Ka Leo o ka Lahui, Volume I, Number 12, 3 September 1889 — Hunahuna Peepoli ke Kolohe. [ARTICLE]

Hunahuna Peepoli ke Kolohe.

Ua olelo aku makou i ka pule i hala, ua hoolako ia mai kekahi mau poka a me kekahi mau lako kaua e ae i ka puali raifela a me na Parisaio i ka la 30 o Iulai i hala, mai luna mai o ka manuwa Amerika Adams; a ua kapa mai ka nupepa pili aupuni P. C. Advertiser ia makou i ka wahahee, aole loa ka i hoopae ia mai kekahi mea oia ano mai ua moku kaua Adams la. Aka aia nae i ke ahiahi oia la hookahi

ua hoea ae la he leta na Konela V. V. Akepoka, e hoike ana, ua loaa mai he umi tausani poka me kekahi mau lako kaua e ae mailuna mai o ua manuwa nei. Ua hoike pu ae no hoi ke Konela i ka lapuwale o na hana a kekahi poe Parisaio i ke kalahea leo nui e li a e ki pu ia Wilikoki oiai oia ua haawi pio mai iaia iho, e hoike ana i ko lakou hohe wale. Ua hoike pu ae no hoi oia i kekahi mau mea lehulehu e pili ana i ke aupuni a me ka lawelawe ia ana. Hunahuna peepoli ua nupepa nei, huai pau ia mai la nae a hoike ia mai la ka oiaio o ka makou mau mea i olelo ai. He mea hiki ole ia lakou ke huna i ka lakou mau hana ino a ku i ka powa lawe ola.