Ka Leo o ka Lahui, Volume II, Number 351, 23 December 1891 — Page 3
This text was transcribed by: | Lisa M. Watkins-victorino |
This work is dedicated to: | Awaiaulu |
KA LEO O KA LAHUI.
"E Mau ke Ea o ka Aina i ka Pono."
MAKIA PAA IA KE ALOHA.
______
3. Kau Ahaolelo o 1884, loaa he puu dala no ke kukulu ana i hale kula olelo Beritania ma Waihee, ke ku nei he hale nani i hoopuni ia me ka pa. He kia hoomanao luli ole keia no na makua; he makana poina ole hoi na oukou e hooho like ai me na puuwai hamama o ke aloha kakia iwi-
Owau mai ka oukou
E hea mai ai
E hea ka Lahui
E komo maloko
Eia ka uku la
O ke aloha koho like ia’u.
4. Kau Ahaolelo o 1890, hookahuli ana i ka Aha Kuhina o Kakina ma. Ma ia hana, i loaa ai he maha i ka Nohoalii, a hoihoi hou ia mai ai ka mana i ka lahui; hooholo ia ke kanawai koho balota malu; opapu ia ka mana aluna a lima ikaika, o ka poe waiwai; loaa hoi he mau ipukukui hoomalamalama no Waihee; kuu home aloha i ka eheu o na wai, a ka makani akipohe, e pa aheahe malie nei.
He ma-u keia mau wahi kanaenae aloha ia oukou e na hoa uhaiaholo o ka hana nui a koikoi hoi o ka aina, ka lahui a me ka Moi. O ka mea nui hookahi wale no a’u e hoike aku ai ia oukou a pau loa; e loaa ia oukou he noho kuokoa wiwo ole, puni ole i na kipe, poholalo ole, manao kaulike, hoomanawanui a noho maikai, e malama i kulana hanohano o ka apana koho a me ke aupuni. O ke kanaka maikai, lawe mai i na waiwai maikai o loko o kona naau; o ke kanaka ino, lawe mai i na waiwai ino, noloko mai o kona naau ino; o ke kanaka manao ino, oleloino, a hanaino hoi, ua pau ka wai ono o kona punawai iho, ua pii mai ka wai lepo, wai ekaeka o na daimonio ino la o ka luaahi pio ole. Na ka Haku e kaupaona ia kakou a pau loa.
Me ka mahalo nui,
S.W.P. KANEALII.
Honolulu, Ekemaba 22, 181.
_____________
KA HUKIHUKI KAULA.
_____
Ma ka po Poakahi nei, ma ka hale hooikaika kino ma Manamana, i malama hou ia ai ka hukihuki kau la, mawaena o na Pelekane kue i ka Amerika, o na hui keia i hoopanee ia mai ai mai ka po Poaono mai.
Iloko o ka huki ikaika ana o na aoao elua, no aneane paha e elua hora, ua liko aku la i na liona o Pelekane ka lanakila, a lohaloha iho la hoi na eheu o ka manu Aeko.
A pau hoi ia, ua komo mai la na keiki o Potugala kue ia Hawaii. I ke komo mua ana mai no o na Pukiki ua ike e aku la no ke anaina kanaka e lilo ana ke eo i na kanaka Hawaii, oiai, aole he like o ko lakou kulana me na Hawaii. Ua hoomaka ka huki ana o na aoao, a elua, a iloko paha o hapalua hora wale no, ua huki pu ia aku la ua poe keiki nei o Potugala e na Hawaii a hiki ma ko lakou mau home ma ka aoao e ka puu o Puowaina.
Ma ka po nei i huki hou ai o Pelekane kue ia Hawaii, a o na Geremania kue ia Potugala. O kekahi keia o na lealea i ike ia, a lohe ia no hoi i ka paiakuli i na leo uwauwa o na kanaka, i ka wa e lilo ai o kekahi aoao.
____________
I keia la e kuai kudala aku ai o Mokana, i kekahi mau waapa mahu. O ka waiwai keia o Kapu.
____________
UA MAKE.
_____
Ma ke ahiahi hora 5 o ka Poakahi nei, oiai o Henry Williams, kalaiwa kaa o kekahi hui kaa ukana o keia kulanakauhale, e papa olelo ana mawaho iho o kahi kuai kudala o J. F. Mokana me kekahi pukiki. Ua ku’i ia mai la oia a hina aku la ilalo, a ku kona poo i ka paepae pohaku o ka aoao alanui.
I kona hina ana. ua kii ia mai la oia e kekahi mau lima kokua a hapai ia ae la iluna; a ua ike ia ua puka pu kona poo, aole nae i manao ia e make ana oia. Ua hoihoi ia oia ma kona home, a ma ka hora 11:30 o ia po, ua ha’i ia mai ka lohe i ka halewai, ua make loa aku la oia.
Eia ke imi ia nei ka limakoko lokoino nana i o-u ao i ke ola makamae o ia kanaka opio. Aloha wale oia. Ua lohe wale ia, ua hoopaapaa laua no ka mea e pili ana i ka hukihuki kaula e malama ia ana ma ia po mawaena o na Hawaii me na Pukiki, a oia ke kumu i loaa ai o keia puupuu make iaia.
