Ko Hawaii Pae Aina, Volume IV, Number 32, 6 August 1881 — HE WEHI NO KALANI. [ARTICLE]

HE WEHI NO KALANI.

Ku mai o Kalani Kumoku I hanau i o Ikuwa I ka onohi lani o ke kapu Kapu na moku no ka wahine No ka hiwahiwa apapa Na Papa nui hanau moku No na hono a Piilani No ka pali kapu o Kakae No ka heiau kapu o Pakaalana Kapu ia wehi no Kalani Ka uila me ka hekili Ke anuenue pio i ka lewa Ka punohu ula i ka lani Ka ua koko i ka moana Lei ia ko wehi hanohano O Liliu o Loloku i ke kapu. Nani wale ke kino o ia pua Kupa ohaoha i ka malie Hoolai i Wasinetona Home noho ou e ka Lani Ku kilakila i ka wao Kahiko i ka Ua Kuahine I hoapili no Paoakalani Kau nui aku au e ike I ke kai hone o Kawehewehe Hooheno i ka Ua Apuakea Aia Mololani i ka wehiwehi I nohea i ka lai o Hauola E ola ka wahine noho i ka ihi I ka ihi kapu a na kapuna Lei ia ko wehi hanohano O Liliu o Loloku i ke kapu. KAWEHENA. Kaulana ke anu i ka opua Ka noho haaheo i ka nua Nawai keia kupueu I hiki mai ai ianei No ka la hiki o Hawaii Aia ilaila ke ala Ka lehua popohe i ka nahele Hoolai ka hana a ke kolohala A ka manu inu wai o Kaala He ala ka palai noho malu He ala ka pua lilia Onaona i ke ahiahi He ala ka pua pikake Kaohi nei i ka puuwai He ala ka pua pikinolia Kolonahe moani ke hiki mai Ke ala o ka pua, kiele Honehone ana i ko poli Lei ia ko wehi, hanohano O Liliu o Loloku i ke kapu. LOE. He wehi pua meria ahehene I pili ia i ka ehuehu Elua no maua I ka uka a o Waiehu Noenoe mai e ka ua Kahiko mai la iuka Mauna hewa e ke aloha I ka hone a ka Welowai Kipu paa ia mai I ka uka o Pihanakalani Hone e na manu Lohe e kai a o Lihue Eia ka makani inu wai O ka ona nui a o Hulaia Lei ia ko wehi hanohano E Liliu o Loloku i ke kapu. He wehi pua lilia I popohe i ka nahele Nee mai nei Kikiula Kokoke i ko'u alo Alo mai nei Hanalei I ka limu ka kanaka O ka ua loku iho ia Ike ia o Manuakepa Kau nui aku ka manao O ke one o Mahamoku Au ana la e ke aloha I ka wai a o Lumehai Kuu hoa haihai leo I na lehua o Luluupali Lei ia ko wehi hanohano E Liliu o Loloku i ke kapu. KAHEI.