Ke Kumu Hawaii, Volume I, Number 15, 22 July 1835 — Page 117
1835.) KUMU HAWAII. 117
i kana i ana mai, E hana i keia me ka hoomanao ia'u.' Aole nae au i hana pela."
Ninaninau aku la au ia ia, i akaka ia'u kona ike ana i ke ano o ka ahaaina a ka Haku, me kona ike ole. Kamakamailio pu ae la maua a hala i hookahi paha hora.
Kahaha iho la kuu naau a me ka olioli i kona ike maopopo ana o ua mea la. Manao ae la au iloko o'u - Ka! he kanaka makua no la ia! Aohe io o ka nui o ka ike. He oiaio ka! kela wahi olelo ma kahi Halelu, "Noloko mai o ka waha o na keiki liilii e loaa'i ka mahalo aku ia oe."
A pau ae la ke kamailio ana noho ekemu ole iho la maua. A liuliu iki, nana mai la ua kaikamahine la ia'u, i mai la. "E! ina manao oe, ua pono, ke noi aku nei au ia oe, e ae mai oe i ko'u hele ana i ka ahaaina.''
I aku la au, "He ae no ka'u, kuu kaikamahine aloha, e hele mai oe." Ku ae la oia, lalau mai la i ko'u lima me kona mau lima elua, a i mai la me ka uwe waimaka nui ana, "E hiki anei ia'u? e hiki anei ia'u? E hoomaikai mai ke Akua ia oe no ua olelo nei.'' Huli ae la au e holoi aku i ko'u maka iho, no ka mea, e ua pokii e, uwe iho la no hoi au.
I unuhiia e Laiena.
E ola lakou a pau, ke hea aku i ka inoa o Iehova.
HELU 21.
KA EPISETOLE A PAULO I KO ROMA.
MOKUNA 9. 1-21.
Ke olelo aku nei au i ka oiaio ma Kristo, aole o'u hoopunipuni, (a o kuu manao kekahi e hoike nei ia'u, ) ma ka Uhane Hemolele.
2 He kaumaha nui ko'u a me ka ehaeha mau ma kuu naau:
3 No ka mea, he pono i kuu manao e okiia mai au, mai o Kristo mai, no kuu poe hoahanau, na hanauna o'u ma ke kino,
4 He poe Iseraela lakou, ia lakou ka hookamaia, a me ka nani, a me na berita, a me ka haawi ana mai, i ke kanawai, a me ka hoomana, a me na olelo hoopomaikai.
5 No lakou hoi ka poe kupuna, a na lakou mai hoi o Kristo ma ke kino, oia no maluna o na mea a pau, ke Akua hoomaikai mai loa ia! Amene.
6 Aole nae i haule wale ka olelo a ke Akua. No ka mea aole ka poe Iseraela lakou a pau na Iseraela mai.
7 Aole hoi he poe keiki lakou a pau ka poe mamo na Aberahama mai; aka, maloko o Isaaka e kohoia ai kau poe mamo.
8 Oia hoi o na keiki ma ke kino, aole lakou ka poe keiki na ke Akua, aka o na keiki a ka olelo hoopomaikai e heluia na mamo.
9 No ka mea, penei ka olelo hoopomaikai, I keia wa e hoi mai ana au, a e loaa ia Sara he keiki kane.
10 Aole hoi keia wale no; aka o Rebeka kekahi hapai ae la ia [i na mahoe] na kekahi, na Isaaka ko kakou kupuna kane.
11 No ka mea, (aole laua i hanau, aole hoi i hana i ka mea maikai, aole hoi i ka hewa, i ku paa ai ka manao o ke Akua, ma ka wae ana, aole no ka hana, aka, no ka mea nana i koho mai;)
12 Ua haiia mai keia ia ia, E hookauwa aku ke kaikuaana na ke kaikaina.
13 Me ka mea i palapalaia mai, O Iakoba ka'u i aloha ai, a o Esau hoi ka'u i hoowahawaha ai.
l4 Heaha hoi ka kakou e olelo nei? He hewa anei ko ke Akua? Aole loa.
