Ka Lahui Hawaii, Volume II, Number 29, 13 July 1876 — Page 2

Page PDF (1.25 MB)

KA NUPEPA KA LAHUI HAWAII
HONOLULU, IULAI 13, 1876.

HOOLAHA KULA SABATI.

O na Kula Sabati a pau e makemake ana e loaa na Haawina Kula Sabati, i paiia ma na pepa, e hiki no ke hoouna mai i ka lakou mau kauoha ia maua, ma Honolulu nei, me ka auhau pu e uku mua ia. E pono e kauoha mua ia na haawina no na mahina eono a i ole i hookahi makahiki. O na kauoha a pau e haawi pu mai me ka inoa o ke Kula Sabati a me ko ke Kahu Kula Sabati. O ka auhau no na haawina, he 50 keneta no ka haneri.
C. J. LYONS, S. B. DOLE na Komite.

          ILOKO o keia mau la, i ka wa a na leo nune e puana mau ia ana mai na waha mai o ka lehulehu ma na kikee alanui, no ka ninau hoopae lima hana, oia hoi na pake e lawe ia mai nei ; ke manao nei makou—a aole no paha e hoahewa ia mai ana e na makamaka-—he kuleana ko makou—a o ka manawa kupono keia e hoike ai ia kuleana—e kamailio ai ma ko makou ano iho, he wahaolelo no ka lehuleha; ma na loina o keia ninau, e like me ko makou hoomaopopo ana.
          Aole keia o ka makamua o ko makou hapai ana i ke kalaimanao ma ka ninau e pili ana i ka lawe ana mai i na Pake o ke ano e lawe ia mai nei i mau paahana ; ua kamailio mua no makou, aka, aole no i pau na loina ma ia mau kamailio ana, oiai, he ninau nui keia ; he ninau pili i ka pono o na makaainana, a pili hoi i ke ola o ko kakou lahui—ae—he ninau nui, koikoi a kukonukonu i ka iwikuamoo o Hawaii.
          Ua nele ko kakou mau wiliko i na paahana—pela ka oleloia—ae, he oiaio no paha ia—aka, o na Pake wale no anei ka poe kupono e lawe mai? Ina ua nele io na wiliko i na paahana, alaila, ke manao nei makou he mea pono ka imi ana aku i wahi e hoolawa ia mai ai ia pilikia. He oiaio hoi, ke emi mau nei ka lahui, alaila he mea pono e imiia i wahi e hoopau ai ia emi ana. Pehea e hiki ai ? Ke olelo nei makou, aole ma ka hapuku ana i na kanaka o kekahi lahui i mau paahana me ka hoomaopopo wale no i ka pilikia o na mahiko a hoopalaka i ke ola o ka lahui! Aole ma ka hoopiha ana mai i ka aina a hookuu akea aku i kekahi poe i ike ole ia ko lakou ano noho 'na  hoopono e hele akea mawaena o ko kakou lahui! Aole! A aole loa!!
          He lahui i kaulana no ka hooikaika a me ka mikiala ma ka hana ko Kina, a no ia kumu i manaoia ai e kii aku ia lakou e hele mai a e mahi i na kula panoa o ko kakou aina e waiho wale mai nei. Ae—he oiaio aole paha i oi ka minamina o kekahi mea mamua o ko  makou minamina, i ka nana ana 'ku maluna o na hiohiona o ka aina makua i aloha nuiia, a hoomaopopo iho i ka waiho wale mai, he nahele hele ke alii—ua minamina makou no ia mea, a ua kamailio me ka paipai ana mai ha hoomaka mua ana o ka kakou pepa nei e puka ; aka, me ia makemake nui e loaa ka poe nana e mahi ; me ka iini nui e imi koke ia ka poe nana e hoololi ae i ka helehelena maloo a uliuli maluna o ka aina ; he mea hiki ole ia makou ke umi iho i ka puana ae i ko makou manao, ua ano puapuahulu ke kii ia ana aku o keia poe Pake lima hana no ka hooko ana ia mau iini nui. No ke aha la keia ano kanalua o ko makou manao ? Wahi paha a ka ninau.
          Ke alawa nei ko makou mau onohi ike mao a maanei o ka aina makua nani i aloha nuiia, a ke ike nei—ke hoolono nei na pahu kani i na leo e pae mau mai ana mai na pea o ka aina, a ke hoomaopopo iho nei no hoi o loko, i ke ano a me ke kulana o Hawaii—a hookahi no haina, ae, a he haina ano luuluu na ka makou makakila e haawe nei, Ke emi nei ka Lahui Hawaii! Aole keia he haina i haku wale ia iho no e makou, aka, he haina i hooia ia e ke au o ka manawa i kaalo hope aku la, a e hooia ia mai ana no e kela a me keia kanaka i haawi i kona hoomaopopo kanaka makua ana no ke kulana o kona lahui. Mailoko mai o ke ao hakumakuma ano pouli o keia ano e kau ano pahola iho nei maluna o na papalina o ka aina, ke lohe ia aku nei ka leo eehia ano makua o ko kakou alii Moi, E hooulu i ka lahui! A mahope aku o ka meheu o kana mau puana ana i keia mau huaolelo, ua ukali aku ka ikalka o na makakila o na papa pai a me ka leo o na makaainana kakaikahi, ma ka hooho ana me na manaolana e hookoia.
          No keia kumu ko makou kanalua, a ke manao nei me ka hopo ole, ua pono no makou ma ia kanalua ana. Ke noho nei mawaena o kakou nei ka huina nui o keia lahui i aneane e hiki aku ma kahi o ekolu tausani. Ke ulu ae nei he mau oihana mahiko, laiki a me kekahi mau ano e ae. Ke kii ia nei he mau haneri o lakou, a e kii hou ia aku ana no he mau haneri hou a me he la, ina penei ke ano o ka nee ana o ke au o ka manawa, alaila, me he la e hoea mai  ana mahope, e oi aku ana ko lakou heluna mamua o ko ka oiwi nona ka lepo.
          Ua noho kekahi o keia poe mawaena o kakou he mau makahiki, a noloko mai o ko lakou heluna nui, aole e hiki ke oleloia ae, ua loaa mai kekahi pomaikai nui mai ia lakou mai i oi ae mamua o na poino e ike ia nei a e hiki ole ai hoi ia kakou ke huna iho, mai ia lakou mai. He oiaio, he mau kanaka kakaikahi o lakou ua ike ia he pono a he maikai ko lakou kulana, aka, ke hoao aku e hookuku me ka hapa nui, ua nalo ia mau maikai powehiwehi i ka pouli o na ino lehulehu.
          Ua ike no ke aupuni a me na mea a pau i heluhelu i ka moolelo o keia lahui, he poe i haalele ole i ka noho 'na pegana, a he poe hoi mai kahiko mai, ma ko lakou ano iho ma ko lakou aina hanau, i hoole i ke Akua o ko ke ao nei. Ua ike ia no he poe i nele i ke ano o ka noho 'na maemae a maluhia; he poe i ike ole i na ano kulana hookanaka; a he poe i nele i ka hoomaopopo ana, i palulu i ko lakou mau maka, a i pani hoi i ko lakou mau pepeiao mai ka hooia ana i ke ano noho ana karistiano.
          Ua ike ia no ke ano o ka lakou mau hana mawaena o na opio, ka poe hoi i manaoia aku he mau makuahine no Hawaii iloko o na la e niauhele mai nei; aka, me keia mau kumu hookanalua a pau, ke kii ia nei, a ke makemake ia nei no e kii hou aku i mau haneri! He pono anei i ka lahui i ikeia ma ko lakou aina ponoi iho he poe pegana ke lawe ia mai mawaena o kekahi lahui kristiano e ake ana e hoola i kona iho? E ola ana no paha na oihana mahi, aka, o ka lahui aole loa! a aole loa e loaa kahi e hiki ai ia makou ke olelo ae e ola ana. Aole anei he mea pono ia kakou ke olelo iho ua lawa i na pake, a e hoao aku ma kekahi wahi e aku? Aole anei e pono e lawe ia mai na paahana me ka noonoo pu ia o ke ola o ka lahui? Ke manao nei makou, me ka hoopokole ana i keia kukulu manao, ua lawa ke kii ana aku o ke aupuni i na Pake, a ina e makemake lakou e hele mai, alaila na lakou no e hele mai e like me ko na aupuni e ae, ua hamama na ipuka manawalea o Hawaii no lakou, a o ke kaulike ka lokahi a me ka maluhia kona makemake. He ninau laulaha keia, aka, ua lawa paha no keia pule, a na na makamaka e hooholo no lakou iho a hiki i ko makou wa e kamailio hou aku ai.

