Ka Malamalama Hawaii, Volume I, Number 12, 1 August 1898 — Page 9

9

o na kumuhana pili koho balota iloko nei o ka aina.
                A me na ninau laula e ae paha, e waiho ia mai ai imua o kakoui ma ke koho balota ana.—He mea pono i na kanaka Hawaii naauao a pau, e ala like mai, a e kukulu i keia hana, i loaa ai ia kakou ka hui kalaiaina, a he wahi hoi e ui ia mai ai na ninau pili Aupuni, a politika paha, a mau kumu hana e ae paha iloko o ka mana koho balota o ka Aina, i kulike me na Rula a me na Kanawai o ka Aina ma keia mua aku.
                I hiki ai hoi kakou ke ike ia mai he Ahahui a he Kahua Kalai Aupuni no ko na kanaka Hawaii, a loaa ia kakou na ui ia mai e kuleana ai kakou e launa pu aku me na Komisina hooponopono ia Hawaii e hoea mai ana.
                Nolaila, o aha ia kakou "ke wae e ae i ke pulu, oiai, a i ae ka ua a hoea mai." He wahi mea pahaohao no hoi i ko makou noonoo ka hiki ole ana ia kakeu e kukulu ae i keia kumuhana ano nui no ko kakou pono, ko na kanaka Hawaii. Eia iho no na kanaka Hawaii naauao a nui wale ke noho pu wale mai nei no. He poe a makou e hiki ai ke olelo ae ma ka olelo Farani, o ka "Crem de la Crem'' o Hawaii nei, i keia mau la ma ko lakou kulana naauao, e like paha me W. C. Achi, S. K. Ka-ne, Antone Rosa, Jno. Colburn, J. M. Poepoe, J. K. Kahookano, E. Johnson, R. W. Wilcox, S. M. Kaaukai, J. K. Kaulia, J, K. Kaunamano, A. Fornandes, R. H. Baker, Jno. Baker, D. K. Baker, F. J. Testa, J. K. Kanakanui, a me na elemakule no hoi o ka Hui Kalaiaina makua, a me kekahi poe naauao e ae e noho mai nei a puni ka Aina—He mea pono e kukulu koke ae i keia hana, he mau la helu wale no koe, a hiki mai ua mau la hana nui la, e loaa ai ia kakou he kuleana e kaana pu ai kakou no ko kakou mau pono me na Komisina hooponopono pili Aupuni Hawaii, ina nae kakou e kukulu ana a ku io ia mea he Hui Kalaiaina nui, a, he kiko waena politika hoi na ka Lahui Hawaii, alaila, e haaheo auanei kakou i ka loaa ana ia kakou he ui a he ninau ia ana mai me kekahi mau ninau ano nui e pili ana ia kakou ma na mea pili kalaiaina. O na poe kupono wale no i ko makou manao ana oia no na opio i lilo i mau alakai no ka lahui, a e lilo lakou i mau Alihikaua kalaiaina no Hawaii, aole pono ia kakou ke hoopauha i keia hana, a hoopalaleha o mau ko kakou hooiloilo mau ia e like me kekahi mau hana e ae a na  kanaka Hawaii e hana ai me ka haule wale.
                Nolaila, ke paipai aku nei makou ia kakou i keia, i ku ai kakou maluna o keia olelo naauao a kakou o ka wa kahiko,—"Iluna no ka ua wae e ke pulu." Eia hoi kekahi i keia wa , aohe o kakou mau aoao pili Aupuni. Aohe aoao P. G. aohe poao Aloha Aina, na ka hae Amerika i hoohui ia kakou i hookahi, a nolaila o ka kakou hana wale no, o ke kukulu ana i Ahahui nui Kalaiaina, a i kiko waena hoi no na ninau pili aupuni a pili Lahui kuloko hoi, me ka manaolana e ui a e ninau ia mai ana paha ia kakou ma o keia Hui 'la owai la ke kanaka, a mau kanaka Hawaii kupono paha no ka lawelawe ana i kekahi mau oihana kupono iloko o ke Aupuni. (L. H.)

Fiva Lenalena i na Pualikoa Amerika

                Wakinekona. Iulai 13—E like me na lono i loaa mai, ua pahola ae ka ma'i fiva lenalena iwaena o na pualikoa Amerika iloko o Kuba, a ua hoopuiwa nui ia ke Keena Kaua o Wakinekona no keia lono kaumaha i pahola ae iwaena o kona mau pualikoa, oiai malalo o ka hooko kauoha e pili ana i ko Amerika inoa hanohano iluna o ke kahuakaua. Eia ka hoike a ke kauka alakai o na pualikoa ma ke kulanakauhale o Sanatiago me keia mau olelo :
Sanatiago, Iulai 11.
                "Ua loaa mai ke telegarapa mai a Lutanela Konela Pope mai o na pualikoa o Kenela Stofer, e hoike mai ana ia'u i ka lono kaumaha 14 poe i loaa i ka fiva lenalena iloko o na balemai pualikoa, a ke haawiia nei ka makaala a me na lapaau ana malalo o ke kulana mikiala no ka hiki ke loaa ke ola kino maikai me ka palekana.''
G. M. STERNBERG ,
Kauka Kenela o na Pualikoa Amerika.

                Mai ka wa i lohe ia mai ai ka hoohuiaina a hiki i keia la, aole i ike nui ia aku na hoohiwahiwa a me na haawi ahaaina ana ma ka aoao o ka poe hoohuiaina. Mamua hoi, mea iho ka hoohui, mea ae ka hoohui; i loaa mai nei ka hana o ka hoohui, mumule loa. I ko makou manao, e hauoli ana la hoi kakou malalo o na lilo o ke aupuni no ka hooheiaina.