Ka Makaainana, Volume I, Number 2, 8 January 1894 — Page 7
HONOLULU, OAHU, POAKAHI, IANUARI 8, 1894 .
Hoopaiia no ka Hoeha Wahine.
Imua o ka Aha Apana i ka Poakolu i hala iho la, ua hoopai ia o W. H. Kamaki, Luna Alanul o Honolulu nei, he $10 no ka hoeha ana mauka o Kalihi, wahine a J. K. Iaukea. Ua hanaia keia hoeha mauka o Kalihi, ma ka la 29 o Novemaba, 1893, mamuli o ka hoopaapaa ana no ka pono wai, a iloko o ka inaina ua kulai aku o Uilama Kamaki ia Niau iluna o kekahi ahua pohaku, a mamuli o ia ua ehaia kona poohiwi akau, a e ole ke kauka haole, palekana ai. Ua hoohalahala o Uilama Kamaki i kela hoopai.
Hoike Make o Dekemaba.
He 55 ka nui o na make i ka malama i hala aku la, oia hoi, he 32 kane a me 23 wahine, i maheleheleia penei: Hawaii 34, Pake 7, Pukiki 6, Iapana 4, Beritania 2, a he 2 o na lahui e ae. He 13 malalo o 1 makahiki, 6 malalo o 5, 2 malalo o 20, 4 malalo o 30, 8 malalo o 40, 4 malalo o 50, 6 malalo o 60, 3 malalo o 70, a maluna aku hoi o 70, he 9. Iloko o keia heluna make he 15 poe i lawelawe lapaau ole ia. Ma ka hoohalike ana no ia malama like no elima makahiki i hala ae, penei iho ia; He 57 no ka makahiki 1889, 53 no ka 1890, 54 no ka 1891, 54 no ka 1892, 55 no ka 1893.
Mau Paa i Uoia a Paa.
Ma ke ahiahi Poaono, Dekema ba 30, 1893, ma kahi noho o Mrs Anahu ma Alanui Paipalapala, e Re v H. H. Paleka, o James Ii, o Honolulu nei, ia Miss Katie Stevens.
Mauka o Nuuanu, ma kahi noho o Mrs. L. Kaulukou, i ka la makahiki hou, e Rev. J. Waiamau, o E. H. Kanehiwa, o Niumalu, Kauai, ia Miss Emma Kanae, o Honolulu nei. O ke kane, oia kekahi o na keiki hanai a ka Mea Hanohano P. P. Kanoa, a o ka wahine hoi, he inoa kaikamahine na Mr. J. L. Kaulukou. Ua hoi aku laua no ko laua home o keia mua aku ma ka mokumahu Mikahala i ke ahiahi Poalua ae iwaena o na aloha ana a ka ohana, na makamaka a me na hoa'loha, me ka manaolana e uhaiia laua e na pomaikai a pau. Ua loaa mai nei i ka Puali puhiohe Lahui ma ka Auseteralia he eha mau ohe hou, a akahi iho la no a lawa pono na ohe o ia puali. Mai Belegiuma loa mai nei keia mau ohe, no ka mea, aole i hiki ke hoolawaia ke kauoha ma Kapalakiko i ka wa i kauohaia ai me na ohe i loaa mua mai.
Make ulia o ka Hape Nu Ia.
Ua loaa aku o Keliihapa i ke aumoe Poakahi i hala iho la, e waiho ana iloko o ka nahelehele ma ke alo iho o kona hale noho ma Maunakiekie, ua hoihoiia aku a luna o ka lani, a malaila kahi i waiho ai a make loa i kakahiaka Poalua ae. I kona waiho ana no malaila, aohe i hoomaopopo hou ia aku, ua uhiia no me ka huluhulu, aka, i ka nana hou ia ana aku i kela kakahiaka, ua lele loa aku la kona aho. Ua kauoha koke ia o Kauka Kupa, aohe nae he manaolana i koe, a i kona kaha ana, ua ike iho oia ua holo nui ae ke koko i kona lolo, mamuli o ka haule ulia ana ma kekahi wahi oolea, a i ole ia, ua uhauia paha. I ka auwina la Poakolu i haawi ae ai ke kiure aha kolonelo i ka lakou olelo hooholo e like me na olelo a ke kauka. Mamuli o na olelo ike, he kanaka ona mau oia, a ua ona no oia i ka la Hape Nu Ia nei, a pela no kona ano i ka loaa ana aku.
