Ka Lama Hawaii, Volume I, Number 12, 2 May 1834 — Page 1

KA
LAMA HAWAII.
HE MEA IA E HOOLAHA IKE, A HE MEA HOI E PONO AI KE KULANUI.
I naaupo ka uhane, aole ia he maikai. NA SOLOMONA
Makahiki 1. MAUI LAHAINALUNA MEI 2. 1834 Helu 12.

HE HOKI

NO KA HOKI

            Ua like kekahi ano o ka Hoki me ko ka Lio. He mea nui no nae ka lio.
            Ua like na helehelena o ka Hoki me ko ka Lio a me ko ka Zebera, he ino nae ka Hoki.
            He ahinahina ka Hoki, a kokoke eleele kekahi, a kokoke keokeo kekahi.
            Ua loaa no ka Hoki ma na aina mehana a pau, he kakaikahi na aina i noho ole ia o ia. Ma Sepania ka Hoki maikai, no ka mea, ua malama nui ia, i ka ai, a ua ao nui ia no hoi.
            He kakaikahi ka holoholona i oi aku kona maikai mamua o ko ka Hoki.
            Ma kekahi aina oia ka mea halihali nui i ka ukana, a ua oi aku kona ikaika a me kona ahonui mamua o ko na lio e a pau i like ko lakou nui me kona. He lio pono loa ia ke hooholo, no ka mea, he wawae palaha ole kona; e hina ka lio maoli, hina ole ka hoki.
            Okoa ka Hoki laka, okoa ka Hoki hihiu. Ma na ululaau ma Amerika Hema, a ma Asia, ua loaa na Hoki hihiu. Ma na ohana nui lakou e holo ai, a ua hihiu loa. Ina i ai nui lakou, noho wale kekahi Hoki kane, a elua paha, e kiai. Ina ike aku laua i ke kanaka, a i kekahi enemi paha, alaila holo aku ke kiai, a poai i ua enemi la, elua poai ana paha, ekolu paha, a pela e makaikai ai. Alaila hoi aku na kiai i ko lakou poe, a hoholo nui lakou iloko o ka ululaau.
            Ua makemake nui ia ua poe Hoki hihiu la, no ka mea i ka wa i hoolakaia'i ua maikai loa lakou. Aka, no ko lakou mama i ka holo, ole i loaa ke hahai aku. A no ka hiki wawe o ko lakou honi ana, aole hiki ke hei malu, aole hoi e komo iloko o ka upena. Ma Peresia ua loaa lakou maloko o na lua i eliia, a hoopiha ia i na lau a me ka opala mama. Haule ka Hoki iloko o ua lua nei, a no ka palupalu o na lau a me ka opala, aole i eha, aole nae e hiki ia ke lele iwaho. Nolaila, loaa no i ke kanaka a hoolakaia.
 

No ke keiki maloko o ka huamoa.

            A hoopunana ka moa wahine i kana mau hua, i umikumamalua mau hora, alaila, ikea iki mai ke ano o ke poo a me ke kino o ke keiki. A i ka pau ana o ka la hookahi, alaila, mapopo ka hookui ana o ka puu; a i ka pau ana o na la elua, ua ikea mai na paiaa koko elua a maopopo no hoi ka hookui, ke nanaia'ku. A i ke kanahiku o ka hora, (oia na la elua a me na hora he iwakaluakumamalua,) ikea mai no na eheu, a ma ke poo, elua puhae i mau wahi no ka lolo; akahi puhae no hoi no ka nuku, a elua puhae e ae no hoi no ka lae