Ke Kumu Hawaii, Volume I, Number 13, 29 April 1835 — Page 103
1835.) KUMU HAWAII. 103
Pehea e hana aku ai kakou i ka lio i aponoia mai kakou e ke Akua? Pehea i hana aku ai kekahi poe? He hewa liilii anei? He hewa nui paha keia hana ana a lakoui?
Hilo, Ianuari 28, 1835.
E na hoahanau. Eia keia manao hoakaka ia kakou, i ko kakou hoohihia ana i ka mea e make ai ka uhane o na kanaka. O ka noho ana me ka palaka, a me ka nanea, a me ko kakou hoopapau loa ana i na mea o keia ao. Oia ka mea e poino loa ai ko kakou mau uhane, a me ka uhane o na makamaka.
E hoi kekahi. E makau nui kakou i ka maka o ke Akua me ka alunuwaiwai ole. E hoonoho i na kiaaina malama pono i ka ke Akua olelo, a me ka hoike aku i ka ke Akua olelo i na makaainana. Ua hoopouliia ko lakou mau maka i ko lakou haalele ana, a malama ole.
Eia kekahi manao nui: no ka haunaele ana, a me ka pau koke ana o na mea o neia ao. No ia mea, e manao ai kakou i ka aina maikai, pau ole ma ka lani o Ierusalema hou. He nui na mea e manao ana ma ke ao nei, aka, e hoopau koke mai auanei ke Akua i na mea a pau a lakou i imi aku ai. I mai la Petero, "Ua kokoke mai ka hope o na mea a pau." He uaahi panee na mea o keia ao a pau ke hoomau lakou ma na mea pau koke o ke kino.
E na hoahanau; he pa pohaku kino alii anei o mau loa? Aole paha. O ka hope o ia mau mea he make ia. "No ka mea, o ka manao ana ma ke kino he make ia. Roma viii. 6.
Ua momona loa ka pepeiao o na kanaka a paa i ka lohe ana i ka ke Akua olelo. Aole nae i malama naau. aka, ke malama nei lakou i ka eha mau loa. No ka mea, ua kakauia ma ka Roma ii. 9. "He ino a me ka make maluna o na uhane a pau o kanaka e hana ana i hewa." Pehea la e hiki ai i na kanaka ke hololua imua ihope, me he muhee la? Aole loa e hiki ia lakou ke hana.
Na BATIMEA.
NO KE ALAKAI ANA I NA KEIKI.
Auhea oukou e na hoahanau a pau iloko o ka Haku, a me hoahanau ma ke kino, a me na 'lii maluna o na kanaka, a me na 'lii aimoku a me na luna. Eia ka manao hookahi ia kakou a pau, he manao ninau.
E noonoo pu mai kakou a pau i ke ano o keia manao ninau i akaka. Eia ka ninau;-
Heaha ka mea e pono ai keia pae aina? a me ka noho ana o na kanaka? Eia paha.
O ka naauao oia ka mea e pono ai keia pae aina, a me ka noho ana o na kanaka, oia no hoi ka mea e ikaika ai.
Eia hoi paha kekahi; - O ke alakai pono ana i na keiki ma ka aoao e pono ai lakou ke hele, a hiki i ka wa e kanaka makua ai. E like me ka ke Akua kauoha ia kakou ma ka palapala a Solomona xxii. 6; - "E alakai i ke keiki ma ka aoao e pono ai ke hele ia a hiki i kona wa e oo ai, aole ia e haalele aku.'' Ia wai ka ke Akua kauoha ana mai pela? I na makua, a me na 'lii, a me na kumu. Eia ka ke Akua kauoha i na makua, ma Epeso. vi. 4; - "Oukou hoi, e na makua, mai honaukiuki aku i na keiki a oukou, aka, e alakai ia lakou ma ka hoopono a me ka hoonaauau a ka Haku."
Eia ka mea e pono ai keia pae aina a me ka noho ana o na kanaka - o ka ae like ana o kakou i keia kauoha; —
"E alakai i na keiki ma ka hoopono a ma ka hoonaauao a ka Haku.''
Ina ae na'lii, a me na makua a me na kumu i keia mea, i ke alakai ana i na keiki ma ka pono, a imi pu na'lii a me na makua a me na kumu ma ia mea a akaka, alaila pono keia pae aina a me ka noho ana o na kanaka.
E na makua i ka wa hea ka wa pono e alakai ai i na keiki ma ka aoao pono? Eia paha. I ka opiopio, i ka wa e lohe ai i na huaolelo. Oia ka wa pono e ao aku ai ia lakou, ma na olelo kekahi, a ma na hua kekahi, a ma ke kamailio pu ana ma na mea i kupono i ka ke Akua kauoha kekahi oia ke alakai ana ia lakou.
Eia hoi kekahi. A maopopo na huaolelo ia lakou, a lohe pono. E pono i na makua e hai aku ia lakou i ka make ana o Iesu i kalahala no ko ke ao nei a pau.
Eia kekahi E pule me lakou. E hele pu ma ka halepule me lakou, oia ke alakai pono ana o na makua i na keiki, Eia kekahi alakai pono ana o na makua i na keiki,
O ka haawi ana i na keiki i ke kumu e ao i ka ke Akua olelo, o ke alakai pono ana mai i na keiki ma ka halekula i ka manawa kula, oia ke alakai pono ana.
He hana nui keia a kakou e hana'i, o ke alakai ana i na keiki ma ka pono e like me ka ke Akua olelo ia kakou.
Pehea ka manao kakou i ka laau maoli? aole anei e akaka kona ano ia kakou ma ka hana ana? Ina e ku ana ka laau pololei i kona wa opiopio, a i pio ua laau la ma kekahi aoao, pehea kona ulu ana a me kona pio ana? Ua mau no kona ulu ana a me kona pio ana, ma ka aoao i pio ia ai hiki i ka wa e nui ai ka laau.
Pehea hoi na kamalii ke ao pono ia i ka wa uuku, e na makua, aole anei lakou e mau malaila a hiki i ka wa e kanaka makua ai?
Hilo, l835. BARENABA.
1 Aole anei i hea mai ke akamai?
Aole anei i pane mai ka ike i kona leo?
2 Maluna ma kahi kiekie, ma ke ala,
Ma kahi o na alanui ku ae la oia;
3 Ma na ipuka o ke kulanakauhale,
Ma na wahi i komo aku ai, kahea mai la oia.
4 Ke hea aku nei au ia oukou, e na kanaka.
O ko'u leo hoi i na keiki a kanaka.
5 E na mea ike ole, e ike oukou i ke akamai,
E hoonaauao hoi oukou, e ka poe naaupo.
6 E hoolohe mai, no ka mea, e hai ana au i na mea maikai.
O ka oaka na hoi o ko'u lehelehe ma na mea pono.
7 E hoike aku kuu waha i ka oiaio,
He mea hoopailua i ko'u lehelehe ka hewa.
8 Ma ka pono na alelo a pau a ko'u waha.
Aohe wahahee, aohe mea kekee malaila.
9 Pau loa lakou i ka pololei i ka poe naauao,
Ua ku pono hoi i ka poe i loaa ka ike.
10 E koho oukou i ke ao, aole i ke kala,
A me ka ike hoi maumua o ke gula i makemakeia.
11 No ka mea, ua maikai ke akamai mamua o na momi,
A o na mea i makemakeia a pau, aole i like me kana.
12 Owau ke akamai ka noho pu me ka malama,
Ua loaa ia'u ka ike i na mea e naauao ai.
Solomona.