Ka Makaainana, Volume I, Number 2, 8 January 1894 — Page 4

HONOLULU, OAHU, POAKAHI, IANUARI 8, 1894.

KA MAKAAINANA.

W. H. KAPU,
Luna Nui a Lunahooponopono.
F. J. TESTA (Hoke),
POAKAHI, IANUARI 8, 1894
NO KO MAKOU INOA.

He mau nema kakaikahi ka i loaa a i laweia mai hoi i o makou nei no ka inoa a makou e auamo hou nei o KA MAKAAINANA. O ia kanikani ana, he mea ole ia ia makou, oiai, ua paa loa ka makou olelo hooholo no keia hoololiia ana o ko makou inoa. Ua hoikeia mai no hoi makou mamuli ka o keia hoololi ana, ua waiho mai kahi poe i ka lawe ana i ka nupepa. Me ia poe no ia, o lakou no ka i kuleana i ko lakou manao, a pela mai no hoi me makou i ka makou i hoaiai mua aku ai no ma na helu hope elua o "Ka Lei Momi." Maikai no kela makee ana no ka inoa, a ke mahalo aku nei makou, aka, aole loa ia he mea e hoololi ae ai i ko makou manao.
          Ke hoike aku nei hoi makou he mea ole wale no ia mau nema ana mai a ia poe kakaikahi, no ka mea, ua pa-lima a oi aku na poe hou loa i lawe i keia nupepa ma kahi o ia poe i waiho mai la, ma Honolulu nei, koe aku ko na apana e ae, me ka manaolana no e oi loa aku ana, alaila, manao ae kahi ola o ka luhi a me ka hoomanawanui ana. Aka, o na lawe olelo ana no ka mahae lua ka o na makaainana, he mahele he poe hoohuiaina a he aloha aina hoi kahi mahele, a nolaila ka i maopopo ole ai no ka mahele hea la KA MAKAAINANA nei. Ae, pela io no paha ua mahae lua io, eia nae, he hapauuku loa ma ka aoao e ae ana e hoolilo aku i ka aina nei no kahi maunu piepieleia mai.
            Mai ko makou hoaiai mua ana aku no ka manao hoololi, aohe mau manao kue i kuia mai me makou, o ka mahalo wale no, a ua hooia aku hoi makou e hoomauia aku ana no na kalaimanao ana ma ke kahua mua no. Nolaila, ke hooia hou aku nei no makou aole makou no ka mahele hapauuku o ka hoohuiaina, aka, aia makou ma ka aoao o ka hapanui, a he wahaolelo hoi KA MAKAAINANA nei no ka makee i ke Alii, a no ke aloha hoi i ka aina kulaiwi a me ka lahui oiwi. A maluna hoi o na mea a pau loa, e paio mau aku ana no makou no Hawaii i na manawa a pau, aohe wa e kuhau iho ai, a e hoolilo aku hoi i na nemaia mai e puehu liilii aku i ka makani ma na pea a pau.

"HUAI KA ULU O LELE."

Ma ka helu i hala i hoaiai aku ai KA MAKAAINANA nei no na mea pili ana i ka Peresidena Kalivilana pane i ka Ahaolelo o kona Aupuni a me na mea hoi i hanaia e pili ana i ka ninau o Hawaii nei. Aohe hoohewahewa ana i ke kaona o ke mele a i ka puana hoi a ka moe. Ua akaka loa ua eo i na oiwi ka pono, a o ka hoomanawanui no ka pono, e like no me ka pauaho ole i na malama i aneane loa e piha ka makahiki o ke ku kamehai ana o keia au oehaa. Aohe no e nele ana ko Peresidena Kalivilana kakooia mai e na mahele a elua o ka Ahaolelo o ka Repubalika nui hookahi ma ke ao nei.

Mimihi nae na poe kue no ko Peresidena Kali vilona kauoha ole ana me ka limaikaika e hookoia ai kana olelo hooholo o ka hoihoi hou ae i ke Aliiaimoku a kona kuleana i kaihi limanui ia ai, oiai, ua upu wale ia ua kauoha ka Peresidena pela, eia nae, ua ku nui i ka hoka ma ia mea. Aohe kauoha i haawiia ia Kuhina Wilisi maanei e hana aku pela.