NA DALA I HOEMIIA.

          No ka pomaikai o ko makou poe makamaka, a no ka lehulehu holookoa no hoi, ke hoakaka aku nei makou i ke ano o na dala i hoemiia iho nei ke kumu waiwai.
         O ka "Un Sol," ua like no ka nui me ke dala kahiko (5 Frank,) he kii wahine me kekahi mau kaha hoonani, me na huaolelo o Amerika Hema e anapuni ana maluna, a o na huaolelo "Un Sol" malalo. A ma kekahi aoao, he mau lala laau me ka lei maluna iho, me na huaolelo e anapuni ana.
          O ka "Un Peso," ua like no ka nui me kela ae la, he mau lala laau me ka palekaua mawaena, me kekahi mau hulu maluna, a me na huaolelo penei, "Republic de Chile" e anapuni ana, me na huaolelo "Un Peso" malalo. Ma kekahi aoao, he aeto, me na huaolelo o Amerika Hema e anapuni ana, me ka makahiki malalo iho.
          O ka hapalua dala, he mea kaupaona ma kekahi aoao, me ka pahikaua, me ka papale lole, me na kukuna la, me na huaolelo o Amerika Hema malalo ae. He manu aeto ma kekahi aoao, me na lau malalo ae, he mau huaolelo maluna, a me ka makahiki malalo loa.
          He nui aku no na dala e ae o Amerika Hema i hoemiia; aka aole nae i loaa ia makou.
          O na dala o Amerika, i anolike me he hapalua dala la, he mahuahua ae nae, me na huaolelo "Trade Dollar" malalo; o ka hapalua dala o Amerika me ka aeto; o ke dala me ka la nui ma kekahi aoao, a me ke dala "5 Frank," he mau dala maikai wale no lakou.
          Ua lono wale mai makou, e lawe ana ke aupuni i na dala i hoemiia, aole nae i hoomaopopo loa ia mai; i keia mau la aku paha e maopopo ai ka oiaio a me ka ole.