Poino na Ola i ka Uwila.
He ulia poino kamahao loa ka i ikeia ma Koloa, Kauai, ma ka la 26 o Dekemaba, 1893, a mamuli hoi o ia ulia ua make aku he kane a he wahine Iapana a pela no hoi me elua bipi waiu a me kekahi lio. Ma ka hora 4 o ia wanaao ua hoomaka ae la ke kui ana o ka hekili, a ua mau mai pela a hiki wale i ka manawa mawaena o na hora 5 a me 6 me ka amaamau a hana kuli palena ole, a ua olapa pu ae la no me ka uwila. Ia manawa ua pa ae he halekuke ma ke kahua mahiko me ka uwila, ua loaa ae he poino i ka hale, eia nae, aohe mau poino e ae. A me he la, ia wa like no paha i loaa aku ai ka hale o na paahana, a maloko o kekahi keena e moe ana kela Iapana kane me kana wahine, a ua make laua a elua i kela pa ana no i ka uwila. Pela no hoi me na holoholona, ua hoonahahaia na pukaaniani, a me na poino e ae no hoi i kekahi mau hale. Ua malamaia he aha koronero, a ua hooholoia ua make na Iapana i ka uwila, a ia la no lana i kanuia ai a nalo loa.
O kekahi o ua hana a na kiu a me kekahi poe makai haole Pi Gi, i na la i hala aku la, oia no ko lakou ake hoonaukiuki a hoohaehae makemake hoohakaka me na kanaka maoli. I ka lakou mau hana wae mai no nae, ua noho malie wale ia aku no me ka ekemu ole. Ina paha ma na wahi mehameha a ua noho iho la hoi na aumakua hoano e ike o kahi poe, alaila, aohe no e hewa ke hanai kalo paa ia. Ilaila auanei e ike ai i ka hana a ka Hawaii.
He Poina Honua Paha
Ia Pailata Babekoka i hele ae ai e kuai pooleta i ka Hale Leta i ke awakea. Poalua i hala, ua poina iho oia ma ka puka kuai pooleta i kana eke dala pakeke, a he wahi keiki Hawaii ka mea nana i ike. Ua kii aku ua wahi keiki la a lawe ae i ka Halewai, mahope iho nae o kona huli mua ana i ka mea nona ia waiwai a loaa ole, me kona hoike aku noho i ka inoa nona ia. Ua loaa aku ua eke dala la ia Mr. Babekoka.
He Elemakule Kanikoo
Ma ka Poaha, Ianuari 4, i piha ai ka 100 makahiki o Leonada Mikila, he paele kamaaina i o kakou nei, ma keia ola ana. Ua elemakule loa oia a ua hanapilo mai ka leo i keia wa. He mau keiki kana me kana wahine Hawaii, a ua kani moopuna no hoi. Ma Bosetona, Masakuseta, Amerika Huipuia, kona hanauia ana, Ianua ri 4, 1794. Iaia ma Hawaii nei, ua ike oia i ko kakou mau Moi a pau a koe hookahi nae o Kamehameha I, oia kana i ike ole. Eia no oia ke ola nei, a aia mauka o Puowaina ae nei e noho nei.
He Ulia Pukauwahi ma Maui.
Oiai na kanaka ma ka hale wiliko o Hamakuapoko, Maui, e hiu ana i ka pukauwahi hou i ka Poakahi i hala, a oiai hoi e hookuene pono ia aku ana ma kahi e ku ai, ua moku ae la na kaula e hiuia ana a haule iho la ua pukauwahi nui la. I ka haule ana ua pa aku he paahana Kepani, a ua make koke oia. He elima poe e ae i eha. Ua hoea mai ma ke Kinau i ka Poakolu nei ka malama-buke, i holo mai oia e hoike i na agena no keia poino a e hoomaopopo ae hoi me ka Hui Hana Hao Honolulu no ona pukauwahi hou.
Hookahi Manawa o ka Haalele.