E hoomaopopoia no hoi ma ko ka Peresidena ae ana i ko ke Aliiaimoku hoihoi hou ia, ua ae ka Repubalika nui ma ona la i ka hewa o ka mea i hanaia e kona luna maanei malalo o kona mana a me kona inoa, a oiai hoi, aia aku la i ka Ahaolelo, o ka hooia a kakoo ae kana i ka ike a manao hooko pono o kona poo alakai. O ka ike oiaio ia a ka mea i makee i ka pono, aole hoi o ka manao iho e like me ka keia poe pakaha a aihue aina, o ke kalele nui maluna o ka pono Karistiano a na makua a me na kupuna i lawe mai ai, a lakou nui no hoi i keehi iho la.

Ina no i ae ke Alii i kinohi i ke koi a ka Peresidena, ma o kona Kuhina la, aole no ia he mea e hooko koke ia ai o kona hoihoi hou ia ae ma ka Nohoalii, no ka mea, ma ka hoomaopopo ana i ke kauoha ia Kuhina Wili si, ke ae ole aku ka Moi, e hoike aku, a ina e ae, e noi aku i ke Aupuni Kuikawa e ku a e hele loa aku, a ke pane mai hoi lakou, e hoike aku no ia mau mea a pau loa, a oia no hoi ka ke Kowini i hoi puolo aku nei. Oiai, ua hoole na Pi Gi i ko lakou huikala laulaha ia, ua hala ole Amerika Huipuia ia lakou, oiai, ua ike mai la i kona hewa, a o na poe kipi hoi maanei, he poe lawelawe a hooko hana wale no lakou ma ka olelo ana. Aohe a kakou hana i koe, o ka Amerika Huipuia wale no ka kakou i koe e kali aku ai. Mai uiha a me paupauaho wale, aka, e nui ke aho no ko kakou ola o nei mua aku!

Ua ike ae no kakou aole i manao ka Peresidena e kaihi ae i ka mana hooko limaikaika me ka ae ole o ka Aha Senate, oiai, no ia Aha mana kukala kaua, a o ka Peresidena nae hoi ka Alihikaua Nui. A ua ike a hoomaopopo hou ae la no hoi kakou ua manao mua no ka Peresidena e waiho aku i kela hana a na ka Ahaolelo e hoohelo, o ka waiho aku nae hoi kana i na ike a pau i loaa aku iaia. No ke Aliiaimoku nae hoi makou e mahalo nei no kona awiwi ole aku e ae koke, me ka nana ole ae hoi i ko ka Peresidena haalele mai iaia a ia kakou, aka, ua hoole mua a mahope iho hoi o ka noonoo akahele ana, ua ae aku a hooko ai o Kuhina Wilisi i ke kauoha a ke poo o kona Aupuni.

Iloko o ka uuku a me ka pokole o ka Kuhina Wilisi palapala noi a me kana haiolelo i ka waiho ana aku i ua noi la, eia nae, ua kualehelene a loloiahili wale mai no ka pane a Peresidena Kole, e like me ia i hoolahaia ae e na wahaolelo namu o ka poai hoohuiaina. Aohe mau mea ano nui loa ma kela pane a na Pi Gi, koe wale no ko lakou hoole a kuha aku hoi i na maka o ka Peresidena o Amerika Huipuia. Ua ano okoa o mua o ke poo o ua pane la, a i ka pauku mai hoi a me ka hiu, poina honua o Kole i kona ihu a lalau okoa ka noonoo. Malia no kona ano omaimai mai i keia wa. Eia ua pane la ke kuekaaia nei i keia mau la e na wahaolalo namu o ka aoao o ka lahui, a na wahaolelo hoi o kela aoao i hauoli nui me ka painuu ae hoi i ka naauao a i ka hoohoka maopopo ia o Peresidena Kalivilana. Ae paha, e hoka ana paha ia lakou---noho nui iho no hoi a ike nui iho no hoi, o lakou nui ana no ke hoka nui ana!

