Ko Hawaii Pae Aina, Volume IV, Number 33, 13 August 1881 — HE KANIKAU HOALOHALOHA. [ARTICLE]

HE KANIKAU HOALOHALOHA.

He kanikau hoalohaloha keia no Miss Kaomakawai Kekookalani Moepali Wailanaia, ua hanau ia oia ma Hauhaukoi, Honolulu,i ka la 6 o Okatoba, 1876, make ma Kahakaaulana i ka la 30 o Aperila, 1881. O ka nui o kona mau la ma keia noho ana, he 4 makahiki, 5 mahina a me 24 la. Iloko o eono mahina mai ka hanauia ana o na makua, un lilo mai la ia maua ka malama o ka moopuna, me maua wale no a hiki i kona loaa ana i ka mai hookaawale ohana [puupuu hebera]. No—ka pau ole o ke aloha, nolaila, ua haku iho nei au i kanikau hoalohaloha no kuu moopuna: O oe ia e Kawaikumano no Wailani O Kaomakawai o kuu moopuna ia la e O Laahuilani hui Napelepele Opualani O Lani, o Ulu, o Mehalani, o Makawailani O Onohinohi i kau i ka Hema Ma ka manawa, ma ka houpo Makaliinuikuakawaiea nei la e - aloha e O ke aloha ia e au wale nei Ua hele ka pili aloha a maua he moopuna Aia me uuina ka lani me paapaaina i ka lewa Ua noho aku la i ka lewanuu i ka lewa-lani Ke noho la me Kekookalani Ka wahine i ka olikoliko lani nei la e He lani he lei no maua ko aloha a Aloha kuu hoa i ka ua puakukui Kui lehua o ka lehua pua lehua O kuu aloha la auhea oe eia wau Owau ka ko aloha i luaiele Ua kuewa i ke aloha me ka waimaka He makamaka no'u ko aloha ke hiki mai io'u nei Welawela no me he ahi la- a. O oe ia e Kawaikumailani E ka waimaka i hoohanini me ka maha Ma ka panepoo waiopua nei la e aloha e O ko mea ka ia i hele ai i noho i ke aka o ka opua I hoa no ka punohu makani o Kaliko O ke aka wale o ko kino o ko aloha i hiki mai io'u nei Me he lei hulumamo la ia e hanuu nei Hanuu ka waimaka a ka ua me ka makani E halihali mai ana i ke aloha me ke onaona Paoa ke kino o kuu aloha paua pu no i ke ala Ua hanuna ka ihu na welawela i ko aloha ke hiki ma - i Auhea o-e, kuu lei e-. O oe ka ia e kuu Pualaukamahele Nau e hele ka mahina, ka hoku a me ka malama He lii ko kino wailua no ka Paliaola No ka lani kau ole ia e ka hoku I hoi oe e noho me ka malu, i kahiko no'u ko aloha ke hiki mai - a Auhea oe - eia wau a - . O Hoohonua ke alo, o Kapaipai ka lani O hekili i uina poha ka leo aloha He aloha he waimaka i hoohanini ma ka maha O Waiopua nei la e, kuu pua - kuu pua ia O kuu pua ia i kau aku la i ka panepoo o ka malama I ka lihilihi o ka la i ke alo o Hanaukalani Akekonaokalani, Kahuliliokalani, Kalaniwaiakua Ma ke poo o Welokahoku nei la e - e aloha e Aloha kuu moopuna i ka aina i makama ka ole I ke alahele mauka a Huliwale la e - huli wale E huli wale ae ana au i makana i mohai e ike aku ai E kanaenae aku ai la hoi no ko aloha ke hiki mai Eia ke kanaenae la o ka waimaka I waimaka hoi - e. Me he makamaka la no Kauakukalahale Ka hele mai no a kipa io'u nei E noho aku ana no wau i kupuna no ko aloha ke hiki ma-i E kuu aloha e - eia wa - u. Aloha kuu moopuna i ka ua waahila Me ka ua popokapo o Nuuanu Anu kuu kino maeele i ke aloha ke hiki mai - a E Kauamololani e - eo mai oe O kuu moopuna no paha kela me Kauakiowao Me ka ua Apuakea e auau mai la i ka wai o Kahuailana Oia a - aloha i- no. O kuu lei aloha no paha kela me Kauakuahine Me ka ua Lililehua-oia noAia la i ka poli o Kaimanahila, e kuu lei e He lei oe he hoapili no ka la - e O oe ka kai Honuakini i Honualani I kau i ka haea ke ala wela i Hanakewa I ke poo o Kumailani nei la e - e aloha e I aloha au i kuu milimili Kuu hoa o ka ua me ka la O ke anu hoi me ka maeele Ua lilo ia manu kia mau ahailono Ua lono no paha kuu aloha Ua hookuli i ka uwalo aku e O keaha la ka hala i kuu lei kuu milimli I hele ai kuu aloha me ka waimaka O ka hala ke kolea kauahua Nana i kanu i kahuhu paokeelaau Ua kupu ua lau ua laha aia i Hawaii Ua ike ka lani ua hala ole au la O kuu lei ka'u mea minamina O ka nanaina mai a ka maka O ka mohala iloko o Kawewehiwa O ka alawa mai a ike iloko o ka enaena

O ka ninau mai e auhea olua Eia mau la ua uila ka lani ua lauhaa ka honua Ua maeele i ko aloha ke hiki mai E ka lei aloha a maua e hoi mai ana hoi Hoi mai ana hoi ko kino wailua io'u nei Me ke aloha ka halia me ka manao Aia ka oe me ka Haku o ka lani Ka mea nona ka mana a ka ikaika Ka ike- ike la Ike aku la oe i na puka o ka lani Ewalu puka o ka lani Ewalu puka o ka honua Ewalu hoi puka o ka uhane Hoea mai o Iesu Kariso Ke keiki mana a Iehova i ka lani E Iesu e ehoi ka Amene i ka lani E Kaliso e ehoi ke ola io'u nei Imi aku la oe i ke o ka pono I puka mai i ka honua nei Maloko mai o ke ao kaalewa Ke ai kainuu, ka opua kiei, ka opua halo Ke keiki mana a Iehova i ka lani E Iesu e - e hoi ka amene i ka lani E Kaliso e - e hoi ke ola io'u nei Ike aku la oe ia Malie ka wahine pii lani Iho ka wela i ka honua nei Iehowa - Kaliso ka mea e ola a amene Lohe aku ia oe i ka leo o ke kanaka hookahi

Mailoko mai o ka leo o ka manu O Iesu Kaliso i ke ao wale o Kina Ma kuahiwi pali i luna Na puu elua la ma waho Ua hoihoiia iloko e ae mai ana ia'u O Iehowa la o ke Akua mai nona ke ao Nana mai na kio wai makani He wai e inu e ola ai - ola ia Iesu Kaliso ke ola - Amene. G W KAHANELI.