Ka Makaainana, Volume I, Number 5, 29 January 1894 — Page 2
HONOLULU, OAHU, POAKAHI, IANUARI 29, 1894.
HE MOOLELO KAAO
---NO---
LAUOMIDIHAE.
---KA---
UI I MOHAI I KE KOKO
---KA---
NANI I ALANA IA I KA OI O
KA PAHIKAUA.
Ka Mea Huna iloko o ka Kiaha Waina
Ka Mea Pohihihi i ka Maka o ke Kuikele.
---A O KE---
Keiki Alii Numaredina
KE
Komo Lima Maka Pokoki.
MOKUNA VI.
Ka hoopakele a ke kaikaina i ke kaikuaana---Ka pahikaua a ka mea hookahi i na poo ewalu---Poo akahi, heaha aku ia?----Poo elua, owai mao?---Poo ekolu, aole au i ike---Poo eha, Poo elima, aia iluna i ke aouli la o luna aku---Poo eono , Poo ehiku, elua laua----Poo ewalu, o Moleka ka Pilikua Anela.
A no ka ike ana mai o ua kupua la i ka pau ole o ua mau ilio la i ke ahi, haule koke iho la kona mau kuli ilalo, a nonoi mai la ia Numaredina.
"E ola au e Numaredina, ina au e make, aole oe e ike i ka aina nui palahalaha a ka mea huna iloko o ke kiaha waina." Aloha no kahi ala!
"Hoopunipuni oe," wahi a Numa redina. Aia oe a hoihoi hou mai i kuu kaikuahine e like me kona ano mau, "he ano e ke smell," alaila oe ola, a ina aole e make no oe.
Ia manawa i pane mai ai ua kupua la ia Numaredina. "Ke hoohiki mai nei anei oe me ka oiaio imua o'u, ina au e hoihoi hou aku i ko kaikuahine, alaila, aole anei oe e pepehi mai ana ia'u a make?
"Ke hoohiki aku nei au" wahi a Numeredina, a aole hoi e hoo kau i kekahi hoopai maluna ou a e pepehi aku hoi ia oe. Ia manawa i olelo mai ai ua kupua la, e hopu aku o Numaredina i na pua la, a e waiho iho ilalo o ka papahele.
Ia manawa i lalau aku ai o Numaredina a waiho iho la i kekahi pua ilalo, a o ka manawa no ia i kahuli ae ai a ku ana kona kaikuahine, a lele mai la e honi i kona kaikunane a uwe iho la laua, a lalau hou aku la oia i ka lua o ka pua, a ia manawa i loli ae ai na pua la a ku ana imua o ko laua nei alo ke kaikamahine alii Murisedela, a ia lakou e uwe ana, ua mahuka aku la ka pilikua me ka ike ole ia
Ia manawa i hoouna aku ai o Numaredina i kana mau ilio me ka olelo ana iho.
E hele oe e Huneta ma ka aoao akau o ka aina o Moleka e imi i ka pilikua, a i loaa ia oe e hoihoi mai oe iaia ianei, a ia oe hoi e Liona ma ka aoao hema oe e hele ai.
Ia manawa i hookuu iho ai laua i na ipuhao keleawe ilalo me ke ahi, a oili aku la ua mau ilio la a hoomaka aku la e holo no kahi i kauohaia ia laua.
I ka hala ana aku o na ilio, noho iho la o Numaredina ilalo me kona kaikuahine e kamailio no na mea e pili ana ia lakou iho. Aloha no.
E waiho kaua e ka mea heluhelu ia lakou ma e nanea ana, oiai hoi, ke hoonanea ia la lakou e ko makou wahi Duke kolohe me kana wahi ipu hokeo punahele i makanaia mai ai hoi e ke alii nui o na hua kepau Small Pi ca, a e huli ae kaua a nana aku i ka huakai imi pilikua a na ilio.
I ka manawa i haalele iho ai o Huneta ia Numaredina, a hoomaka aku la oia e hele ma kona alahele, a i ka manawa pokole wale no ua hoea aku la oia i kekahi puu, a nana aku la oia ia mua, aohe ona ike maalo kanaka aka, ke ike aku la ia i kahi mamao loa he wahi hale uuku ma kapa alanui, ua hihi ia kona kaupoku e na papapa hihipea.
Ia manawa i hoomaka hou iho ai ua ilio la no ka holo ana, me ka hanu ana o kona ihu i o a ianei, a iloko o ka ehu o kona mama i maalo iho ai oia ma ka ipuka o ua wahi hale la.
Iaia e kuupau ana i kona mama holo, lohe aku la ia i ke kahea ana mai o kekahi leo mahope ona e i mai ana.
"E Huneta, e Huneta, e holo ana oe ihea? Pane aku la ua ilio la me ka mau no o kona holo ana me ka ikaika.
"E holo ana wau e imi ia Moleka ka pilikua anela, malalo o ke kauoha a Numaredina."
"E hoi hou mai kaua i hope nei e inu wahi waina ai, i kamau iho kamahele a ikaika ka hele ana e imi i ka hoa paio."
Hoole laua ua ilio la me ka mau no o kona holo ana imua, a no ka manawa pokole wale no ua hoea aku la oia i ka puu oioina elua, a ku aku la oia e nana ia mua o kona alahele, aohe ona ike maalo kanaka ae.
Aka, ke ike aku la ia i ke ku mai a kekahi wahi hale i kahi mamao loa, i ulu ia e ke kulina mawaho. Ku iho la ua ilio la e hanu ma kona mau aoao a pau, aohe ona wahi hanu pilikua iki aku, a ia manawa i hoomaka hou aku ai ua ilio la e holo me kona mama nui a pau, ke nana aku i ua ilio la nalo i ka puapua ua mea he mama.
