Ka Leo o ka Lahui, Volume II, Number 846, 3 January 1894 — Ka hanau kamahao ana mai o Laukaieie me kona hanau mui i kaikunane. [ARTICLE]

KA HANAU KAMAHAO ANA MAI O LAUKAIEIE ME KONA HANAU MUI I KAIKUNANE.

I keia wa e nahunahu nei o Kaholoakuaiwa, ua puka mai la ka inaina, me ka nana pono ole ia iho no nae o ia mea; a aole no hoi he

mau ouli a ano kahoaka e ae e haupu ae ai he mea kino pahaohao keia, ua kapae loa ia aku ia mea me ka hoomaopopo ole ia aku, aka aia nae ke nana ia mai la e kekahi mau mana kupua, e hoolilo i kino ano kaikamahine lau nahelehele noho kuahiwi, nolaila ua lawe ia aku keia mea e Koaekea, a hoolei ia aku la iloko o ke kiowai ma ke kahawai, a oia ka manawa i hoopunana iho ai o ka Punohu Ua-ko-ko maluna o ka wai me he uhane ala no ke Akua, a oia hoi kau e ka mea heluhelu e huli aku ai a nana i ka olelo o ka Buke Nui, "hoopunana iho la ka Uhane o ke Akua maluna o ka wai," aole anei ua like loa keia moolelo me ia ? I keia lawe ia ana o ka inaina e hoolei i ka wai, ua "hohia" aku la na pono lau Lipoa apau e kela mana eepa i ike ole ia e Koaekea ma, a iaia i hoi mai ai a hiki i ka hale, ua lohe ia aku la he halulu iloko o ke ao polohiwa, a poha mai la na leo ne-i nakolokolo o ka hekili, me he la ua kokoke mai i ka hopena o na mea ola uhane a pau, ka uwila hoi e hu'epau ana i kana hana ikea he ku maoli no i ka weliweli a me ka hoomakaukau na hiohiona a ke Akua i hoike mai ai ia mau minute. Ua hoomau ia kela mau haawi- na mai ia manawa aku a hiki i ka uhi ana mai o ka po, a o ka lima ia o na po o ke kau ana o ka mahina, a o ka po ia o Kukolu, ke helu ia mai ke ahiahi aku i kau ai o Hilo, a oia ka kou mea kakau i hoomanao ae ai i keia mau wahi lalani mele: "Na po mahina keia E hoomanao ae ia Hilo Kukahi, Kulua, Kukolu, O ka ua-koko kai ka moana O ka punohu ula i ka wai O ka'u ia la i lohe oe." I keia manawa a ka hekili a me ka uwila e nakolokolo nei a mao ae, he wa ia no ke kuakoko e amaamau ana, a oia no hoi ke kuakoko hope loa, aia hoi ua oili mai la he keikikane maikai, me ka maalahi loa o kona mama, a hanu ae la oia i na ea o keia ao, a ua piha loa ia ka makuakane o ke kamaiki no ka oili ana mai o ka mea ana e hiaai mau ana i kela a me keia manawa, a no kona makemake no hoi e hooko i kana i olelo mua ai i kana wahine. Aole wale oia kai komo iloko oia haawina, aka o lakou no a pau, a mahope iho o ka makaukau ana o na mea a pau, oia ka manawa o Koaekea i kapa iho ai i ka inoa o ke keiki o Hiilawe, a oia ka mea i oleloia ai, "hoaiai ana ka wai o Hiilawe iluna." Mahope iho o ka hoomaemae ana o Kaholoakuaiwa, ua ulu ae la ka manao iloko o Pokahi, e noi aku i kona kaikunane nana ke keiki, a no ka hiki ole iaia ke uumi iho i kona manao, nolaila, ua noi okoa aku la no oia imua o kona hanau mua, me kona manao kuhihewa e hooko ia ana la hoi, ia makemake ona.