Ka Leo o ka Lahui, Volume II, Number 660, 13 March 1893 — Ke Kaena ana Nupepa o Amerika. KA UI KILAKILA O HAWAII. KE KAMA ALIIWAHINE VITORIA KAIULANI. [ARTICLE]

Ke Kaena ana Nupepa o Amerika.

KA UI KILAKILA O HAWAII.

KE KAMA ALIIWAHINE VITORIA KAIULANI.

Pali ke kua Mahina ke alo. No ka Hiwahiwa o Paliuli. Nui ka hookeke o na kanaka o Nu Ioka e ike lihi wale mai iaia. Ua piha na nupepa o Amerika i na hoike mahalo no ka Hooilina o ke Kalaunu o Hawaii nei; a penei kekahi mau mea i hoikeia nona. He Kama Aliiwahine Ui. He umikumamawalu na makahiki o ke Kama Aliiwahine; he wahine opio ui kilakila oia, he hiona nani, me na papalina lahilahi. He mau maka weo palupalu kona, he hiona hauoli hoi, e hoike mai ana, i ka ui pookela o na Hawaii.