Ka Lama Hawaii, Volume I, Number 21, 27 September 1834 — Page 3
LAMA HAWAII.
pau loa. O Adamu, o ka lepo ula, ke ano o kona inoa ma ka olelo Hebera, no ka mea, no ka lepo mai kona kino. I mai la o Mose. I Kinohi 2:7. i mai, "Hana iho la Iehova ke Akua i ke kanaka, he lepo no ka honua, a ha iho la i ke ola iloko o kona ihu, a lilo ae la ke kanaka i uhane ola."
Aole kanaka i keia manawa e like me Adamu i ka wa a ke Akua i hana mai ai ia ia. Ua maikai waleno kona kino, a me kona uhane. Eia ka Mose olelo. I Kinohi 1:27, "Hana iho la ke Akua i ke kanaka e like me kona ano iho, ma ke ano o ke Akua i hana'i ia ia; hana mai la ia i kane, a i wahine. Hoomaikai iho la ke Akua ia laua, i mai la ke Akua ia laua, E hanau no olua, e hoolaha nui e hoopiha i ka honua, e hoolilo i ka honua malalo o olua, na olua hoi na ia o ke kai, a me na manu o ka lewa, a me na mea ola a pau e kolo ana ma ka honua." Hookahi mea waleno a ke Akua i hookapu mai, o ka laau i ikea'i ka maikai a me ka hewa.
Eia paha ka hana o ua a Adamu i hana'i, i mea e akaka ai kona naauao, a me kona alii ana maluna o na mea a pau loa. O ka haawi ana i na inoa, no na holoholona; a me na mea a pau loa. I mai la o Mose, i Kinohi 2:20, i mai. "Kapa aku la Adamu i na inoa o ka poe holoholona laka a pau, a o ka poe manu o ka lewa, a me ka poe holoholona hihiu a pau."
Ua pokole ka wa o ko Adamu noho ana ma ka pomaikai. Aole akaka lea ka pokole: hookahi makahiki paha, aole paha. Eia ka mea akaka. I ka hoowalewale ana a ka Diabolo, ma ke ano o ka nahesa, i kana wahine, ae aku ka wahine i kana, ai iho la ia i ka hua o ka laau kapu la, haawi ae la i kana kane, ai pu ia me ka wahine; a i ka laua hana ana pela, ua lilo laua i hewa, a kipakuia laua mai ke kihapai o Edena aku e mahi ai ma kahi ino, kahi kakalaioa a me ka puakala, a e ai ai i kana ai me ka hou o kona lae iho.
I kona noho ana pela, ua hanauia na Adamu, o Kaina, a me Abela, a me na keiki kane e ae, a me na kaikamahine. Pela ko Adamu ola ana a hiki i kona makahiki eiwa haneri a me ke kanakolu, a make ia. I ka makahiki o ke ao nei 931 paha, a i ka makahiki mamua o ko Iesu hiki ana mai 3074, kona make ana.
I ko oukou heluhelu ana i keia mooolelo no Adamu, e noonoo oukou i kekahi mau mea a'u i hai aku ai. Eia kekahi.
1 Nani ka maikai o na mea a pau loa mamua aku o ka hiki ana mai o ka hewa i keia ao.
Ia manawa, aohe mea e poino ai ko ke kanaka noho ana. Ua maikai na mea a pau ma keia ao, aohe makani ino, aohe pele, aohe olai, aole anu, aole wela, aole hekili, a me ka uila. Ia manawa, aole ike ke kanaka i ka makau, a me ka hilahila, a me ka huhu, aole ike ia i ka mai, a me ke kaumaha, a me ka make. Aole ike ke kanaka i ka manao ino. Aole loa. Ua mau loa kona makemake i ke Akua, a ua oluolu mai ke Akua ia ia, a me kana hana ana a pau loa. Pela ke ano o ka lani, ua makaukau anei oukou e noho malaila?
2 Eia kekahi. O ka hope o ka malama ole i ke Akua, he mea ia e makau ai.
I ko na kanaka malama ole ana i ke Akua, ua akaka lea ia, e malama ana lakou i ka Diabolo. Pela o Adamu. I kona haalele ana ia IEHOVA, ua lilo ia i kauwa na ka Diabolo. A heaha ka hope o kona malama ole ana i ke Akua? Ua maopopo ka hope o ka lilo ana o keia ao maikai i ao ino. O ka makani huhu, o ke anu a me ka wela, o ka pele, a me ka olai, o ka pouli, a me ka makewai, o ka makau, a me ka hilahila; o ka eha, a me ka mai a me ka make, o ka huhu a me ka inaina a me na mea ino a pau loa, oia, oia ka hope o ka malama ole i ke Akua, ma keia ao, a o ka make mau loa, oia ka hope ma kela ao pau ole. Pehea, aole anei oukou e makau i keia mau mea. Aole makemake anei oukou e pakele ai i ka eha mau loa? Ina pela ko oukou makemake, ina e haalele loa i ka hewa a pau loa me ka makau, a me ka hoopailua ia oukou iho, a me ka mihi pono i ko oukou malama ole ana i ke Akua.
3. Eia ka mea i koe. E pono oukou a pau loa ke paulele aku ia Adamu hope i make ole oukou i ko oukou hele ana ma na kapuai o Adamu mua.