15 No ka mea, ua olelo mai la oia ia Mose, E aloha ana au i ka'u mea e aloha aku ai, a e menemene ana au i ka'u mea e menemene aku ai.
16 No ia hoi, aole na ka mea e makemake ana, aole hoi na ka mea e holo ana, aka na ke Akua no, nana i aloha mai.
17 No ka mea, olelo mai la ka palapala hemolele ia Parao, No keia wahi mea ua hoala mai au ia oe, i hoike aku au i ko'u mana ma ou la, a i kaulana ai ko'u inoa ma ka honua a pau.
18 Nolaila hoi, ua aloha mai oia i kana mea i manao ai, a ua hoopaakiki hoi oia i kana mea i manao ai.
19 A e ninau mai no hoi oe ia'u, No ke aha la ia i hoohewa mai ai? Nawai la hoi kona makemake i pale aku?
20 Kahaha! E ke kanaka, owai la hoi oe ke olelo ku e i ke Akua? E pono anei i ka mea i hanaia, ke olelo aku i ka mea nana i hana, No ke aha la oe i hana mai ai ia'u pela?
21 Aole anei e hiki i ka potera ke hana iho no loko o ka popo lepo hookahi i kekahi ipu no ka mahaloia, a i kekahi no ka mahalo ole ia?
KA HOOMOAKAKA ANA.
1, 2, 3 Hoakaka mai la o Paulo i kona aloha nui i na Iudaio ku e, penei,
He oiaio ko'u, i kuu olelo ana iloko o Kristo, he wahahee ole, na kuu naau hoi kekahi e hooiaio nei ia'u ma ka Uhane Hemolele, he kaumaha nui ko'u a me ka ehaeha mau maloko o kuu naau, no ko'u poe hoahanau ma ke kino, a ina e hiki ke okiia mai au mai o Kristo mai la, e ola'i lakou, he pono ia i kuu manao, e ae aku au malaila e pono ai keia lahuikanaka.
4 Na mamo a Iseraela, ka poe i hookamaia me he mau keiki la a ke Akua, [Pukaana 4: 22, 23. Kanawailua 32: 5. 6.] Ia lakou hoi ka nani. Pukaana 25: 22. Ia lakou ke kanawai o ka Haku. Kanawailua 4: 5, 8. Rom. 2: 18, 19. Ia lakou ka hoomana ana ma ka luakini. Ia lakou na olelo hoopomaikai a ke Akua i hai mai ai ia Aberahama ma me kana poe mamo, no ka Mesia Gal. 3. 16.
5 No lakou hoi ka poe kupuna, o Aberahama, o Isaaka a me Iakoba, a na lakou mai ke kino o Iesu. [Rom. 1 : 3.] Oia ka mea maluna e na mea a pau, o Kristo, oia ke Akua hoomaikai mau loa ia; oiaio no la. Mareko. 14: 16. Tito, 1: 3. a me 2: 13 Tim. 3: 16.
6 Aole hoi i lilo ka ke Akua olelo i mea ole, aole i haule na olelo hoopomaikai i ka Iseraela, no ka mea aole he poe Iseraela oiaio ka poe mamo a pau a Iseraela. Rom 2: 28.
7 Aole pau na keiki a Aberahama i ka hoopomaikaiia e like me Isaaka. Aole pau kana poe mamo i ka hoopomaikaiia me he poe keiki la a ke Akua i koho ai iloko o Isaaka. O ka Aberahama poe mamo e malu i ka berita, na Isaaka lakou.
8 Aole pau na mamo a Aberahama, na kona kino mai, i malu i ka berita a ke Akua, aka o kekahi poe mamuli o ka olelo hoopomaikai.
9 Mahope iho o ka hanau ana o Isemaela, hoakaka mai la ke Akua i kona manao hoopomaikai ia Aberahama, penei,