Na Anoai o ka Ahaolelo.

          E like me ka makou mau olelo i kela pule aku nei no ka Ahaolelo, pela no i keia pule. Ke naue malie nei no, me he la he moku i loaa i ka pohu malino lai i ka waena moana, a e nanea ana kona mau luina i ke kaao me na ano mania molowa a makahiamoe maluna o ko lakou mau kuemaka. Aka, iloko no nae o ia mau ano nanea, ua ala'e no kekahi mau kumu hoopuohoa a o ke oki aku la no ia ma na papa leo ana ma kekahi mau olelo hooholo, a i ole ia he noi e "ninau ano."
          He mea hiki ke hoomaopopo ia 'ku, mahope iho o ke kakamailio ana o na hoa ma ka ninau e pili ana i na pake hana, ua kue lakou i ka hoopae ana mai o ke aupuni i mau pake hou, a hoolilo hou aku hoi i mau puu dala nui. Ua nui ka poe i hoakaka i ko lakou mau manao ma keia mea, a ua ikaika ka poe i kue mai. Ua waiho ia 'ku keia ninau i kekahi komite no ko lakou noonoo, a ua hoike mai no lakou he mea pono ole i ke aupuni ke hoolilo hou aku i na dala ma ka hoopae ana mai i na limahana me ka noonoo pu ole ia o ke ola o ka la hui; a me he la, ua komo no ia mau manao hookahi iloko o na hoa o ka hale.
          O ke kanawai e pili ana i na kai lawaia, ua make, e like me ka mea mau, mahope iho o ka hooikaika ana o ka poe nana i hapai.
          O ke kanawai e hoemi ana i ka auhau laikini o na waapa, i waihoia mai e ka Hon. Kalaukoa, ua holo, a ua hiki i na keiki poola o ka uwapo ke hauoli iho.
          Ua hapaiia ka noonoo ana o ka bila e ae ana i ka inu akea ana i ka awa, a ua hooholo ia.
          Ua hapaiia he olelo hoohoio e ka Hon. Mr. Preston e kauoha ana i ke Komite Waiwai e hele aku e nana a e hoomaopopo i ke ano o na dala e waiho nei iloko o ke keena waiwai o ke aupuni, a hoike aku imua o ka hale. He mea maopopo ke kumu o keia hana, oia no ka hoemiia ana iho nei o ka waiwai o kekahi mau dala o ka Banako o Bihopa ma.
          O ka hana nui o ka pule i hala iho nei, oia no ka hapaiia ana o ka noonoo ana i ka bila kanawai e hoopau ana i ka oihana Lunakula nui no ka paemoku, a e haawi ana ia hana na kela a me keia Kiaaina o na mokupuni. Ua hahana na kalaimanao ana a na hoa ma keia kanawai, a ua kamailio ikaika mai ke alii Smith ma ke ano hope no ka Lunakula, a me ke alii Rhodes ma ka aoao e kue ana; aka, me he la ua ike no na hoa i kekahi mea a lakou i hooholo mua ai, a ua paa ko lakou manao me ke kalai ana, a hiki i ka wa i koho ai, a ua hooholoia iho la.
          O ke kanawai e pili ana i ka opiuma, ua hapai hou ia ka noonoo ana. Ma ko makou manao, he mea pono i keia kau Aha olelo ke noonoo akahele, a hooholo i ke kahi mea e pili ana i keia laau make, no ke pale ana 'ku i kona ino mai na kanaka aku o ko kakou lahui. He oiaio, he nui ke dala e laweia mai ana mai ke keena waiwai mai ke hookapu ia na laikini, aka, heaha la ia dala ke hoohalikeia me ka poino a me ka make a ka opiuma e kau mai ana mamuli o ia mau dala? Aole paha i ike na lala o ka hale i ka nui o ka poino o keia mea e hana nei mawaena o kekahi poe; a nolaila, ua minamina lakou i ka puu dala nui o ke aupuni me ka noonoo a hoomaopopo mua ole; aka, o makou, ua hoomakakiu, ua hakilo, a ua ike i ka ino o ia mea, a ke ku nei i keia la ma ka aoao kue ikaika i ka hookuu akea ia ana e kaheawai aku; me ka lana o ka manao, e haawi ana na wahaolelo o ka lahui ka poe hoi ia lakou ka mana, i ka noonoo kupono ana, a hooholo iho la i ke kanawai e kaupale aku i ka poino mai ke komo ana mai iloko o ka aina makua nei, a luku aku hoi i na wahi kauwa oiwi aloha i koe mailuilu iho.

