Ka Leo o ka Lahui, Volume II, Number 627, 23 January 1893 — KA MOOLELO O HIIAKAIKAPOLIOPELE. [ARTICLE]

KA MOOLELO O HIIAKAIKAPOLIOPELE.

I HOOPONOPONOIA MAI KA POE KAHIKO MAI A ME KA POE I HOOPAA I NA MOOLELO A ME NA KAAO KAHIKO O HAWAIINEI, E JNO. E. BUSH A ME S. PAALUHI.

O ko Pele manawa no ia i hoouna aku ai i keia mau kaikunane ona, he mau kaikunane akua keia o Pele, oia o Neheiluna, Neheilalo, Uuina a me Paapaaina, e hele e kokua ia Hiiaka ma, a oia ko lakou wa i hele aku ai a hakaka nui iho la me Panaewa a hiki i ko lakou lanakila ana maluna o Panaewa. I ko Hiiaka ma ike ana ua lanakila oia maluna o Panaewa kona hoa paio, oia kona wa i oli aku ai i keia kau: O Panaewa nui mokulehua, Ohia kapu hao'eo'e i ka lani. Ka lehua ula, i ka wilia e ka manu A ua po—e, Po wale Hilo i ka uwahi o kuu aina Ola ia kini ke a nei ke ahi, O ko Puna kuahiwi no ia o ke ahi-a. Hala ae la ia puu make o ua Hiiaka nei, me kona manao e loaa hou ole ana he pilikia hou, aka ma kahi o kona manao ana ua lanakila oia, oia no ka manawa hookahi o ke koko hookalakupua o ua Panaewa nei i pii ae ai a halana pu ia iho la lakou a kokoke e nalowale i i koko. Ike mai la o Pele i keia pilikia

hou o kona kaikaina Hiiaka, nolaila, ua hoouna mai la oia i keia mau kaikunane o laua, oia o Kauilanimakaehaikalanl, Kamohoalii, Kahuila o ka lani a me Kaowakaokalani, me kona kauoha pu mai e hele oukou e kokua i ka pokii o kakou ia Hiiaka, eia iho iloko o Panaewa kahi i au ai iloko o ke koko. I ka lohe ana o na kaikunane i ka pilikia o ko lakou pokii kaikuahine, oia ko lakou manawa i hana aku ai e like me ka mana i loaa ia lakou. Hakui iho la ka hekili olapa ae la ka uwila, ne-i ke olai, ua iho la ka ua a kahe mai la ka wai ma kahi a Panaewa e noho ana, a pulumi ia aku la na mea a pau a o Panaewa pu kekahi. Lawe ia aku la o Panaewa e ka wai a paa i kekahi omoku laau, oia ka wa o ua Panaewa nei i kauoha mai ai ia Hiiaka e ola oia. Pane aku la o Hiiaka penei: Auhea oe e Panaewa, aohe oe e ola ana, no ka mea he hana lapuwale hoi kau ia'u, nolaila e pono no oe e make, a pela i make ai o Panaewa. Hoomaka hou aku la o Hiiaka ma e hele a hiki lakou i Paieie, a ike aku nei o Wahineomao 1 ka huakai wahine mamua o lakou nei. Olelo aku la o Wahineomao ia Hiiaka: E Hiiaka he huakai wahine keia mamua o kakou. Hoole mai la o Hiiaka, aolo ia he huakai wahine maoli, aka he huakai akua kena no uka o Paliuli. Hele no ua huakai nei mamua a mahope aku no lakou nei, a hiki lakou nei i Ohiakupakoili. hala ae nei kekahi hapa o ka huakai mahope o lakou nei.