Ka Leo o ka Lahui, Volume I, Number 12, 3 September 1889 — KA OIAIO I AMERIKA HUI. [ARTICLE]

KA OIAIO I AMERIKA HUI.

Ua hiki mai he mau leia mai na Hawaii Ponoi e noho la ma na Mokuaina o Amerika Hui, a he hookahi no o lakou leo e pae mai nei, eia iho kekahi o na leta i hiki mai. Me he la, akahi no a pa ka puuwai o na kanaka Hawaii, i hoea mai ai ke ohohia a me ka lokahi o na puuwai mai Hawaii a Niihau, a lohea ka leo mai na aina e mai o na Hawaii Ponoi. He mea kupaianaha keia, a he mea no hoi na na haipule oiaio e noonoo iho ai. Eia mai keia leta: He mau malihini kaua ano iho la, o kou hookele hanohano a me na keiki lawe poahi o na hua metala o ka Halepai, ma o lakou la au i lilo ai i kupa a kamaaina, e oluolu oe e kipa mau mai a hiki i kau kanaka makua ana, pela au e hauoli mau ai nou i na la i koe o ko'u ola ana ma keia aina malihini. Mai kanalua no ka loa o ke alahele, o ka hauoli me ka ulumahiehie o ka manaolana, pela pu e makana ia'ku ai kou ola ma keia mua iho, a ke haawi aku nei ko'u lima akau i ke aloha oiaio nou: (Mamuli o ka lokomaikai o ka Lunahooponopono o "Ka Oiaio," ke pai nei makou i keia leta me ka hookaulua ole. L. H.) Aloha oe e "Ka Oiaio," He malihini he kamahao, He mea hou ano nui, Mai ka aina hanau mai, Ua imi a loaa iho nei, He io a he iwi kuamoo, Nou e Hawaii pomaikai, Ahonui ka au ana mai, I ke kai loa o Mamala, Ka moana kai uli kai hohonu, Na ale ahiu o ka Pakipika, Ike oe i ka Ipuka Gula, Ike ia Kapalakiko, Kau i ka puaa holo honua, A eku hele i ke alahao, I ke ala mauna i paa i ka hau, I ke kula laula o Walawala, Inu i ka wai iniki niho, Wai huihui hau o Kolumebia, I ka ehu lau laau o Keomolewa Ike ia Puget Sound nei, Kona mau aekai pahaohao, Hui malihini iho nei kaua, I Kanaka Town i ka lai, I ka wehi Laupaina, O ua Tacoma nei. J. W. D. KALEHUANUI, Kanaka Town, Tacoma, W. Ter. Augate 12, 1889.