KALAWAO, MOLOKAI.
KA HUAKAI A KE "KILAUEA," ME KE KOMITE HE 13 O KA AHAOLELO, NO KE KAHUA HOME O KA LAHUI LEPERA—NA HANA A KE KOMITE—KE ANO O KA AINA—KE KULANA O KOLAILA MAU OIWI—A ME NA HIONA E AE MA KA MAKAKAI ANA A NA HOA O KA PAPA-PAI, &c., &c.
Helu 2.

          Mahope iho o ka luana iki ana no kekahi mau minute pokole, e hoolono ana me ka nanea i ka leo pahee o na ohe a me ka pahu, a me ka puana'ku i na leo aloha hoolana manao imua o na lehulehu makamaka oia aina, ua hele aku la e kiei ma na keena o ka poe mai e noho ana. Ua komo aku la makou maloko o kekahi keena, he ano eehia oloko, e waiho ana kekahi mau makamaka ma ka papa hele, e okuu ana kekahi. He ea ano e kai pa mai i ko makou mau puka ihu, a ua ano kaumaha ka naau i ka ike ana'ku i na helehelena. E moe ana kekahi elemakule, e waiho mai ana ma ka papa hele, ua nele kona mau wawae i na manamana, o kona mau lima aohe na manamana, a o kona mau papalina, ua hiki ole ke hoomaopopo aku. "Aloha ea!" wahi a makou i pane aku ai ia lakou a pau. "Aloha!" ka lakou mau leo i puana mai ai. O ka elemakule, ua hiki ole i kona leo ke puka mai, o ka hawanawana wale mai no. Hookokoke aku la i ka pepeiao i kona waha, a lohe aku la i kana pane ana mai. "Eia makou la ke noho nei me ka nui o ka pilikia mai, nalo na maka o na makamaka, a e waiho ana paha na iwi i keia aina." Kulu iho la ko makou waimaka, pii ae la ke aloha. He oiaio, he mai hoomainoino keia, he mai i maka'u ia, a he mai hoi nana e luku nei ka lahui. He makamaka oia no makou, a ke hoomanao nei no ia ia, o Pami, no ko makou one hanau, o Kona kai opua i ka lai. Ua halawai a aloha pu me Kulana, he wahine i kamaaina a he makamaka no makou. O kona mau nanaina ua ano e, aka, o ke aloha, ke mau ala no. Ua ike ia Pomaikai, ua uwe mai i ka ike ana mai i na maka kamaaina o na la i hala, a ua ulu mai la ka hoomanao ana i na keiki, na moopuna a me kona kini e noho mai la i ka aina hanau. He mea hiki ole paha i ka mea heluhelu ke hoomaoopo iho i ko ano o ko makou puuwai ia wa ; oiai, ma ka hoomaopopo ana iho i ko lakou kulana, ko ano hoi o ka mai i kau aku i kona mau weliweli maluna o lakou, ua ulu mai la na hoomanao ana no na la i hala, a ua ulu pu mai la me ke aloha, a na ia aloha hoi i hoohanini mai i na kulu waimaka e hoopulu i ko makou mau papalina.
          Ua haalele iho la makou ia lakou me ke aloha, a halawai aku la ma kekahi keena e aku me ke Kapa,no Koloa i Kauai, he kanaka kino oiwi maikai, aka, aia maluna o kona mau helehelena na hiohiona weliweli o keia mai. Ua kamailio pokole me ia, no ke ano o ka noho ana a me ko lakou ola. Ua nele ia i ke kumu hoohalahala, o ka ai ua lawa, o ka awaawa wale no ka hewa, aole no nae hoi e hiki ke pale ae ia mea, oiai, he mea awaawa no ka ai i kekahi manawa. Ua lawa no ia ka ia, he kamano, he awaawa no hoi ia, o ka mea no ia i loaa, a ua lawa iho la no. Hookahi nae ana mea i manao ai ua nele lakou, oia hoi ke kanaka lapauu ole. He aila naha, he hua ale, a he paakai na wahi laau loaa'ku, a o na laau a lakou i manao ai he kupono no ka mai, aohe loaa'ku, a i anoai wale no i ka imi aku i na lau nahelehele. Aloha ino ia ke hoomanao ae makou i ka hui pu ana ia la. Ua hui pu no hoi me Keaki, he kaikamahine nona ke kino nui maikai a mohaha, nani loloa a ui kona mau papalina, maikai ka ili, a ke nana aku, me he la aole no i kau aku ka meheu o keia mai maluna ona. Ua kahaha makou nona, aka i ka nana ana'ku ma na lima, ua kuihe iho la, a ulu mai la ka minamina nona, oiai, aia ma kona mau lima na hoike ana, oia ka kekahi pio a keia mai weliweli. Ua lulu lima pu me Kaoiwiloa, no ka aina hookahi, he kupunawahine, a ua hu ae la no hoi ke aloha i kana uwe helu mai. He ekolu ona makahiki ka noho ana ia aina makamaka ole. Aia kona mai ma ka maka, he wahi ano haukeuke, a mai kona la i haalele aku ai i ka aina a hiki ia la a makou i halawai pu ai, oia mau no. Aohe wahi i ano e ae, a aole no hoi wahi e ae o kona kino i ano manuheu aku a ano e ae paha ma ke ano o keia mai. He maikai kona ola kino. Hoi mai la ko makou aloha a kahi hookahi i na kinimakamaka o ua aina hanau kaimalino ala i kana helu mai me ke leo hoalohaloha.
          Ua hui pu me Koleaka (w) no Kewalo, Oahu. He 10 ae nei ona makahiki o ka noho ana ilaila, ua haalele iho i keia aina a ukali aku la mahope o kana kane i lawe ia aku no ia mai i ka M. H. 1866, a hiki i ka 1870 make aku la ia. I ka 1871 male hou, he kane ua loaa no i ka mai, a make aku la i ka 1873. Ua male hou iho la mahope iho ia Papa, he lepera no, a make aku ia, male hou iho no ia Nailiili, he lepera no, make aku ia male iho la ia Pelapela, he lepera no. He maikai kona helehelena, maikai ka ili; he ui kona nanaina, aka, ia no nae he wahi meheu iki o ka mai maluna o kona kino. He wahi meheu hiki ole ke puana ae he lepera io paha aole paha; aka, o kahi mea kupanaha loa, oia no ka noho ana o keia wahine mawaena o na lepera, no umi makahiki, a ke mau ala no ka mohaha ano mai ole o kona helehelena. Ua pau kona manao e hoi hou mai i ka aina nei a ua makemake no e noho ilaila, me ke aloha mai nae o lakou a pau i na makamaka.  (Aole i pau.)

