Ka Leo o ka Lahui, Volume II, Number 1060, 5 November 1894 — Ua Mokuahoha Lakou. [ARTICLE]

Ua Mokuahoha Lakou.

O keia ka mea i ike ia no ka aoao hoohui aina a me ka poe repubalike. Aole he like ko lakou manao i keia la, no ka mea, ua like ole no mai kinohi mai o ka lakou mau hana hookahuli aina. Ua hoomao popo mua no makou i ke ano o na makua o ka hookahuli aupuni, oia

hoi na mamo misionari a me na haole kuko hoohui aina. He okoa ka makemake o na mamo misionari he aupuni no lakou iho, a he okoa hoi ko ka poe hoohui ana, aka i ka hookumu ia ana o ka hana, ua uhiuhi ia ka makemake o ka poe misionari malalo o ka hoohui aina. No ka haule ana o kumuhana ua hoololi ae nei lakou i ke ano aupuni repubalika kuokoa, no lakou iho, me ka ae ole ana mai o ka lahui. No keia kumu ke mokuahana nei lakou, a ua hoonawaliwali loa ia ke kulana o ka poe e puliki nei i ka mana aupuni no lakou iho me ke kuleana ku ole i ka pono. Eia ke hilahila nei kekahi o lakou a ke loli nei ka manao, a olelo iho ua aho no e hoi i ke aupuni moi, ina e huikala ia aku ana lakou.