.
I aku la ka wahine, e kuu kane, aole au e ae iki aku ana e hookuu ia oe, ina i hoopaakiki oe, alaila o kaua pu no ke hele aku.
A no ka aneane paakiki loa o Kailiokalauokekoa, i aku o Kauakahialii, aole e pono ia kaua ke hele pu, aole auanei e manu keia la o'u, aole no e pono i ka poe kia manu ke hele pu me na wahine i ka nahelehele, he mea paoa loa ia.
Alaila, olelo aku o Kailiokalauokeoa ia Kauakahialii, mai manao oe e hele pu ana wau me oe, a e walaau i kou manawa e kapili manu ai, aole no au e hookuke ana i na manu e hookokoke aku ana i ou la, no ko'u manao no i ka olelo a ka manu ma ka hihio, nolaila wale no ke kumu o ko'u alualu ana ia oe.
Nana mai la o Kauakahialii, ua paakiki loa ka manao o ka wahine, alaila hooko keia i kona manao hele.
I aku la ke kane ia Kailiokalauokekoa, i ko apa mai no ka i ko'u manawa hele a awakea loa, nolaila, aole au e hiki i keia la ma ka'u hana.
Mahope iho o keia manawa a laua nei e kamailio ana, holoholo ae la o Kauakahialii maloko o ke kihapai, e hoonana ana ia ia iho, no ka mea, ua hoomahuahua ia oia i kona aloha ia Makaweli.
I kekahi la ae, hoomakaukau hou o Kauakahialii e pii iuka i kapili manu, aka, ua aua loa o Kailiokalauokekoa i kana kane, aole e ae iki e hookuu ia ia.
Ekolu la o ka aua ana a ka wahine ia Kauakahiali, alaila, ia manawa, ua oi aku ke kanaka maikai o kana kane, no ka mea ua hoolapalapa ia o Kauakahialii e ke aloha o Makaweli.
He mea mau nae ia Kauakahialii ka holoholo mau maloko o ko laua kihapai iloko o na la e aua ia nei e kana wahine.
I ke ahiahi o ke kolu o ka la o ka aua ia ana o Kauakahialii, aia oia e noho ana malalo o ka malumalu o na lau o na maia e uwe ana no Makaweli, ia Kailiokalauokekoa e nana ana i ka uwe mai a Kauakahialii, hele aku la kana wahine a ma ke alo, ninau aku la, e uwe ana anei oe maanei? A heaha ke kumu oia uwe ana? No kuu aua ana iho nei paha ia oe iloko o na la ekolu ke kumu o ko uwe ana? E uwe ana anei oe no ko aloha i ko wahine, a ka manu i hai mai ai ia'u ma ka hihio.
Aole nae e hiki i kana kane ke pane koke mai, no ka mea, ua mokumokuahua kona naau i ke aloha i kana wahine ia Makaweli. Ia po iho o ko laua moe pu ana, ua ano e loa ko Kauakahialii moe ana ia po, e oni wale ana no, mao a mao o kahi moe, alaila manao ka wahine, no ka lealea loa o Kauakahialii i ke kapili manu ke kumu o ke ano e ana ma ia po, aole nae oia i hoopuka aku i kana olelo imua o kana kane.
Ia ao ana ae, hele aku la kana kane o Kauakahialii, e milimili mau ana i kana kia manu, a e honihoni mau ana i ua kia manu nei, i kumu e manao mai ai o Kailiokalauokekoa no ka lealea i ke kapili manu ke kumu o kona uwe ana i kekahi la mamua ae, a me ke ano e ana o ko laua moe ana ia po iho.
A no keia hana a Kauakahialii, hai aku la ka wahine i kana olelo imua o kana kane, penei:
Ke ike lea nei au, ua oi aku kou lealea i ke kapili manu, oia ke kumu o kou uwe ana i kela la i hala iho nei, a me kou ano e ana i keia po, no ka mea, ua milimili mau oe i kau kia manu me ka honi ana, nolaila ke ae aku nei au e hookuu ia oe.