HOIKE O KE KULA HANAI KAIKAMAHINE O KE EHUKAI O LALO.

          Ua malamaia ka hoike o ke Kula Hanai Kaikamahine o Waialua ma ka la 6 iho nei. Ua hoonani maiau ia na paia a me ka helehelena okoa o ka luakini, a ua kauia mai la mawaena o na lau paoa ala o ke kuahiwi, na kii pena nani a me na huaolelo kupono no ka manawa, i hanaia e ka lima o na haumana. Ua hoomakaia na hana o ka la i ka hora 9 A. M., a ua nani molale ka la no ia hana. O ka himeni hookipa mua loa, ua puanaia me ka nani, a ua kau mai ka iini eehia maluna o ke anaina. O na haiolelo ma na olelo haole a me na Hawaii, ua ku i ka mahaloia, a ua holomua na hana a pau. Mawaena o na hana pili hoike ma na mea naauao, ua haawiia mai la na leo mele hoolealea a me na haiolelo ku i ke akamai ma na olelo a i elua.
          O na hana a pau o ka la, ua hoikeia mai na kumu e iini aku ai ka naau, aka, ua oi loa aku no na papa ma na mea huahelu i ao ia e Miss Mary Green, a me na haiolelo a na papa Miss Lidgate, ma na lala o ke alanui imi naauao. O kekahi mea i hoopiha nui ia ai makou me ke kahaha, oia no na papa o na pokii liilii loa, uuku iki ko lakou mau kino, aka, ua moakaka ka lakou mau puana ana ma na mea heluhelu a me ke pela ana. Ua hooloihiia ka hoike, a ua kau aku hoi i ka haawina o ka mahalo maluna o na kumu elua a me na haumana. O keia kekahi o na hoike a makou e hiki ai ke kaena ae no ka holomua o ka ike. Ua hoomaopopo ia na hiohiona makemake a hoihoi o na haumana i ko lakou mau kumu, a ua hoike mai no hoi na kumu i ko laua kupono no ia wahi. O keia kekahi o na Kula Hanai Kaikamahine nui ma keia mau mokupuni, mawaena o 70 & 80 haumana. Maanei, he mea hiki ia makou ke puana'e, ma na mea a makou i ike ai a i hoomaopopo ai malaila, ua ulu mai ka manaolana, he pomaikai nui ko ka lahui a me ke aupuni Hawaii mamuli o keia kula, a ke lana nei ko makou manao, e mau loa aku kona holo mua ana.

Hoike o ke Kula Kaikamahine o Maunaolu, Makawao.

