Ka Leo o ka Lahui, Volume II, Number 666, 21 March 1893 — HE INOA NO KALANINUIAHILAPALAPA. [ARTICLE]

HE INOA NO KALANINUIAHILAPALAPA.

A he Wehi keia no Kaiulani No ka Wohi kukahi lei a Kapili A he pua Loke no Ainahau Maoli Iliahi no Hawaii Opuu liko hou no ka Hikina No ka La hiki mai ma Kumukahi Hookahi mea hou ua lono ia Ma ke Kapikala nani a o Honolulu A he lono Lanakila no ka Lahui Me ka noho Kalaunu a o na Lani Ua kui e ka lohe puni ke Kaona Ua mau e ka Ea o ka Aina Welo haaheo e ka Hae Hawaii Ma na welelau a o ka Honua Aohe hana e a ka puuwai A e pauma nei me ke aloha Ua piha ka manao i ka uilani No ka lono hauoli ua hiki mai I lawea mai nei e ka Monowai Nene aukai a o ka moana Nawai no la e pakele aku A he hana noii na ka imi loa He loaa i ka welelau lihilihi I ke kii hooheno a ka onohi He Onohi pua ia no ke Kalaunu A he lei no Kalani puuwai Kila Kilakila kapukapu ke ike aku Ka hiona o Kalaniahilapalapa Me he pua hau ala no Maluaka Ka popohe ohaoha i ka lihi wai Nawai e ole hooheno ia A he liko Ahihi no Panaewa Aia i ka nua lehua o Hilo Ka paia aala i ka uka o Puna Ko leo e Kalani kuu i ka nahe Kaili puuwai ke lohe aku Pupukanioe no ke kuahiwi Kahuli leo lea no kanahele Ua nani hiehie oe e Kahiwa E ka Wohi kukahi a o Hawaii Haina ko Wehi kau i ka Hano O Kawekiulani kuu Haku ia. Miss Kekoaohiwaikalani, Puahaulani Hale. Mar. 11 1893.