Olelo aku la o Kauakahialii, e like me kau e ike la, pela io no ka manao iloko ou, a he oiaio kau e olelo mai nei e hookuu ia'u e hele i kawili manu, alaila, ua uhola ia kuu manao kaumaha a pau loa.
I aku la ka wahine, ke ae aku nei au ia oe e hele i kau mea e manao nui nei, eia nae, o kaua pu no ke hele, aole au e ae aku ana o oe wale no.
Ia pane ana o Kailiokalauokekoa, kaumaha loa ka manao o kana kane, a kulou iho la, aka, aole he manao nui o Kailiokalauokekoa i kana uwe mai.
I ke awakea o ua la la, hele aku la o Kauakahialii i ka auau ma kahi mamao aku, no ka mea, aole e hiki ia ia ke auau ma kahi kokoke o ike ia auanei ke ino o ia nei i hana ia'i e Makaweli, no ka mea, ua pau keia i ka uwau ia.
A hala kela i ka auau, hele aku la o Kailiokalauokekoa a kokoke ma kahi a ia nei e auau ana, aole nae kela i ike mai ia ia nei, pili aku la keia ma ke kumu laau, nana aku la i kana kane; aia hoi ua pau ka poli i ka uwau ia, ma ke alo, aia hoi ua nahu ia ma ke kua.
Alaila hoomanao iho la o Kailiokalauokekoa i ka olelo a ka manu ma ka hihio, alaila, manaopaa keia e hookuu aku e hele hou kana kane e like me kana hana mau mamua, hoi mai la keia a hiki i ka hale, mahope mai o Kauakahialii.
Ia manawa, hoopuka aku la o Kailiokalauokekoa i kana olelo imua o kana kane.
Ke ae aku nei au e hookuu aku ia oe e hele i kau hana mau o ke kapili manu, no ka mea, ke hoahewa nei au ia'u iho no kuu aua ana ia oe, nolaila, ma keia ahiahi, a ao ae, e hele oe i ke kapili manu, a no keia mea, ua maikai ia olelo imua o kana kane.
Ma ia kahiaka ae, ala ae la o Kauakahialii a lalau i kana kia manu, a hele aku la. I ke kane i hala aku ai hoomakakiu aku la o Kailiokalauokekoa i kona hele ana; ia hele ana a ia nei, a hala hope ka hale, pelu keia ma ke alanui e iho ai i kai o Wailua, aia hoi o Kailiokalauokekoa mamua o ke alanui a ia nei e iho ana, e hoomakakiu ana no kana kane.
Ia Kauakahialii e iho ana, ukali aku la keia mahope me ka ike ole o kana kane, a hiki o Kailiokalauokekoa ma ke ahua e nana ana ia Wailua, aia o Kauakahialii e hele pololei ana a hiki ma ka hale o Makaweli, a komo aku la iloko o ka hale.
A liuliu ka Kailiokaluokekoa noho ana ma kahi aia nei e noho ana, puka mai la o Kauakahialii a me Makaweli, mai loko mai o ka hale, a noho iho la mawaho, moe aku la o Kauakahiaili iluna o ka uha o Makaweli, e nauke uku ana.
Ia Kailiokalauokekoa i ike aku ai ia laua e nauke ana, a e honihoni ana, a ike aku la keia i ke nahu ana a Makaweli ma ka poohiwi o Kauakahialii.
Ia ike ana oia nei i kela hana a laua nei, huli aku la ko ia nei alo iuka o ko laua nei hale, a hapai ae la keia i kekahi mele aloha no Kauakahialii.
Ke honi mai la Kaukini i ke ala—e—a,
Ke a uume la e pili i ka uka anu—la,
Nanahu aki ku mahui lana ku ho—e,
Nawai e hana aku kou makemake,
I hoomakaukau ai me he la hanau la,
Owau ka ko aloha e hou nei,
E hoomalana nei i kuu makemake nui ia oe,
O oe owau i ka leo—a,
O kaua pu i kela kualono,
I kela kuahiwi anu mehameha,
Owau o kuu kahu ukali aku ia oe—a,
Ma ka pae hinihini kuamauna leo lea,
Mailoko ae o ka ohe kapu a kuu kane,
E kuu kane lauae i uka o Honopuwai,
Aloha—e, U, wale ana—hoi,
A pau ko ia nei oli ana, lalau iho la keia i ka lepa o ka pau, holoi ae la keia i ka waimaka o ia nei a me ka hupe. Alaila, huli hou ae la keia a nana aku la ia Kauakahialii ma, e hana ana no i ka laua hana mau, alaila, hapai hou aku la o Kailiokalauokekoa i keia mele.