E KA LAHUI HAWAII; Aloha oe:—
          I kulike ai me ka mea i hoolahaia, e hoike ana ke kula maluna ae i ka la 29 o nei malama, pela no i hookoia'i, ma ka weheia ana o ka hoike ma ka hora 9½ A. M. Oiai hoi na keena e kahiko haaheo ana i na lau o ka awapuhi i wiliia me ka palai. Ua wehe ia mai la ka hoike ma ke mele ia ana mai o ke mele "Our Father" me "Come ye Disconsolate" e ke kula holookoa me ke kani pu o ka ogana malalo o na lima o Miss Rachel Kekela.
          A mahope o keia, ua ku mai la kela me keia papa, e like me ka mea i hoonohonoho ia malalo iho nei, malalo o ke alakai ana a Miss H. E. Carpenter ke kumu nui me Miss Alice West ka hope kumu a me kekahi mau haumana o ka papa 1; a o Miss Lottie Alexander ma na mea pili i na mea himeni me ka hookani ana i ka ogana, a me kahi mau haumana no i hoomaamaaia ma ka ogana.
Kumu  Buke  Papa
Miss Carpentes.  E. P. Arith.  4th Class
Miss J. Halstead  Reading  4th Class
Recitation . . . . . Mary Silver
J. Halstead, Singing . . . . . Mt. Vernon Bell
Miss a. West  Reading & M. Table,  P. Class
Miss Poni Kahale . . . . . Hookani Ogana
Recitation The Child Resolve.
Organ  "  The Sun Dial.
M. Bailey, Song, The gate of Ajaw, School
H. E. Carpenters, Philosophy, 1st. Class
Recitation . . . . . Tittle Things.
Rachel Kekela, Song, Come to tho old oak tree, School.
H. E. Carpenter, Reading . . . . . 5th. Class
Singing, Jack & Jill, (Three little girls.)
Recitation.
H. E. Carpenter, Eaton's C. S. Arithmetic, 1st. Class.
Recitation.
Hattie Akana, Organ, Evening Song.
Recitation, Changing Work, Beke Edmund
Lottie Alexander, Singing, Scatter Seeds of Kindness.
H. E. Carpenter, Geography 3rd. Class
Singing, I am so glad, (Three little girls)
Recitation, What they say?
Mary Alexander, Singnig, The Carnival of Venice.
Miss Nua, E. Int. Arithmetic, 3rd. Class
Miss Lilly Sniffin, Reading "
" Singing, Song of the Roses, School.
H. E. Carpenter, E. Int. Arithmetic, 1st. C.
Recitation, Margaret was 20 twenty years old, Dorcas Sniffin.
Lottie Alexander, Sing, Beneath the shade, School
H. E. Carpenter, Physiology  1st. Class
Recitation, A child in the sea, J. Halstead
Joanna & Ellen Halstead, . . . . . Organ playing
H. E. Carpenter, Grammar & Reading, 1st. Class
Hattie Akana, Sing, The valley of Chamouni
H. E. Carpenter, Spelling down. School
L. Alexander, Sing, Greeting of Spring, "
H. E. Carpenter, Bible Lesson, Book of Proverb, School.
L. Alexander, A. West, Gymanastic, School
"  "  Marching around,  "
          I ka pau ana o na haawina maluna ae nei i ka hoikeia, ua ku mai la o Dr. Emerson e hai i kona hauoli piha no na mea i hoikeia, ma ka puana ana mai i keia:—"Aole au i ike i kekahi hoike kula hanohano e kaulana ai o ka apana e like me keia ma Hawaii nei, &c." A mahope iho o kana kamailio ana, ua mele ia mai la ka "Parting Song" e ke kula holookoa, o Miss Ellen Halstead ma ka ogana. A pau ke mele ana, pule o W. P. Kahale, hookuu ia  na hana o ka la.
          Maanei, ke puana ae nei ka mea kakau, "Ua ikeia ka oioi o Maui Hikina." Oiai, ma na mea kula a pau, ua hoike mai la lakou ia lakou iho he poe kaikamahine haole oiaio maoli lakou, oiai, ua hiki ke olelo ma ka olelo Beritania me ka maikai loa o ka puana ana, a pela hoi ma na buke a pau i hoikeia. Ua hoike pakahi mai no hoi lakou i ko lakou kulana me ka hiohiona mikiala, a pela pu no hoi me na kumu.
          Ma na himeni a pau i mele ia mai, ua hoike mai la ia i ko lakou eleu nui ma ia lala o ka ike, oia no ia la o ka "Canary Bird." Ma ka Gymanastic, (hooikaika kino) he nani i ka makou nana 'ku, he like wale no na hele ana o ka lima, oiai ka ogana e alakai ana i na ka-i ana.
          Maanei, e hoike pau aku ana ka mea kakau i na nani i hanaia ma ia la, o keia ka oi o na hoike i loaa i ke Kula Kaikamahine o Makawao ma na mea a pau i hoikeia; he mea maopopo ia makou, aole e hiki i kahi makaikai i hiki mai ia la ke hoopoina i na mea i hanaia, aka, ke hoi la lakou me ke kuko nui e loaa ona mau kaikamahine hou na lakou e hookomo mai ai, a hauoli ka naau ke hoe mai i na la hoike. Minamina nae makou i ke Kiaaina o na Hono o Piilani i kona hala ana ana i ka Ahaolelo, aole oia e ike, aka, e lohe ana nae oia. ua palua ia ka oi o ka makaukau me ka nani o keia hoike hoike ana i ko na kau i hala. Ua piha pono no hoi ke keena i na makaikai hanohano o ka aina, a ua piha lakou me ka hauoli, a ua pomaikai nui loa makou a pau i ka hiki kiko ana a ike maka i ka "Nani o Aipo," "Ka oioi hoi o Maui Hikina," "Ke kahua hoi e ulu ai ka lahui."
          Ke minamina nei au no ka hiki ole ia'u ke hoike aku i na mea a pau i ka nani o kela me keia mea i keia wa, aka, e kala mai no. A eia ka'u, e hoouna ae i ka kakou mau kaikamahine, i loaa ka pomaikai, oiai "Ka Ua Ukiukiu e loku hala ole ana iluna o Puunianiau." Me na Keiki o ka Halepai ko'u Welina.  R. W. WILCOX.
Ulupalakua, Maui, Iune 30, 1876.