_____________
NUHOU KULOKO
_____
HALAWAI KOMITE ELELE HUI LIBERALA. --- E halawai ana na Komite Elele o ka Aoao Lahui Hawaii Liberala, ma ke keena o Hon. J. Nawahi, i keia ahiahi hora 7:30, kihi o na alanui Alakea me Moi.
Ma ke Kauoha.
_____________
Nui ka hanakuli o keia mau po i ka hukihuki kaula.
I nehinei i niau aku ai ke Kinau no kona mau awa mau o Hawaii.
Ma ka Poakahi nei, ua hoopai ka Lunakanawai o ka Aha Hoomalu, he umikumamaha poe ona rama.
Ua hoopaiia o Andrew, no ka loaa ana aku o kekahi pahi hou kanaka i kona poli. He umi dala ka hoopai.
Ua hiolo iho la kekahi wahi o ke alanui pali a koe he wahi uuku no ka poe mea lio e hele ai. Pomaikai i ka poe hele ole i ka wa i hiolo ai, ina ua pilikia ia.
Ma ka po Poakahi nei, ua houheneia aku e ka bana o Sana Lui he mau leo mele, a ua paa aku la ma ka papa leo mele o ka pahu hookalakupua Ponogarapa.
O kela pake nana i aihue ae na mea liilii o ka hale laau o Hobron me Newman. aole oia i hopu ia, oiai hoi na hoopukaia ka palapala hopu. a ua lele e nae ka manu, a eia ka na makai ke imi nei; pela ao ana hoi o Pali.
E! Kau! Makemake no nae paha oe e ike ia Samesona, ka naita kaulana loa o ka Baibala i haulehia ai i na mapuna wai meii a Delila @ Holo hoi ka kaua i Waikiki-kai i ke ahiahi o ka la apopop he nui aku no ka koe, e ike maka no ka pono.
Ua loheia mai nei, ua kakau ia aku mai nei aku, kekahi leta i na mana o Kina. no ka hana a kekahi mau Agena o na pake limahana i laweia mai nei i ko kakou mau mahiko, oia hoi na limahana o ka moku Pactolus i lawe mai ai. Ua kipaku ino loa ia aku la ka ohana o keia pake Agena mai ka hale ae, a ua laweia mai la ka waiwai e ke aupuni, ma ke kauoha a na Lunakanawai. Hoomaopopo ae la makou i ka olelo a kekahi pake i hai mai ai ia makou. @mahope oukou lohe pau loa kela ohana kela pake hana ia ma Kina.
Oiai kekahi wahine pake e hoi ana ma ke kahawai o Waiawa, ua lilo aku la kana keiki i ka wai a pau ka ike ia ana. Ua noke ka imi aole he loaa iki.
Ma ke kakahiaka o nehinei, i hoohuiia ai i hookahi wai o ka like o Kapena C. J. Brugurie o ka moku kiapa Pphir, me Miss Grace Rose. kaikamahine a Mr. S. B. Rose. Ma ke ahiahi ana iho i kau aku ai laua ma ka Ophir no Kikane.
Ma Kohala, oiai kekahi kanaka e paa ana i kekahi pu i piha me ka lu, ua hoana aku la nae oia e ki i kekahi wahine me ka ike ole nae, ua kani aku la nae ka pu, a ku aku la ka wahine ma ka lima a ma ka puhaka. Ua hiki ae ke kauka aupuni malaila, a ua weheia ka lu mai kahi i pomo ai. O ka mea ki pu nae, ua hoopaaia oia ma kahi paa a hiki i ka oluolu ana o ka mea ana i ki ai, alaila hana ia aku lau a imua o ke kanawai. E akahele i ka lawelawe ana i na mea make.
____________
A. HERING. M. PAULY
Ka Hale Hana Novelty.
E lawe no laua a e hana i na ano hana kalai a hana hoonihoniho ma ka laau a ma ka niho palaoa paha; hoohinuhinu a anaanai ana a mania na pupu a me kukui, a me na pena hoonani o na kaupoku o na rumi; hooponopono hou, hoomaemae ana o na pila, na pu, na mea kaupaona a mea mama oia ano.
NA HANA MEA UWILA, NA HANA MEKINI, A ME HANA LAKA.
E hana ia no na kuui, na ana kii, a pela aku, e like me ke kauoha.
E hele mai io maua.
132 Alanui Papu, Honolulu 335-tf-d
___________
Aila Kuai.
______
E LOAA NO MA KAHI O
J. F. COLBURN.
(KEONI KOLOBANA.)
Ma ke Kihi o na Alanui Nuuanu me Moi.
_____
E loaa no no ke kumukuai haahaa loa o $2.50 o ka pahu. Hele mai hookahi, hele mai elua, hele mai no a pau.