Ke hoomau mai la ka ua o Hanalei,
Mao ole iluna o Hihimanu,
Ua kena au ia oe e kuu aloha,
I noho hoomanawanui ai i kela uka,
Eloelo au ia oe, e kuu aloha e,
Ke aloha mai nei au i kela uka,
I ka uka aala o Pihanakalani,
Hoolono leo lea o na manu,
Leo lea o ka hinihina kanikuamauna,
Kuu kane o ka po iu anoano la,
O ka ua kanilehua pulu noe la e,
Ke hoonakulu mai nei ke aloha i kuu manawa,
Aneane haalele au ia oe,
Ke hoi nei au i ko kaua hale aloha,
Aloha oe—la—ea,
A pau ko ia nei oli ana, lohe aku la keia i ka leo o Kauakahialii i ka pane ana ae ia Makaweli, penei;
E hoi au a popo; alaila, iho hou mai au. Ia lohe ana mai o ia nei i kela leo, alaila hoi wikiwiki aku la o Kailiokalauokekoa a hiki i ka hale o ke kaikoeke o Kanikaulaikawainau, (ka mea i olelo ia e Hinau, oia hoi o Kahalelehua.)
A hiki keia i kahi o ke kaikoeke, olelo keia i ua kaikoeke nei, eia wau ke hoi nei e hiamoe, mai wehe ae oe i ka puka, aia no a hoi mai kuu kane, nana wau e hoala ae.
Hoi keia a ka hale, lalau aku la i ka malo o Kauakahialii, kaawe iho la ma ka puka o ka hale, a hoi mai o Kauakahialii, i wehe aku i ka puka, aia o Kailiokalauokekoa, ua make.
Wehe ae la o Kauakahialii i ke kaawe, a uwe iho la, a lohe ke kaikuwahine, hele mai la a hiki i ka hale.
I aku la o Kauakahialii, ua naaupo ia nei ia ia iho, ua kaawe, alaila, olelo aku la o Kanikaulaikawainau; i make ko wahine i ko kalohe, ua hoopai oe e like me ka hana a ko wahine, alualu aku la kela a ike i kou kalohe me Makaweli, nolaila, naauauwa ko wahine.
HE MOOOLELO NO HIIAKAIKAPOLIOPELE. Helu 1.
I ka poe e ike mai ana i keia Mooolelo, maanei kakou e ike mai ai i ka pololei, a me ka pololei ole, o keia Mooolelo, ina i pololei ole, ina i hewa, ua ike no kakou ia mea, aole kekahi o kona lahui me kakou, aia no lakou ma Kilauea i keia wa; aole nae i hele mai maanei e olelo pono mai ai, e maopopo ai la ia kakou ka pono, maanei nae kakou e ike ai i ke kumu o kona hele ana i Kauai, a me kona ikaika i ka hakaka ana, i kona kau.
Noho o Pele iuka o Kalua, a i aku i na kaikaina, e iho kakou i ke kui opihi i kai, haukeuke, lawaia heepali, pahi limu, na kakou, ae mai na kaikaina, ae, iho lakou nei i kai o Puna, ma Hawaii, iho lakou nei a hiki i Puupahoehoe, aia ia wahi i kai o Puna mawaena mai, ike o Pele ia Hopoe, me Haena, e hula mai ana iloko o ke kai, o Puna, makemake keia i ka hula mai o laua la, ia'ku o Pele i na kaikaina, Ea! aole hoi a oukou wahi hula, e hula aku ai ia Hopoe mai, hoole mai la lakou aole a makou hula, o Hiiakaikapoliopele, eia no ia mahope i ka ako lehua, a i ka hiki ana mai o Hiiakaikapoliopele, me ka papahi lehua, i aku o Pele, Ia Hiiakaikapoliopele, E! ua kena aku nei au ia lakou nei e hula aku ia Hopoe ma, aole hoi o lakou nei hula aku, ole ae nei lakou nei, ole loa aku hoi paha oe he uuku.