He halawai ko ka Papa Hoonaauao
i kakahiaka Poakolu i hala, a he ekolu no lala i hiki ae, oia o Mrs. S. M. Damona, Mr. W. W. Holo a me Mr. W. Hila, a he elua mau lala i ka aina e, oia o Hon. C. R. Bihopa a me Prof. W. D. Alekanedero. Mahope o kekahi mau hana e ae i pili i ka pono o ka Papa, ua kakau na hoa ekolu i kekahi palapala ia Mr. S. B. Dole, Peresidena o ke Aupuni Kuikawa, e waiho like aku ana i ko lakou kulana. Ua ulu mai keia mamuli o ka hoike a ke Komite Hoonaauao o ka Ahaolelo Pi Gi, ma ka halawai o Dekemaba 28, 1893, e olelo ana e waiho mai ka Papa e ku nei, a e hookohu houia i Papa hou o eono lala, i ekolu o ia poe i mau wahine.
KA MAKAAINANA.
NO 1894.
"Iluna no ka Ua, waele e ke Pulu.
I ola honua no, mahope iho o ka noonoo pono ia ana, ua hooholoia e like me keia malalo iho na uhao lanahu ana e hiki ai ke mau aku ka holo ana o ko makou wahi waa nei iloko o keia makahiki ae, a eia malalo iho na auhau ana i manao ia ai e loaa mai no he ola a he kanaaho, penei:
UKU O KA NUPEPA.
No Hookahi Kope - $.10
No Hookahi Malama - .25
No Ekolu Malama - .75
No Eono Malama - 1.25
Aka, iha e hookaa mua ia mai iloko o ka malama mua o ka hapaha makahiki, a i ole ia, o ka hapalua makahiki a makahiki holookoa paha, alaila, peneia ka auhau ana:
No Ekolu Malama - $.50
No Eono Malama - 1.00
No Hookahi Makahiki - 2.00
O ka iini nui nae hoi, o kela me keia hapaha makahiki (ekolu malama) ke hookaa mua ia, no ka mea, he oluolu ia, he maalahi, a he hiki olo loa hoi ke pale mai no ka nele loa o ka waihona. Aole no e lawe kekahi mea i ka nupepa, ina e ike ana i ka nele maopopo aia imua o na makahiki i ku ai
E hooko pololei ia aku ana keia ae la maluna, a ke kauleoia aku nei hoi ko na Luna Nupepa a pau hooko pono aku me ke kuemi ole a ewaewa ole hoi i keia kauoha maluna ae.
Aole no hoi o ke ola o ka nupepa wale no ka mea i manao hookahi ia, aka, o ka luhi pu no hoi kekahi o na poe kokua a hooikaika aku i ka holomua o keia nupepa, a ua hoomaopopoia peneia iho :
UKU O NA LUNA NUPEPA.
5 Inoa- - - .15
10 Inoa - - - .20
Maluna aku o ka 10 Inoa - .25
E hoomaopopoia o ka uku pakeneta ae la ia maluna o kela a me keia dala hookahi e loaa ana, a e hoomaopopoia no hoi he nupepa loaa wale ka na Luna a pau, oia hoi, na poe e loaa ana he elima inoa keu aku mawaho ae ona ponoi iho.
E hoolawe ae no hoi na Luna i ko lakou uku mai ka huina dala e loaa ana ia lakou no ka lakou poe lawe i hookaa, a o ke koena iho hooili mai, me ka lawe pu ae no i ka uku o ke kikoo leta. E hoolohe i keia, i pohihihi ole.
Aole no i pili keia ae la i ko Honolulu nei mau Luna, aka, e loaa no ia lakou e like me ka mea i kuluma.
O na kauoha nupepa, na hoolaha a pela aku, e kakauia ae i ka Ona a Luna Nui; a oiai, oia hookahi no hoi ka Lunahooponopono, iaia no e hoounaia mai ai na palapala a me na manao no ka hoolaha aku. Aohe e hoopukaia kekahi manao ke ole e hoikeia ka inoa oiaio.
O na hoouna a kikoo dala ana a pau, me ka Puuku hookahi wale no ia, oia o Mr. F. J. TESTA, aole i kekahi mea e aku. Aole palapala hookaa e mana, o kana wale no, a nolaila, iaia no e hoouna pololei ia mai ai na dala a pau.
KEENA HANA: Helu---Alanui Moi, ma Kapuukolo, maluna mai o ka Uwapo a Haaliliamanu, ma ka huli Waikiki ma ka aoao makai.
KEENA PUUKU: HELU 15, Alanui Kaahumanu, ma ke keena oihana loio o ka Mea Hanohano A. Rosa.
W. H. KAPU,
Ona, Luna Nui a Lunahooponopono.