Ko oukou hoaloha,
J. F. COLBURN.
Honolulu, Iulai 8, 1891. 232 dtf
_____________
O kahi Emi Loa
-A ME-
Kahi Kupono loa
E PA’I AI OE I KOU
KII,
AIA NO IA MA KE
KEENA PA’I KII ALOHA!
(Alanui Nuuanu, ma kekahi aoao mai o Ema Hale).
_____
E pa’i ia ana na Kii o na ano a pau
e laa hoi na kii puulu o ka oha-
na, na keiki, na bebe, na
hale noho, na papa-ai-na luau, a me na
kino make.
______
Na Kii hoonuiia a hoonui ia mai paha mai na Kii e ae!
______
Nolaila, mai poina i ke pa’i ana i ko oukou mau Kii ma ke KEENA PA’I KII ALOHA. e loaa ana ia oukou na Kii maikai loa me ke emi loa ma Hawaii nei.
THEO. P. SEVERIN: - Kapolena.
KEENA PA’I KII ALOHA, ma alanui Nuuanu me Beritania. ma o mai o Ema Hale. 324-3md
_____________
KUAI HOOPAU NUI.
_____
Mai keia manawa aku a hiki i ko Makou hoonee ana aku iloko o ko makou
HALEKUAI HOU
Ma ke Alanui Papu, - (NA HALE BURUA.
E hoolilo aku ana Makou i ko Makou waiwai a pau o na ano Lole:
NA LOLE NANI,
NA LOLE I HUMUIA,
KAPU A ME PAPALE
PAHU LOLE, a pela @
No na Uku Hooemi Loa Nae.
Egan & Gunn.
ALANUI MOI kokoke i ke ALANUI PAPU. tf-d.
_______________
Na Paikini Hou
Na Paikini Hou
O NA ANO A PAU, E KINIKOHU AI O KE ANO AHIAHI, E LOAA NO MA KAHI—
Chas. J. Fishels,
KIHI O ALANUI PAPU A ME HOTELE,
Ko makou halekuai hoopau nui, ma o Mr. Chas. J. Fishels la, he mau waiwai hou loa ko makou, I loaa mai nei mai ka bikina mai, o na ano like ole he nui wale. Eia ma ko makou halekuai nei na paa lole e linohau ai o na Keonimana, a luhiehu o na Lede, na aulii o na Kamalii-
Na KINAMU Na ALAPIA
Na KALAKOA Malina Na KIHEI Silika
NANAHE o na ano he nui A pela wale aku.
E huea pau ia aku ana keia mau waiwai a pau imua ou, aole hoi o oe wale o na Lede kekahi, pau pu aku hoi me na keiki, nau e wae nou iho i na anoai a kou puuwai, eia ka papa lohi o Apua la, ke anapa nei ka wai liula i Mana.
E hele mai i hookahi, e hele mai no a pau loa, mai ke nui a ka liilii.
Chas. J. Fishels.
350-tfd. Halekuai alakai o na kumukuai haahaa loa.
_______________
He Kuai Makana ma ka La Kulaia
MA KAHI O :
N. S. SACHS – Helu 104, ALANUI PAPU, HONOLUKU;
NA WAIWAI O KELA A ME KEIA ANO NO KA LA KULAIA.
Ina e makemake na mea a pau e loaa ona mau paikini hou, ma ke kumukuai haahaa o na ano like ole he nui, o kela aulii a me keia aulii.
No ka la Karikimaka a me ka Makahikihou, e kipa ae ma ka Halekuai Alakai o na kumukuai emi loa.
NA WAIWAI HOU! NA WAIWAI HOU, ILOKO O NA MAHELE LIKE OLE HE NUI O KELA A ME KEIA ANO NA MEA PAANI A ME NA KII BEPE-E HAAWI WALE IA AKU ANA, E HAAWI WALE IA AKU ANA NO.
I ka poe a pau e kuai mai ana ma keia Halekuai, i oi aku mamua o ka $2.50. No kau makemakemake i papale hou ke Karikimaka, e loaa no maanei, na papale milolii o na kamalii ua hele a ku ke ahua no na La Kulaia, o ke keokeo, o ka elelele a me na ano a pau. E wae aku i ka iini a loko i na hihipe’a like ole o na ano a pau.
----------: N. S. SACHS:-----------
318-dtf. 104. Alanui Papu, Honolulu
______________
HOOLAHA HOU
_____
E ALA, E ALA.
_____
B. F. EHLERS & Co – PAINAPA
_____
HELU 99 Alanui Papu.
E NA MAKAMAKA maikai, e naue hou mai e ike ia ia PAINAPA (B. F. Ehlers & Co.,) oiai, e wehe ana ko makou mau puka i ka po, mai keia manawa aku a hiki i ka Hape Nuia. Nolaila, e naue mai oukou a pau mai ke nui a ka liihi, e ike i na mea hou o kela a me keia ano. Merry Christmas oukou a pau! Eo mua no @ PAINAPA.
E kipa mai e na makamaka, i hoopau ia ai ko oukou kanai @ no ka makou kuai hoopoho aku ia oukou. Owau me ka oiaio,
B. F. EHLERS & Co.