Iaia e paukiki ana i ka holo, maalo ae la oia ma ka ipuka o ua wahi hale la, a ia manawa i kaheaia mai ai oia e kekahi wahine e noho ana ma ka ipuka o ua wahi hale la me kona kamailio ana mai.
"E Huneta, e Huneta, e holo ana oe ihea?"
"E holo ana au e imi ia Moleka ka pilikua anela, malalo o ke kauoha a ke keikialii Numaredina," wahi a ua ilio la me ka ka hoomau no nae i ka holo ana imua.
"Hoi hou mai kaua i hope nei e inu wahi waina ai i kamau iho ai kamahele a ikaika ka hele ana e imi i ka hoa paio" wahi a ka wahine i pane hou mai ai.
Hoole aku la ua ilio la me ka mau no o kona holo imua, a no ka manawa pokole wale no ua hoea aku la oia i ka puu oioina ekolu, a ku aku la oia nana ia mua o kona alahele, aohe ona ike maalo kanaka ae.
Aohe i liuliu iho keia hanuhanu ana a ua ilio la, ike aku la oia i ua pilikua la e holo ae ana ma na kuahiwi o Waianae, e kokoke aku ana i ka hale hookolokolo.
Nui loa no koe.
Poe Hookano o Maui.
Auhea wale oe e kahi manu
E kala hele nei lohe ka hikina
Ua lohe na kini o ka aina
I ka poe hookano mai o Maui
Ua ku no kau olelo ana
Ua kaa i ka aina malihini
Ua ku kau hana i ka lokoino
A he kuleana paa no ka oiwi
Eia ka ole i kuu nui kino
Ua noho i ka hale hoopili wale
Aole no au i manao mua
E ike kumaka ia Kalaupapa
Na ke aloha wela la o kuu ipo
Au ia mai na kai elua
Na ale nupanupa o ka moana
Mea ole na pali o Koolau
Auhea wale oe kuu lei rose
Kuu hoa o ka ua hoeha ili
Noonoo mai oe i ka mea pono
I kahua paa no kau aloha
A laa kuu lohe la i ka leo
I ka nui haneri e wawalo nei
Hehihehi kulana ia Kalaupapa
Kamaaina au kupa ilaila
Haina ia mai ana ka puana
No ka poe hookano mai o Maui
M AKAALA.
He elua malama i koe, mai ka la 17 mai, a hoea aku kakou i ko I relani la hauoli i Maraki 17, o ko Kamehameha III la hoi ia ia kakou Hawaii.
Ua Hala aku ka Uhane, ka Hoa
Pili o ke Kino.
M r. Lunahooponopono.
E oluolu oe e hookomo aku i ka'u wahi ukana ma kahi kowa iki o ka kakou papa konane, i ike mai ai na hoa'loha a me na makamaka o Ioane Kalili Nahina. Ma ka la 16 o Ianuari, hora 11 a. m. i haalele mai ai ka uhane o ka mea nona ke kino i haiia maluna iho, ma kona wahi noho ma kukui o Malulani, Olowalu, Maui.
He kupa nana makani oia no Lihau, a he kamaaina hoi no ua aina nei nona na Konohiki elua, a'u e kanaenae nei, "Hoomanua i ke one o Awalua, konohikilua ka la ia Olowalu, I ka la i ka makani kahi aoao, Na Ukumehame ka nau o ka makani."
O kona ma'i i waiho loihi iho nei a hala aku la, he mimihai. Ua imi ia no ke ola e hiki ai ke hala kekahi manawa, ua lawelaweia e ke Kauka o ka apana o Lahaina nei, a ua ike oia, ua loihi loa ka manawa o ka loaa ana o keia mai iaia he 30 makahiki a oi ae. "O ka mea i hanau ia e ka wahine he hapa kona mau la, ua piha i ka popilikia."
Ua komo oia i ke Kula Nui o Lahainaluna i ka makahiki 1858, aole nae i loihi loa a hoi mai oia. Mai ka makahiki 1890 a 1893 i oni ikaika mai ai oia i na hana o ka Ekalesia o kona Haku aloha ma Olowalu nei, a moe malie aku la kona kino me kela inoa koikoi he Lunakahiko. He wahine ma re e uwe nei nona, na keiki hanai, na kaikuahine elua a me kona mau hoa'loha a pau. Ua malama ia kona halawai hope me ka ohana ma ka hora 3 p.m. o ka la 17, a moe aku la ke kino i ka lepo. "Waiho kahelahela na kaha i ka malie."
Kou oiaio,
SAMUEL KALEI.
Olowalu, Januari 18, 1894.
E haawiia no i umi keneta no kela a me keia kope helu 6 o ka nupepa oili puli KA LEI MOMI, ke hoihoiia mai ma ko makou nei keena.
J. K. KAHOOKANO.
LOIO a he Notari no ka Lehulehu.
KEENA HANA: Alanui Kaahumanu.
Honolulu. jan. 8-'94
J. TESTA (Hoke),
NOTARI LEHULEHU.
KEENA HANA: Helu 15, Alanui Kaahumanu, me ka Mea Hanohano A.
Rosa. jy 9-'94
HOOLAHA HALE AINA
Helu 17, Alanui Maunakea.
[Kokoke i ka Huina-a-Kale]
Paina haole...$.25
Inu tea me kope... .10
Ai poi me ka pipi momona... .05
Ina he makemake ma ka .10 keneta no ka ai poi ana, ua loaa no.
E kipa mai a e ikemaka no oukou iho,
CHOCK HONG.
jan. 22, '94-2 mnw*