REBECCA HAWEA UA HALA.

          O Rebeka Hawea ua hala i ke alanui hiki ole ke ka-ua 'ku, ua hoi aku la e moe i ka opu ana ole o ka honua, ma ka la 28 o ka malama i hala aku la.
          O keia Hawea, oia kekahi o na konohiki o ke ahupuaa o Waianae nei, aina Leialii o ka Moi, he wahine ponoi oia na S. Kaapuiki, ka mea i hoi mua e moe i ke poo o ka make. O keia mau mea, o laua kekahi o na inoa koikoi a ulakolako o ka noho ana ma ka aina o Waianae nei, ua like no ko laua malama lokahi ana e uhauha ole i ko laua mau lako o na mea huna makamae, he mau mea no hoi i punahele a i manao nuiia e na Moi i hala, mamuli o ke kauoha a ko laua makua imi haku.
          He mau luna kahiko laua no ka ekalesia o Waianae nei, i noho pono me ka hewa ole, a he puuku malama dala no hoi no ka ekalesia, aole i ikeia ke paewa o ka laua mau hana, a na laua no i waiho mai no ke onawaliwali; ua hoike mua ia ae nei, he mau mea lako laua, o laua no ke kiekie ma ke kokua nui ana i ko ke Akua aupuni, a me na lulu kuloko o na ano a pau. O keia wahine, oia no kekahi pou-hana o keia ekalesia, ma ka malama i na hana pono, a oia no hoi kahi ohua i ka wa i hulihia ai ka moku Owana a poino ai o Maraea Haona. Ua hanauia oia i ka 1803, a make iho la ma ka la 28 o Iune, a waiho iho la i na moopuna me kana kuakahi, ka ohana.
          Hookahi a makou mea kaumaha loa, aole i hele ae na kahu ekalesia e ike i kona kino kupapau, aole no hoi i pule no kona haule ana i ka lua, aole no hoi ka lunakahiko, a na ka luna halehalawai i hoomanao iho iaia oiai oia e komo ana i kona hale papa.  KA NUPEPA KAIAULU.
Waianae, July 3, 1876.

Moolelo o ka Hoike Makahiki o na Kula
Sabati o Kailua a me Helani.

Ma ka la 29 o Iune, hora 10 A. M., hoike na Kula Sabati maloko o ka luakini o Helani. Eia na Kula i hiki mai:
1 Kula o Keauhou, S. Kane ke Kahu, 35 haumana i hiki mai.
2 Kula o Kahaluu, S. Kane ke Kahu, 32 haumana i hiki mai.
3 Kula o Pahoehoe, E. Kaikai ke Kahu, 20 haumana i hiki mai.
4 Kula o Holualoa, E. Kaiawe ke Kahu, 69 haumana i hiki mai.
5 Kula o Kahului, S. T. Simeona ke Kahu, 5 haumana i hiki mai.
6 Kula o Kailua, S. Kama ke Kahu, 8 haumana i hiki mai.
Na Haawina Kula.
Keauhou, Ioane 1—9. 2 himeni, ma ke alakai ana a R. Makahalupa. Haiolelo kiko na Kapuui a me Keamahuli.
Kahaluu, Mataio 5, Luka 1. Ioane 1; 9. Pualu paanaau, na kanawai he 10 o ke Akua, ma na himeni i hui pu ia me ka pahu a me ka ohe, i alakaiia e J. B. Kaomea Esq. Nui ka hauoli o ke anaina.
Pahoehoe, Ioane 1; 9, me na himeni, i alakaiia e Walia Pa.
Holualoa, Ioane 1; 9, a me na haawina pili io ia nei, na himeni leo manu, i alakaiia e D. Alawa, me na haiolelo a Adamu, "heaha na mea e ulu ai na Kula Sabati?" "Hoopale ka hewa o na hoomanakii."
Kahului, Ioane 1; 9, me ka himeni.
Kailua, Ioane 1; 9.
Ma keia hoike ana, ua hiki mai na Kahu 6 me na haumana he 169. Ua ike pono ia ka nee ana o na Kula Sabati imua, i oi aku i ko na makahiki i hala, ma ka eleu o na haumana ma na hana maikai. Me ka manaolana, na na Lani e kokua mai, a e holo no na hana ma keia hope aku.
J. K. KELIIKOA.  Kakauolelo.
Helani, Iune 29, 1876.

