Ke Kumu Hawaii, Volume I, Number 15, 22 July 1835 — Page 118
118 KUMU HAWAII. (IULAI,
nei, a puni, hoi mai au, a e hanau o Sara. Oia ke keiki a ka olelo hoopomaikai. Okoa kona ano.
10. 11. 12 Pela i okoa ai na keiki a Isaaka a me Rebeka, i ka manao o ke Akua, i ka wa e koko ana o Rebeka, aole i hanau o Esau, a me Iakoba. Aole laua i hana pono, aole hoi i hana hewa ia wa. Ilaila, olelo mai la ke Akua ia Rebeka, penei, E hookauwa ke kaikuaana na ke kaikaina. Malaila i maopopo ai ke ku paa ana o ko ke Akua manao mamuli o kona wae ana i keia mea i kela mea, e like me kona makemake mau, aole no ka hana ana a ka mea ana i wae ai. Ma kona manao iho i koho mai ai ke Akua ia Iakoba i mea e pomaikai nui aku.
13 Pela hoi ka palapala hemolele, i olelo mai ai i ka manao o ka Haku. O Iakoba ka'u i aloha ai, a o Esau ka'u i hoowahawaha ai.
14 Me he ninau la ia a kekahi, Heaha hoi ka kakou e olelo nei, no keia hana ana a ke Akua? Ua hana hewa anei ke Akua? Hoole loa o Paulo, Aole loa.
15 Aole ke Akua i hewa i keia hana ana. O kona aloha nui keia i kekahi poe. Ua hoakaka mai la ke Akua ia Mose penei, E aloha ana au i ka'u mea e aloha ai, a e lokomaikai ana au i ka'u mea e lokomaikai ai. Eia ia'u wale mai no ia.
16 No ia mea, o ka pomaikai ana o kekahi poe, aia no ia i ka manao aloha o ke Akua, aole i ke kanaka wale iho.
17 Pela hoi i hoakaka mai ai ke Akua ia Parao. Ua kakauia kona manao ma ka palapala, ua koho mai ke Akua ia Parao, a ua hoala mai oia ia ia i mea e maopopo ai ko ke Akua mana, a e kaulana nui ai kona inoa ma ka honua a pau.
18 No ia mea, ua akaka ko Akua ano. O ka mea a ke Akua i manao ai e hoopomaikai maoli, oia kana i aloha mai ai a i malama pono mai ai. A o ka mea ana i manao ai e waiho, a paakiki, a poino, e like me Parao, oia kana i waiho ai a paakiki, a poino, mamuli o ko ke kanaka manao hewa iho no.
19 Manao ae la o Paulo, e haohao paha kekahi poe i keia olelo, a ninau paha penei, No ke aha la hoi e hoohewa mai ai ke Akua i ke kanaka paakiki ke ku e ole aku ia i ko ke Akua manao e waiho ia ia a paakiki, a poino?
20, 21 Papa aku la o Paulo ia manao oolea o ke kanaka, a ninau hou ia ia, Pehea la e hiki ai ia oe ke olelo ku e i ke Akua, me he mea e hiki ole la ke hana mamuli o kona manao iho? Aole anei he mea pono i ke kanaka hana ipu lepo, ke hana i keia ipu, i kela ipu ma ke ano ana i makemake ai, o kekahi ipu i mea e mahaloia, a o kekahi ipu i mea e mahalo ole ia? He pono anei ke olelo aku ka ipu i ka mea nana ia i hana, No ke aha la oe i hana mai ai ia'u pela? Aole loa ia he pono. He pono hoi ke hana ke Akua mamuli o kona makemake iho.
HE MAU NINAU.
Rom. Mokuna ix. 1, 2. He aha ka mea a Paulo i hooia mai ai ma keia mau pauku?
Kaumaha nui ia, me ka ehaeha mau, no wai?
3. Ina e pono i ke Akua, ke aha ka mea i pono i ko Paulo manao, ke lilo ia i mea e ola'i kona poe hoahanau ku e?
4. Owai ko Paulo poe hoahanau ana i aloha ai?
He aha na mea i waiwai nui ai ia lahuikanaka?
