Ka Lei Rose o Hawaii, Volume I, Number 9, 15 June 1898 — Page 3
3
KA MOOLELO
O NA
KEIKI ALII AUWANA
Elua
Nolaila, ua lilo i mea maa i keia aina iloko o ia au o ka honua nei, na ia holoholona e huli, e like iho la me ke Keiki alii i imi ia aku la a loaa iloko o ka waonahele a o ka mea a ua lio ihu nui la e hopu aku ai a ahai, ua manao ia, oia ka mea a ke Akua i koho mai ai no kekahi hana ano nui o ke aupuni. Nolaila, o ka ninau nui imua o ke aupuni i kela wa , ma ke ano he ninau lahui. E noho wale anei ka Hooilina Moi o ke Aupuni, aole e male i ke kane, a i ole ia , e male paha i ke kane? Nolaila, ua lilo i ninau pili aupuni, a mamuli o ka loaa ole o kekahi Keikialii iloko o k a aina i piha pono kona koko alii iloko o ka aina, nolaila, ua haawiia ka mana na ka Hipopotamu e huli i kane, a i wahine paha, iwaena o na keiki alii o na aina e, a o ka mea e loaa ana i ua lio la, ua manao ia, oia ka mea a ke Akua i koho mai ma na ninau o ia ano.
Nolaila, i ka wa i hooholo ai na 'lii a me ko ka Moi Aha Kuka Malu, oia ka wa o keia lio ihu nui i hoouna ia ai, ma kona ano he holoholona helu ekahi o ka ikaika, ka naauao, a hoolohe pono ina kauoha e like loa me ko ke kanaka ano. Nolaila, a hiki iho la i ka wa a ke Keikialii i kailiia mai ai, mai ka ululaau mai, oiai laua e auana hele ana. Ua hopu ia iho la oia e ka lio ihu nui, a i ku like ai me kela leo ohumuhumu a na manu eleele elua, nolaila, o ka hooko ia ana keia o kela mau olelo a na manu eleele i ohumu ai.
E na makamaka, e huli hou ae kakou a nana ihope i ke kaikaina e naauauwa hele la i ka waonahele, me ka uwe na ole i ke aloha i kona kaikuaana. Ia hala ana aku la o ke kaikuaana me ka lio ihu nui, noke iho la keia i ke kahea i ke kaikuaana, me ka naku hele ana i o a ianei me ko ia nei uwe naauauwa ana, hele mai la ko ia nei aloha a aole i kana mai, ua manao keia, ua pau paha i ka liona, a tiga paha, a mau holoholona e ae paha. Ua kukuli iho keia a pule aku la imua o ke Akua no kona kaikuaana ana, oiai oia e pule ana me na huapule i ku i ke aloha imua o ke Akua, kani ana ka poho o ka upoi ana o na eheu o ka manu Canhor, he manu poo ulaula keia i like kona nui me ka Aeko gula o Mauna Pohaku, aole i amane na huapule a ke Keiki alii, lilo ana keia i ka lewa, i nana iho ko ia nei hana, ua hapalua like keia o ka lewa, aia hoi laua ke lele nei me ka mama nui me ka maopopo ole o ko laua wahi e lele nei.
Pela ko laua nei lele hele ana a hiki wale no i ka wa i uhi mai ai ka pouli maluna o ka ili o ka honua, ia po a ao ae hiki ana laua nei maluna pono o kekahi kulanakauhale nui pena keokeo, oia hoi, he koekoe wale no ke pena o Kauhale, he keu a ka nani ke nana iho oe maluna iho, aohe i upu iho, ike iho la keia i keia hale nui me he aniani la, ua hele na kanaka a hewa i ka wai a naholo hele ana i o a ianei, e nana ana, a e kuhi ana hoi na lima iluna i kahi a laua nei e lele iho ana e kuu, ia kuu ana iho o ua manu nei i ka honua, ua noke mai la na kanaka i ka uwa, o kahi a laua nei i kuu iho ai, o ke alo no ia o ka Hale Aupuni, ia wa i hele mai ai na kuhina a me na luna aupuni kiekie a hookipa ia aku la keia iloko o kekahi rumi nani o ka hale aupuni a lawe ia aku la keia a hoonoho ia ae la maluna o kekahi noho kiekie me ka hoailona alii e waiho ana iluna o kekahi pakaukau nui imua o ko ia nei alo, a heluhelu ia mai la kekahi palapala hookohu imua ona e kekahi kanaka me ka aahu loihi silika eleele a me ka lanoho ku'i.
Aole i pau.