Ko Hawaii Pae Aina, Volume III, Number 25, 19 June 1880 — HE MELE INOA NO MISS PALE KAULULEHUA. [ARTICLE]

HE MELE INOA NO MISS PALE KAULULEHUA.

Aia i Kahiki ko lei ahi Ka alohi ka anapa ka'u i ike Ua like a like me ka anohi Ka wahine i ka lihilihi o ka la Nana i kaupono mai kanmoana Na pe'a kapu o Kealohilani O ka huhu o ka manu ka'u i ike Ka hehina wawae o Halulu A he manu kaulana no ke ao nei Na kihi poohiwi o ka malama Ke malama nei au i ko aloha Ka ukana maewa hoi a ke kino Haina ka pua i ona i ka manu O Pale ka wahine laka i ke ahi. Ma Kilauea ko lei ahi I ka luna kapukapu o Kaauwea Ea mai oe la pauhihi A kau ka weli i ke ahi a Laka Ua laka a he manu pili kepau Ua kawiliia i ka pua lehua— Ua lulu ka mauna ua wehiwehi Hui ai ke ala me ke onaona Ua silaia hoi oe a paa Aohe ou mea e poloke ai Ua paa ko'u helu i ke Aupuni Ma ka lima o ke kivila me ke karaima Haina ka pua i ona i ka manu O Pale ka wahine laka i ke ahi. Maluna o Pele ko lei ahi O ka moku huki kolo o ke kaona A pu a ka uwahi nome ka huila Hookomo i ke awa ua haiki Luana i Kou ko'u aloha Hulo na kela o Kipiliki Kahea mai nei e ke Kapena Pulaheke na Poe pili i ka uwapo Lulu lima pu me ke aloha Mahea oukou la pii mai Ma Kaleponi ma Kapalakiko Haina ka pua i ona i ka manu O Pale ka wahine laka i ke ahi. Aia i Anaki ko lei ahi O ke ahi kokolo la i na pali He nihi ae noi i Mokuaiki Kuehu i ke kai o Kaholanui A he ahi kaulana no Kamaile Kuni ana i ka ili o ka ipo ahi Ua ahi ua wela mai nei loko Ka ukana koikoi a ka puuwai Mai hoonewanewa oe ilaila Eia ko lihi la ianei Ianei mai no hoi kaua Pau pono a lawa ko makemake Haina ka pua i ona i ka manu O Pale ka wahine laka i ke ahi. Aia i Hawaii ko lei ahi Aina kaulana kapu o Keawe Pulupulu mai nei o Lonomakua Ho-a i ke ahi i Halemaumau Ua wela e ka maka o ka opua 1 ke ahi enaena a ka wahine Noho mai hano o Uwekahuna I ka pali kapu o Kamohoalii Hina ka uwahi pio lua i ka lewa E kokolo i ke one o Kahualoa A he loa ka imi'na la o ke hoa A loaa i kanaawa o ka mauna Haina ka pua i ona i ka manu O Pale ka wahine laka i ke ahi. Ma ka moku Kaleponi ko lei ahi Ke kue nome mai nei i ka moana Kuu pau mai nei e ka wiliki Iluna ilalo e auku nei A pa ka makani he pewini Hooiho i ke awa a o Honolulu Ko leka ka'u i iko iho nei Puiwa hikilele ko'u manao He manao no ko'u e kau leo aloha Palea ia mai e ka hilahila Ua kuhi wau o Anoikaimana Ka anapa iluna o Haleaniani Haina ka pua i ona i ka manu O Pale ka wahine laka i ke ahi. James Kamawae. Waikiki-waena, Iune 8, 1880.