Ua akaka ia ma ka ke Akua olelo, i ko Adamu haalele ana i ke Akua, ua lilo ia mea hewa, a ua lilo kana poe mamo a pau loa i poe hewa. Eia ka Paulo olelo. Roma 5:12. "No ia mea me ka puka ana mai o ka hewa iloko o ke ao nei ma ke kanaka hookahi, a ma ka hewa mai ka make; a pela hoi i hiki mai ai ka make i na kanaka a pau; no ka mea, ua hana hewa na mea a pau." Mai ka wa o Adamu mai, a hiki mai i keia manawa, ua hanau ia ma ka hewa, na kanaka a pau, ma na aina a pau loa. Ua hihia lakou a pau i ko ke Akua kanawai, a no ka makemake nui loa i ka hewa aole loa e halele kekahi i kona hewa, aole loa e pakele ai kekahi i ka make mau, ke hoola ole mai ke Akua. Eia ke ano o kamalii a me kanaka a pau loa, i ko lakou hahai ana mamuli o Adamu mua.
Aka, ua hoomaikaiia ke Akua hoomakaukau mai ia i ka mea e pakele ai kanaka a pau loa, a e ola'i lakou. Hoouna mai oia i kana Keiki, ia Iesu i ke ao, e hoopakele mai i kanaka. Ua make o Iesu ma ke kea i Kalahala no ko ke ao nei a pau loa, i make ole ai ka mea paulele aku ia ia. Oia no ke Keiki a ke Akua oia ke Keiki a ke kanaka, o Adamu hope keia. I. Kor. 15:45. E hele koke oukou io na la, e manaoio aku ia ia, i pakele ai oukou i ka make mau loa, a i ola oukou ia ia. Amene.
NA SOLOMONA.
MOK. 7.
E kuu keiki e, e malama i ka'u mau olelo,
E waiho pu hoi i ka'u kauoha me oe.
2 E malama oe i ka'u kauoha i ola oe,
A me ko'u kanawai hoi, e like me kou kii onohi.
3 E hawele oe ia lakou ma kou manamana lima,
E nakii hoi ia lakou ma ka papa o kou naau.
4 E i ae oe i ke akamai, o oe no ko'u kaikaina.
E kapa aku oe i ka ike, i hoahanau
5 I malamaia oe mai ka wahine ano e ae.
Mai ka malihini hoi i hoomalimali mai ma kana olelo.
6 No ka mea, ma ka puka o ko'u hale.
Ma ko'u puka makani, nana aku la au.
7 Ike iho la au i ka poe noonoo ole.
Ike iho la hoi au mawaena o ka poe o piopio.
I kekahi ui manao ole.
8 Maalo pololei ae la ia ma ke ala a hiki i kona huina,
Ma ke kuamoo oia i hele ai a i kona hale
9 I ke ahiahi, a po iho la ka la,
I ke aumoe, i ka poeleele.
10 Eia hoi, halawai pu me ia kekahi wahine.
Ua kahiko hookamakama ia,
Ua maalea kona naau.
11 (He walaau kona a me ka hoolohe ole.
Aole noho kona wawae ma kona hale iho
12 I kekahi wa mawaho oia.
I kekahi wa ae ma ke alanui.
Noho hoohalua oia ma na huina a pau.)
13 Alaila, aponoia ia ia a honi iho la.
Me ka maka hilahila ole, i aku la ia ia.
14 Ia'u he mau wahi mohai aloha,
I keia la no, mohai aku la au i ka'u mea i hoohiki ai.
15 Nolaila, hele mai nei au e halawai me oe.
E inu hoi ia oe, a ua loaa iho nei.
16 Hohola iho la au i ko'u wahi moe me ke kapa,
Me ke kapa onionio hoi mai Aigupita mai.
17 Kopipi iho la au i ko'u wahi moe,
I ka mura a me ke aloe, a me ke kinamona.
18 Ina kaua, i maona kaua i ke aloha a hiki i kakahiaka,
E hauoli kaua i ke aloha.
19 No ka mea, o ke kane, aole ia ma kona hale,
Ua hele oia ma kahi loihi e aku.
20 Lawe oia i ka eke moni ma kona lima.
A piha ka mahina, alaila, e hoi mai oia i kona hale.
21 Ua paa kela i ka nui o kana olelo,
Ua hoowalewale oia e ka malimali ana o kona lehelehe.
22 Ukali koke oia mahope ona,
E like me ka hele ana o ka bipi i kona wahi e make ai,
E like me ka naaupo hoi i ka hoopai ana i kona hewa.
23 A o aku la ka pua i kona ake,
Emo ole hoi e like me ka manu liilii i ka punihei,
Aole ona ike, no kona uhane ia.
24 Ano la, e na keiki, e hoolohe mai iau,
E maliu mai oukou i ka olelo a ko'u waha.
25 Mai huli ae kou naau ma kona aoao,
Mai hele hewa oe ma kona alanui.
36 No ka mea, manomano ka poe i haule eha ai ia ia,
Na mea ikaika hoi, ua pau i ka makeia e ia.
27 Ma kona hale ke ala e hiki i ka po,
Ke iho nei kona aoao ilalo i ka make.