Ka Leo o ka Lahui, Volume II, Number 974, 2 July 1894 — HE LEO KAHEA. [ARTICLE]

HE LEO KAHEA.

E ala mai e na Hawaii poiioi, na na wahine, na opio aloha aina, a e hoike i ko ke ao, i kou aloha aina oiaio, i ko oukou makee i ko oukou mau pono aupuni kahiko malalo o na 'lii mai ka po mai. Ua hiki mai ka wa e a koakoa ai kakou me ka maluhia e hoike i ko kakou apono ole i na mea i hana ia e ko kakou mau luna hoomalu a hoopono aupuni, a me ka lakou e manao nei e hana aku, oia hoi e kukala i ke kahi Kumukanawai no Hawaii e hoololi ana i ke ano o ko kakou ano aupuni a kekahi ano hou aku a kakou i makemake ole ai. E like me ka olelo hooholo a ka Aha Senate o Amerika. aia i ka lekulehu o Hawaii nei ke kuleana kaokoa e kukulu a e malama aku i ke ano a me ka hookele ana o ke aupuui a lakou i makemake ai, me ke kuleana ole e

keakea ia mai ai e na mana aupuni e ae, nolaila ke poloai ia aku nei oukou a pau e hele mai i keia ahi ahi e hoike i ko oukou manao me ke kuokoa. e like me ke kahea a ka Hui Hawaii Aloha Aina. He wa kupono keia, a he wa nohoi e hooko ia ai ke ake nui o keia lahui, i hoouluulu ia iho nei e halawai mamua aku nei, e hele mai ai, oiai ua loaa ke kumu, a ua akaka ke alanui.