HE HOOLAHA AKEA.

E IKE auanei na kanaka a pau. O Makou o ka Poe Hui nana i Hoolimalima i na Apana Kula e pili ana i ka Loko ma Kaelepulu, i Kailua, Koolaupoko, mokupuni o Oahu, ke hoolaha aku nei. Ke hoike aku nei makou ma ke akea, o ka Pa Aupuni e ku ia maluna o ua Aina la a makou i hoolimalimaia. Ua pau kona ku ana he Pa Aupuni maluna o ua aina la, mai keia la aku e laha ai ma ke akea, oiai, ua poho makou ka poe nana i hoolimalima i kela aina i keia Pa Aupuni. O ka mea a mau mea paha nana e kukulu hou i keia Pa Aupuni maluna o ua aina la o makou, e hoopii no makou ma ke Kanawai ma ke koi poho ana. E lawe loa ia na holoholona hele hewa a pau ma ka Pa Aupuni ma Heeia, aole ma ka Pa Aupuni ma Kailua. Na ka HUI nana i hoolimalima na Apana Kula ma Kaelepulu, Koolaupoko, Oahu.
Kailua, Koolaupoko, Iulai 12, M. H. 1876.  1-t*

A. McWAYNE.
Mea Hoomakaukau a Kuai Laau Lapaau

MA ke kihi o Alanui Papu me Kalepa E makauau mau ana me na Waiala o na ano maikai loa, na Kopa Ala, na Limu Huahuakai, a me na mea he nui. O ke ano Aila Hamo Lauoho oi loa o ka maikai maloko o ke Kulanakauhale nei, no ka hapaha dala wale no (25 k.) no ka omole. E kipa mai e hoao i ike pono.
E haawiia no na kukakuka pili i na laau lapaau i kela me keia manawa o ke ao a me ka po, me ka uku ole.  29 3-m

E LOAA NO I KA POE E MAKEMAKE I NA
INIKA KAKAU,
PENI, PEPA,
WAHI-LE TA,
BUKE,
MA KAHI O
TARAMU.

Manae iho o Kini Hana Wa ti.
KAHI HOI E LOAA AI IA OUKOU
NA BUKE!
Oia hoi na nupepa i humuia, a e kuniia ka inoa mawaho o ka buke, a ka mea makemake ana, eia no ma kahi o
TARAMU.
KAHI E LOAA AI KO OUKOU MAU
Papa Kuni Inoa!
No ke kuni ana i na Lole,
Na INIKA a me na BALATI,
—NO KA—
$1.50 NO KE KUNI KELEAWE,
2.00 NO KE KUNI DALA.
EIA MALALO IHO NA OLELO KUHIKUHI.
NO KA LAWELAWE ANA I KA
Inika kohu mau a Thos. G. Thrum,
HE INIKA KEIA E HOAILONA AI NA LOLE KEOKEO.
[E kawili mua ia ka inika, alaila e hookulu iho hookahi kulu maluna o kahi apana aniani, e hooma-u pono ia ka peni hulu; hoomoe iho ka papa inoa maluna o ka lole i hoomaemae maikai ia; pena iho me ka wikiwiki a ike ia ke kohu ma kahi aoao; alaila iho ma ia aoao me ka alana lole i wela kupono, a i ole ia e hoopili aku i ke aniani uwahi o ke kukui mahu; alaila kaulai aku i ka la i mau hora. Ina e hooko pono ia keia mau rula, o ke kohu mau no ia o ka inika. O ka holoi mua ana o ka lole mahope o ke kau ana o ka Inika me ka wai wela me ke kopa, aole me ka wai koekoe. E holoi maikai ia ka papa inoa me ka peni hulu, a waiho aku.
Malaila no e uku ia ai na uku kiekie e like me ka nui oh na makahiki o na poo leta Hawaii o na ano a pau, mai kahiko mai a i keia manawa, o na poo i pau ko lakou waiwai ma na leta.  ( 1y)  TARAMU.