Ninau aku o Pele ia Hiiakaikapoliopele, aole au wahi mele? I mai o Hiiakaikapoliopele, he mele no, ia'ku o Pele, oi ana oli aku ana keia penei.
Ke haa la Puna i ka makani,
Haa ka uluhala i Keaau,
Haa Haena me Hopoe,
Haa ka wahine ami i kai o Nanahuki la,
Hula lea wa—le,
I kai o Nanahuki—e,
Akaaka iho la o Pele, i ka lea o ua kaikaina, ninau hou aku la o Pele, pau loa ae la no? Hoole aku keia, aole i pau, i hou mai o Pele, oi ana, oli hou aku na o Hiiakaikapoliopele, penei.
O Puna kai'kua i ka hala,
Pae ka leo o ke ka—i,
Ke lu—la i na pua lehua,
Nana i kai o Hopo—e,
Aloha wale no hoi o Hopo—e,
Ka wahine ami i kai,
O Nanahuki—la,
Hula lea wale,
I kai o Nanahuki—e,
O ka hele aku la no ia o Hiiakaikapoliopele, noho ana me Hopoe ma, i kai o Nanahuki; aia ia wahi i kai o Puna, ia manawa no, kena aku o Pele i na kaikaina e hele i ka lawaia i kai o Puna, Koe no o Pele me kekahi kaikaina me Hiiakaikapuaenaena, wahi iho ana o Pele i ka pahoehoe, o Puupahoehoe moe keia, kauoha o Pele ia Hiiakaikapuaenaena, ea! ke moe nei au, i hoi mai ka poe lawaia, ai iho no, mai hoala oukou ia'u, na'u no ia e moe, a na'u no ia e ala ae, ina e hoala kekahi i kuu hiamoe, make oukou ia'u, ina oukou i makemake e hoala ia'u, e kii oukou i kuu kaikaina, a na na a'u e hoala, a i ole ia, na kuu kaikunane, na Keowahimakaakaua, alua mea nana au e hooala. Pau ke kauoha ana me kela i oleloia maluna, owili o Pele i kona kino a paa i ka aahu kapa, ia Kapaahu, moe o Pele ma Puupahoehoe. Ke waiho la no ia mawae ma ia wahi a hiki i keia wa.
Ia moe ana iho o Pele, kani keia pahu, hoolohe ka Uhane oia nei, kani ana ka pahu; kakani ana ma kai o Puna, e uhai aku ana keia i ka pahu, a kai keia o Puna, kani ana ka pahu i ka moana, a ka moana keia, kani ana ka pahu i Maui, a Maui ka Uhane o Pele, kani ana ka pahu i ka moana aku o Maui, a ka moana keia, kani ana ka pahu i Molokai, a Molokai keia, kani ana ka pahu i ka moana a ka moana keia, kani ana ka pahu i Oahu nei.
I hoolohe aku ka hana oia nei, ma Koolau, aole keia hoolohe ma ke kani ana a ka pahu ma Kona, ko ia nei hele aku la no ia ma Kona, a hiki keia ma Keawaula, auau keia ike kai i Kilauea, aia no ia wahi ma Keawaula, a hiki i keia wa.
A pau ka auau ana aia nei, kani ana no ua pahu nei i ka Lae o Kaena, manao no keia, na ke Kupunakane ona keia pahu, ua Pohakuokauai, huhu loa iho la ua Uhane nei o Pele, me kona manao iloko ona, ina nau keia pahu, make oe ia'u i keia la, ko ia nei hele aku la no ia, a ike mai la o Pohakuokauai, kahea mai la ia, no kona ike ana mai i kana moopuna, pane mai la o Pele me ka leo huhu, hele mai, e make ana oe ia'u i keia la, nau no ka hoi ka pahu la; hooluhi hoi oe ia'u, e hooluhi ai.
