Ka Lama Hawaii, Volume I, Number 10, 18 April 1834 — Page 1
KA
LAMA HAWAII.
HE MEA IA E HOOLAHA IKE, A HE MEA HOI E PONO AI KE KULANUI.
I naaupo ka uhane, aole ia he maika. NA SOLOMONA.
Makahiki 1. MAUI LAHAINALUNA APERILA 18. 1834. Helu 10.
HE ZEBU
NO KA ZEBU.
Ua like kekahi ano o ka Zebu me ko ka bipi. Ua like na niho a me na kui a me na maiuu.
Ua like no hoi na pepeiaohao a me ka maka, a me kekahi ano e ae o keia holoholona me ko ka bipi. Aka, maluna o kona poohiwi, he puu no kona, me he kuapuu la, nolaila, ua ano e ia.
Ua nui loa kekahi Zebu e like me ka bipi, a nui aku, a liilii iho kekahi, aneane like me ke kao.
No ka hanai ana, nolaila paha ka like ole, a no ka like ole o ko lakou wahi noho ai. Ma Peresia kahi i loaa ai ka Zebu nui, a ma Aferika ka Zebu uuku. O keia kii maluna, mawaena ia aole i nui aole hoi he uuku, mawaena wale no ia.
Holo hihiu keia holoholona ma Aferika, a ma kau wahi o Asia. Ua hoolakaia no hoiia, a lawe no ia i ka ukana ma kona kua, a e kauo no hoi ia i ke kaa a me na mea e, e like me ka lio. Ma kau wahi o Inia, ua hoohana nui ia oia, ma keia mau mea.
Ua oleloia, ua oi aku ka mama o ka Zebu, a me kona oolea, a me kona lokomaikai, mamua o ko ka bipi. Ina i kauo lakou i ke kaa, holo no lakou e like me ka lio, a hiki i kahi loihi, aole hoi i maloeloe. I ko lakou hele ana i kahi loihi, ua hanaiia lakou i ka berena i hanaia a ono i ke ko, a i ka bata paha.
Ma Surata kekahi kulanakauhale o Inia ua oleloia, o ka Zebu wale no ka lakou lio nana e kauo i na kaa, a nana no i hana i ka hana a pau i hanaia e na lio ma na aina e. Ua like no ko lakou holo ana me ko ka lio, a hoonani loa ka poe waiwai i ka lakou Zebu. Kau no lakou i na Bele kani ma ko lakou ai, a i ka holo ana o ka Zebu kani loa lakou. He pepeiaohao ko kekahi Zebu, a ua ole kekahi. O ka Zebu keokeo ka i manao nui ia, he ano e ko kekahi he kakaikahi ka mea keokeo. Ua kauia ka noho ma ko lakou kuai a holo ke kanaka maluna e ike me ka lio. Aole lakou i alakaiia i ke kaula waha, he kaula ihu ko lakou, ua hou ia ma kekahi puka ihu a puka iwaho ma kela puka ihu.
NO KA MOOLELO.
O ka mooolelo, oia ke hai mai nei i na mea i hala. He pono ke hoomanao, okoa ka mooolelo hemolele, okoa ka mooolelo a kanaka i kakau ai. O ka mooolelo hemolele, na Iehova ia i hoike mai, nolaila, ua oiaio loa. Aka, o ka mooolelo kanaka, oia ka mea i hoike mai ai i ke ano o na mea i hala e like me ka ike ana a me ka lohe ana o ka mea nana i kakau.