Ke Koo o Hawaii, Volume I, Number 3, 12 September 1883 — Page 8
He Mele Inoa no Kekaulike.
A loko au o Halekela
Ike ia ka i-a i kuu maka
Ua kuhi au a he i-a pono
Eia ka he laikuela
Ia'u a hoolale aku
Wala e ka hi-u i ka makani
O na poeheke pili hau
I ke kai anu o Alika.
Akahi kikina laki ole
Ua hoi nele o Lainakia
Holu ko kua i ka aiana.
Aole no oe e pakele
I ka makaala a ka lukau
O Keo Kauweke he inoa
O ke kapena holu o Pilina.
Auhea wale oe e ka ula
E ka mea haupa a ko waha
Ka hokua hee mai keia
E pipii ai o ka awe ula.
He o'e ulei ka loaa
E aho ma Ulakoheo
I loaa kahi lehelehe pipi
Ke pii aenei ka manao
I ka uhu maalo i kuu maka
Eia iho no ka nenue
E ko'u ai o ko puu
Ke alo piko mai keia
E momoni ai o ke kileo.
Ka hi-u kamano ae ia
O ka i-a hoopii puupuu
I ahona i ka puu amaama
He ma-u oe ke nahu iho.
Ke Akeakamai.
GEOLOGIO.
Malalo o keia poo, ua hooiaio ia mai ke kulana o ka honua mai na kino o ka papaku ilalo, a hiki i ke kino lepo o ka ili o ka honua a kakou e ike nei.
He mea kupaianaha ke alakai ia ana o ka noonoo o ke kanaka e huli aku iloko o ke poiuiu o na miliona a me na biliona makahiki o ka hookumu ia ana o ko kakou honua, ka loaa ana a me ka hooiaio ana mai i ka noii ana aku o ke kanaka i ka hoike e hiki ai ia ke hookahua i kona oiaio; mailoko mai o na hoailona a me ka hoike ana a na pohaku.
Oia paha ke Au i olelo ia ma Kinohi,—"He ano ole ka honua, &c." A me ko Hawaii nei hoonohonoho kumu honua ana hoi mai a Kumu Lipo ka po."
Ma ka Buke Palapala Hemolele a ka poe Kaledia, oia hoi he aina ma Pasia e pili ana me Inia ma ka akau, a o Arabia ma ka hema, ua hoike ia malaila, he eono Wa a Au o ka honua, a i ke ono o ia manawa i puka mai ai ke kanaka. Ua like no hoi ia me ka Palapala Hemolele i lawe ia mai e ka poe Iudaio mai ko lakou noho pio ana ma Babulona i ke au ia Dariu a me Kaipereta. A oia ka Palapala Hemolele a kakou i unuhi ia mai ai e na Kumu mua a kakou oia hoi o Binamu ma.
I ka eli ia ana iho nei o Babulona, a hue ia na papa pohaku o ia kulanakauhale kahiko, ua hooiaio ia mai ka mea i hoikeia ma ka Palapala Hemolele a ka poe Kaledia, a me ka Palapala Hemolele a ka poe Iudaio.
AU A WA AKAHI.
"I Kinohi hana ke Akua i ka lani a me ka honua. He ano ole ka honua, ua olohelohe, a maluna o ka hohonu ka pouli. Hoopunana iho la ka Uhane o ke Akua maluna o ka wai. I iho la ke Akua i malamalama, a ua malamalama ae la. Nana aela ke Akua i ka malamalama, ua maikai; a hookaawale ae la ke Akua mawaena o ka malamalama a me ka pouli. Kapamai la ke Akua i ka malamalama, he Ao, a kapa mai hoi ia i ka pouli, he Po. A o ke ahiahi a me ke kakahiaka o ka la mua ia."
AU A WA ALUA.
"I iho la ke Akua, i aouli mawaena o na wai, i mea hookaawale i kekahi wai me kekahi wai. Hana iho la ke Akua i ke aouli; a hookaawale ae la ia i ka wai malalo o ke aouli, a me ka wai maluna o ke aouli, a pela io no. Kapa ihola ke Akua i ke aouli he Lani, A o ke ahiahi a me ke kakahiaka o ka lua ia o ka la."
AU A WA AKOLU.
"I iho la ke Akua e hui pu na wai malalo o ka lani i kahi hookahi, i ikea ai kahi maloo, a pela io no. Kapa iho la ke Akua i kahi maloo he aina; a kapa iho la ke Akua i na wai i hui pu ia'i, o na moana; a nana ae la ke Akua, ua maikai. I iho la ke Akua, e hooulu mai ka honua i ka mauu, a me ka launahele e hua ana i ka hua, a me ka laau hua e hua ana hoi ma kona ano iho, iloko ona iho kona hua maluna o ka honua, a pela io no. A hooulu mai la ka honua i ka mauu, a me ka launahele e hua ana i ka hua ma kona ano iho, a me ka laau e hua ana i ka hua, iloko ona kona ma kona ano iho: nana iho la ke Akua, ua maikai. A o ke ahiahi a me ke kakahiaka, o ke kolu ia o ka la."
AU A WA AHA.
"I iho la ke Akua, I mau malamalama iloko o ke aouli o ka lani, i mea hookaawale i ke ao a me ka po; i mau hoailona lakou no na kau, a no na la, a me na makahiki: I mau kukui hoi lakou iloko o ke aouli o ka lani, e hoomalamalama ai i ka honua; pela io no." Hana iho la ke Akua i na malama nui elua: o ka malamalama nui, e alii ai maluna o ke ao, a o ka malamalama uuku iho, e alii ai maluna o ka po, a me na hoku hoi. Kau aku la ke Akua ia mau mea ma ke aouli o ka lani, e hoomalamalama mai ai i ka honua, e hoalii ai maluna o ke ao a me ka po, a e hookaawale ae i ka malamalama a me ka pouli, a nana iho la ke Akua ua maikai. A o ke aniahi a me kakahiaka, o ka ha ia o ka la."
O ka ninau a Alepunakelo K. Nawahi ma ka Pae Aina,—no na mea e pili ana i ka La,—ua kapae ike makou i kau, no ke ano ole loa o kau ninau. E heluhelu hou paha oe i ka Helu 2 o KE KOO O HAWAII, a e ike no oe aia iwaenakonu ka La, a nona mai kekahi malamalama o na Hoku Welowelo e poai apuni ana i kona kino ma ko lakou ala poai iho.