5. Owai ia mau kupuna?
No hea mai ke kino o ka Mesia?
Owai ke Akua hoomaikai mau loa ia?
6. Ua haule anei ka olelo hoopomaikai?
Pehea kekahi poe na Iseraela mai?
7. Ua malu anei i ka berita na mamo a pau a Aberahama?
Iloko owai anei i kohoia ka Aberahama poe mamo?
8. Owai ka poe i kohoia i poe keiki?
9. He aha na olelo hoopomaikai?
10, 10, 12. Hapai Rebeka nawai?
Heaha ka olelo na kana mau mahoe?
I ka wa hea?
A ma ia olelo, heaha ka mea i maopopo ai.
13. Pehea ka palapala no ko laua ano?
14. Nawai keia ninau? He pono anei?
15. Pehea ka olelo ia Mose?
16. No wai hoi ka pomaikai o kekahi poe?
17. Hoala ke Akua ia Parao i aha?
18. Ina manao ke Akua e paakiki aku kekahi, pehea la ia?
19. No wai keia ninau? He pono anei?
20, 21. He aha ke ano o keia mau ninau a Paulo?
He hewa anei ko Paulo manao he mea pono ke hana ke Akua mamuli o kona makemake iho?
HAI OLELO.
O KA MANAO AE LIKE.
WAILUKU, MAUI, Mei 7, 1835.
E Tineka.—Ua akaka lea ia i ko'u manao, e hoi hope auanei na kanaka ma keia wahi, a e uhi hou ia mai keia aina i ka pouli, a me ka naaupo, ke kokua ole mai ke Akua mamuli o ka makou hana ana. Pela paha ma na wahi he nui loa, ma keia pae aina. Aloha ino. Pehea e hiki ia kakou ke pale aku i ka hoowalewale ana a ka diabolo ke pale aku i ka pouli nui loa, i pakele ai kanaka i ka make? Elua mea a kakou e hana'i e pono ai kanaka.
1 O ka pule pono i ke Akua nona ka mana e hooliilii i ka pouli, a e hoowalewale mai, nona ka mana e hoolilo mai i na kanaka a pau ma keia aina, i poe naauao io maoli.
2 O ka noonoo ana i na mea hou, e pono ai na kula. Ua lilo ko kakou ao ana kahiko i mea ole; pono kakou ke imi i kekahi mea hou, no ka mea, i ko'u manao, o ka noho ana o kanaka ma ka naaupo, oia ka mea e make hewa ai ka kakou hana ana ma keia pae aina.
I ko'u noonoo ana i ka mea e pono ai na kula ma keia aiana, ua kakau au i keia olelo.
O KA MANAO AE LIKE,
Ma ka imi ana i ka naauao.
O kakou ka poe i kakauia ko kakou mau inoa malalo iho nei, ke huipu i ko kakou mau lima, a me ka manao i ka imi ana i ka palapala, a me ka lohe ana i ka ke Akua olelo. Ke ae oluolu aku nei kakou i keia mau mea malalo iho nei.
1. O ke kanawai, a me ka olelo, a me ke kapu, a me ke kauoha, a me na oihana a pau a Iehova, "he mau mea makemake ia, aole he goula, aole hoi he goula maikai he nui wale. Ua oi aku ko lakou ono i ko ka meli, a me ka waihona meli." no ia mea, e imi ikaika kakou a loaa kela palapala, keia palapala, i nele ole kakou i keia mau mea e pono io ai.
2. Ua kauoha mai o Iesu Kristo i kanaka a pau loa, "E heluhelu oukou i ka palapala hemolele." Ke ae aku nei kakou i keia kauoha. Aole e noho kakou i kekahi la hou aku, me ka heluhelu ole i kekahi mau pauku o ka olelo a ke Akua. E heluhelu kakou a mahuahua ko kakou ike, i kela la, i keia la.
3. Pehea e ike kakou i na mea a kakou e heluhelu ai, ke ao ole mai kekahi ia kakou? No ia mea, aole kakou e noho molowa hou aku i ke komo ana iloko o ke kula he-