Ka Malamalama Hawaii, Volume I, Number 11, 15 July 1898 — Page 3
3
KA MOOLELO
O KA
Mea Hanohano ke 'Lii
J. A. CUMMINS
KEONI KAMAKI
KEIKI PAPA O WAIMANALO
[Hoomau ia.]
I ka la 30 o Okatoba o ia makahiki no, haalele iho la maua ia Kapalakiko no Honolulu nei maluna o ka moku kiapa Comet, Kapena Smith, a ua kau pu mai me makou ma ia kalepa hookahi, ka Bihopa Stanley a me kona ohana, Rev. Geo. Mason me kona ohana, Rev. Ebbitson me ka lakou poe kauwa.
Mai Pelekane mai keia mau malihini a pau, he hookahi iho no la o ko lakou hiki ana mai Panama mai i Kapalakiko, mamua iho o ko makou haalele ana aku i ka Ipuka Gula o Kaleponi. O keia ka Bihopa mua loa o ka Ekalesia Bihopa Enelani i hiki mai i Hawaii nei, ma ke ano Misionari no ia hoomana.
Ua olelo ia, o keia ka aoao hoomana a Vanekouva i olelo aku ai ia Kamehameha,—e noho oe, a hoouna mai au i na Kumu Misionari no kou lahui; e kuhikuhi pono ia oe, a me kou lahuikanaka ia Iehova i ke Akua oiaio, nana i hana i ka lani me ka honua; aka, mamuli o ka nui o na pilikia i loaa ia Enelani no ke kaua, oiai, aia o Enelani e kaua ana me na mana aupuni a pau o Europa a me Amerika.
Nolaila, ua ulolohi loa ka manawa a hiki mai la na makua Misionari mai Bosetona, Amerika, mamuli o ka Opukahaia mau hoakaka e pili ana i kona aloha i kona lahui, e noho ana iloko o ka pouli me ka naaupo.
Pela no hoi, ua oleloia, mamuli o keia kumu hookahi ka holo ana o ka Moi Liholiho 1. me kana Moiwahine ui nani Kamamalu a make ai i Enelani. Nolaila i ke au ia Alexander Iolani Liholiho, ua hiki mai la keia mau Misionari Bihopa Enelani, a ua huli ka Moi a me ka Moiwahine, me kekahi poe koikoi o ka aina a me na ohua 'lii he nui wale me ka manaoio.
He Ekalesia ku no hoi keia i ka hanohano a ilihia, ma ke ano o kona mau lawelawe ia ana o na anaina haipule me ka ihiihi.
He 11 na la o makou ma ia holo ana mai, ua hiki makou i Honolulu nei. Ia hiki hiki ana mai la no, o ka hoi koke no ia i Waimanalo a lawelawe i ka hana e like me ka mau.
Ua haawi iho au he ahaaina luau kuni bibi nui i Waimanalo, a ilaila ke 'lii ka Moi Lot Kapuaiwa Kamehameha V. a me ka Bihopa Staley, me kekahi mau poe hanohano o ke kaona nei a me na wahi a pau. Ua noa keia ahaaina i na mea a pau, mai ka poe kiekie a ka poe haahaa, he 4 la ka ahaaina ana, a he nui na ano lealea i malama ia, oia hoi ka ho-a bibi, ka hoohei bibi, ke kuni bibi, a me na hana lealea e ae a pau i pili ia ano oihana.
Malaila no hoi i hoikeike iho ai na keiki akamai a pau o kela me keia wahi, i hiki mai i ko lakou akamai i ka oniu kipuka kaula ili, na hule Hawaii, a me na lealea o na ano a pau.
Aole i pau.