Pane mai o Pohakuokauai, aole na'u ka pahu, aia ka pahu la i ka moana, i hoolohe aku ka hana oia nei, kani io ana ka pahu i ka moana, ae aku keia, me ka i aku ia Pohakuokauai; ina nau keia pahu, make oe ia'u i keia la, koia nei au aku la no ia i ke kai, a ka moana keia, kani ana ka pahu i Kauai, ko ia nei au aku la no ia, a pae ana keia i Haena, malaila no ko ia nei pae ana, ko ia nei hele aku la no ia, a hiki i kahi e kani ana ka pahu, iloko o ka hale, kahi e kani ana o ka pahu, ku aku la keia mawaho o ka hale nana aku la keia, e pai ana na lima o lakou i ka pahu, o Lohiau mawaena o ke aikane o Kahuakaiapaoa ma kahi aoao, o ke kumu hula, o Mapu, ma kahi aoao, he kanaka kaeke makahi aoao, he kanaka kaeke ma kahi aoao, iwaena lakou nei ekolu, e pai like ana lakou i ka pahu, oli aku ana ka Uhane o Pele penei.
Luuluu Hanalei,
I ka ua nui,
Kaumaha i ka noe o Alakai,
I ka hele ua o Manuakepa,
Uoi ku i ka loa o Koialana,
I ke ala kaia a ka malihini—e,
Mai hina,
Mai hina au,
Mai palaha ia o—e,
Imi wale ana au,
O kahi o ke o—la—a,
O ke ola hoi—e,
Ia lohe ana o lakou la, i ke oli ana aia nei, i nana mai ka hana iwaho, he mea e ke ku a ka wahine maikai, aole wahine ma Kauai, e like me keia. Kapu iho la ka leo, aole mea pane, kunou aku, kunou mai, awihi aku awihi mai, na kane, na wahine, iniki aku iniki mai, me ka paipai aku ia Lohiau, e puka aku i waho, aole lakou i ike e o Pele keia, a he Uhane keia, manao no lakou, he wahine maoli no, no ka nana mai, aole i kana mai o ka wahine maikai, nolaila kipaku mai ai lakou ia Lohiau, e kii i wahine nana, aole puka o Lohiau, no ke ano hilahila, nolaila, oli aku ana keia mawaho, penei.
Kalaku Hilo, i ka ua nui,
Kapu kanu ke—i,
I ka pua o ka leo,
I ka hamahamau, hamau kakou,
I ka hawanawana,
I ke kunou maka,
I ka awihi maka,
I ka alawa iki,
Ai—e—ei—a,
Eia hoi au kou ho—a,
Kou hoa hoi—e.
Ia pau ana o ke oli ana oia nei, e nao aku ana ka lima kapu oia nei, o Kilauea, nana i oi ka pahoehoe o kai o Puna, koele no la, ku ke a i kai o Apua, kahuli o Apua, haa mai o Maukele, lilo o Lohiau ia ia nei, ko laua nei hoi aku la no ia i ka hale moe o Lohiau, ko laua nei moe iho la no ia, a po ua la nei, aole manao aku o Lohiau i ka puni ana o ka hula, kaawale ke aikane me ke kumu hula a laua nei, aole oia nei manao ia mau mea, o ka moe wale iho la no, hookahi wale no aia nei hana o ka moe me ka wahine, o ka moe wale iho no, aole hana mai laua nei, o ka ihu kai honi aole nae i moe kino laua nei, a po ua la nei, a ao ia po, aole hele o Lohiau i ka puni ana o ka hula.
Ia manawa, haohao na makaainana, a me ke aikane a ia nei, a me ke kumu hula a laua nei. A me na mea a pau, i ka hemo o kana mea nui o ka hula, akahi wale no ka hemo, nolaila, manao wale iho no na mea a pau ua make o Lohiau, a po ia la, a ao ia po, aole ia nei manao i ka ai, me ka ia, no ka lilo loa o ko ia nei manao i ka wahine, nolaila, poino loa na mea a pau. A po ia la, poalua, a oa i po, a po ia la poakolu; nui loa ka manao o na makaainana, ua make o Lohiau, no ka puka ole mawaho o ka hale o ka moe no ka moe, aole hana mai, o ka ihu no ka honi, o ke kino hoi aole launa aku; a ao ia po, a po ia la, poaha ko laua nei noho ana.