Ma ka makou hoomaopopo ana hoi, o kekahi kela o na pane omali a nawaliwali haalele loa, piha hoolalau no na mea i hanaia a me ka olelo iho ina no aole na pualikoa Amerika, ina no ua kipi lakou a lanakila no. Auwe, ka pupule e! A ma ka hoopau ana hoi o ua pane la, ua walaau ae no na hana Karisto ano, ma he la o ka ninau ia a Amerika Huipuia e nana mai ai, ina paha he Karistiano a he pegana ke aupuni i hoopoinoia, aka, o ka pono wale no a me ka hanohano o kona inoa ka mea nui. A ua kalokalo ae no hoi i ko lakou kumu o ka hoole, oiai, he mana ka i loaa aku ia lakou mai na poe kakaikahi i molia nui ai i na ola no ka pono o ko lakou aoao, a oia hoi ka lakou e malama nei me ka makee. Nani ka piha haakei o keia auna! A ma ia pane no hoi, ua ike maopopo loa ia ko Kakina mau kahakahana lima a piha pakike e like no me kona ano maa mau.

Ua oleloia e malama a e hoomanao ana ka a poe Pi Gi i ka la e piha ai o ka makahiki hookahi mai ka hanauia ana o ka lakou huaolelo kamehai o ke kipi. Eia ka lakou ke lulu dala nui nei no ua la nei a hoea iho i keia pule ae, a ua loaa ka he mau haneri lehulehu. Ia lakou mai no hoi ia o ka hana ae i ka lakou mau hoomanao a hoohiwahiwa ana o ko lakou la pukaamaka loa ae ai a ikeia ai lakou he poe kipi i ke Aupuni Kumukanawai o ka Moi Liliuokalani. Me lakou mai no ia hana, ua manao nae hoi makou, he mea makehewa loa ia hauoli ana o lakou, ke malama io ia hoi, oiai, eia aku no a hoea mai ko lakou wa e wi nui ai na niho.

Aole hoi i ahu iho la ka Kakina mea o ka hoi ana mai nei, hoi hou aku la no i o, koe wale no paha ka hooholo ana o ka Ahaolelo Pi Gi e uku i kona mau lilo kaahele a pau mai o mai a mai ianei aku; aole no hoi i ku ae la ke Aupuni Repubalika; a he ole loa no hoi aole i loaa kela mano a me ka puali puhiohe no ka Hoikeike Hooilo ma Kapalakiko. Malia nae paha ua waiho iho la no i ka inai i hope nei, a na ko hope nei poe no hoi ia e hooko aku. Aohe hoi i pala iho la ka maia, aohe no hoi i ahu iho la ke ahua a me ka pala, o ka ahai koke aku la no ka hoi ia i ka pupuhi.

Eia nae, ua wawa wale ia aono ua makaukau ka he kumukanawai hou no lakou, a ua makaukau hoi na mea a pau no ke kukala ae i Aupuni Repubalika ku kaokoa, a he manawa wale no a oili ae. A ua oleloia no hoi aia a maopopo mai ka hopena o ka ninau Hawaii i ka Ahaolelo o Amerika Huipuia, a ina hoi ua kue ia manao i ua poe nei, alaila, o ka lakou hana hope loa ia o lele kikaho mai ai a kukala ae e like me ia ae la e hoonele ana hoi i ko na Hawaii kuleana ma ko lakou aina ponoi iho. Ua olelo o Peresidena Kalivilana ma kana pane i ka Ahaolelo aole ke Aupuni Kuikawa i ku kaokoa nona iho, a ua hiki ole loa hoi ia ke ikeia mai ma ia ano a e komo aku hoi iloko o na launa a luakaha ana me na aupuni e ae, oiai, he kulana manawa wale no kona. Maluna nui ana no o lakou ke hopena awahua ke hoo-