Kuokoa Home Rula, Volume VII, Number 37, 10 September 1909 — E ka Make, Auhea Kou Niho-Awa! [ARTICLE]

E ka Make, Auhea Kou Niho-Awa!

Ua haalele mai a ua hala aku ma kela ao ma Wailuku Ka Hon Samuela Eparaima Kaiue, ma ka la 3 iho nei o Sept 1909, iloko o ke 55 o kona mau makahiki ame 6 malama. O Kamalo, Molokai kona aina hanau, a ua noho nae oia ma Maui, no kanaha a oi aku makahiki. Ua hoonaauao pono ia oia ma na kula Hawaii ma Molokai, a ma ka ike haole hoi, ma kela kula kaulana loa o Haleakala, Maui, Hikina. He loio a he luna kanawai kona makuakane, Kaiue makua, kona makuahine hoi, he kaikuahine ponoi no ka Hon. Luther L. Aholo, ka loea kaulana poina ole ma ka ike kalaiaina. Me Aholo o S E. Kaiue i noho ai ma ke kulanakauhale o Lahaina, mahope iho o kona puka pono ana mai ke kula mai o Haleakala, a lawelawe i ka oihana anaaina, a mahope iho, lilo i kakauolelo na ke Kiaaina Nahaolelua, no kekahi mau makahiki. I kona waiho ana i ka oihana kakauolelo, ua nee aku la oia no Wailuku, a ka M.H. 1900, ua kohoia i hoa no [ka] Aha Senate e ka aoao kalaiaina Kuokoa Home Rula. I ka noho ana o ke kau Ahaolelo o ka makahiki 1901, ua koho ia i Peresidena no ka Aha Senate, a he Hope Peresidena oia no ka Aha Senate i ka M.H. 1903. I loko oia mau la ua kapa aku ko Maui poe iaia, "Ka Bisemaka o ka Aoao Kalaiaina Kuokoa Home Rula." I ka 1907, ua kohoia oia i hoa no ka Papa Lunakiai o Maui. He kanaka oia i mahalo nui ia e na poe apau i kamaaina iaia, a he kanaka nohoi i aloha nui ia e kona mau hoaloha. Ua haalele iho oia he wahine e paiauma ana nona ma keia ao. Ke komo pu aku nei makou iloko o ke u ana ame [ke] aloha nona.