Ia po makaukau ka Uhane o Pele, e hoi i Hawaii, kauoha aku la keia ia Lohiau, e, ke noho la oe, e hoi ana au i Hawaii, aole au la no o nei, no Hawaii au no ka pukana a ka la, nolaila ea, e hoi au a Hawaii, hana au i ka hale o kaua a maikai, alaila, kii mai ka luna ia oe, i kii mai auanei ka luna ia oe, a he luna kane, mai hele ae oe, aka, i kii mai ka luna a he luna wahine, o ka luna ka hoi ia, hele ae oe i Hawaii, elima po, elima ao, pa i kela kihi o Kilauea, keia kihi o Kilauea, alaila, noa ko oiwi kapu ia'u, alaila, lilo aku oe na ka wahine e.
Ia manawa, hooikaika loa ko Lohiau manao e aumeume ia Pele e moe laua, aka, ua hoohiki mai o Pele i kona manao paa, ia Lohiau, aia a hiki i Hawaii, alaila, moe kino kaua. Pela ko Pele mea i ae ole aku ai i ka Lohiau koi mai, aka, no kona ano Uhane paha kekahi, a, ano Akua no hoi. Ko laua nei hakaka iho la no ia a ao ua po nei, a awakea, e nahu iho ana ka Uhane o Pele i ka lima o Lohiau a moku loa, e ala mai ana hoi o Lohiau, uumi keia i ka eha a oluolu, e nahu iho ana keia i ka hokua o ka mai o ua Uhane nei o Pele, kapalili aku ana keia a haule iloko o ke kai, ko ia nei nalowale aku la no ia, oia moe ko Lohiau a puoho ae la mai ka hiamoe ana, aole ka wahine. Ko ia nei puka aku la no ia a waho nana aole ka wahine o waho, o ka hoi aku la no ia o Lohiau iloko o ka hale, pono ole ko ia nei manao i ka nalo o ka wahine, a kaawe iho la ia ia a make loa.
Ia make ana o Lohiau, a hala he mau la, hele mai la ke kaikuahine oia nei, i wehe mai ka hana i ka puka o ka hale a komo aku la, i nana aku ka hana, ua make ke kaikunane uwe ae la ke kaikuahine. Lohe ae la na makaainana i ka uwe, hele mai la lakou ua make io o Lohiau, uwe nui loa ae la lakou no ka nui o ke aloha, ke kumu hula, ke aikane aloha aia nei, nui loa ko lakou aloha ia Lohiau, o ke aikane nae ka mea oi loa o ke aloha, i ko Lohiau make ana. Hookuu o Kahuakaiapaoa i kona wahi hilahila, aole malo, me ka hoohiki iho o Kahuakaiapaoa, aole au e hume i ka malo, ahia i ka maka o Pele, kuu wahi hakina kalo auanei, a ai i ka onohi o Pele, pela ka hoohiki ana.
Ia la no a ka Uhane o Pele i hoi ai i Hawaii, a hiki ka Uhane i Kilauea e moe ana no ke kino i kahi i moe ai, i Laupahoehoe e uwe ana na kaikaina i ko ia nei moe mai, aole ai i ka mea i kapu ai o ka opihi, haukeuke, heepali, wahi limu, a pela aku. Na lakou nei e ai, manao nae lakou nei e kii e hoala ia Pele, papa mai o Hiiakaikapuaenaena, mai hoala oukou, no kamea, oia ko kaikaina i noho pu me Pele, i ka wa i moe ai o Pele a hele kona Uhane i Kauai, olelo mai na kaikaina i kekahi i kekahi o lakou. Ua make paha ke kaikuaana o kakou, aole penei ka moe o ka pono, ka moe no nei a alima la, ua make paha, i mai o Hiiakaikapuaenaena, ka! e nalo hoi ka make i ka pilau mai, aole ka he pilau mai, o ka oukou make iho la ka hoi ia.