Ka Makaainana, Volume II, Number 8, 20 August 1894 — Page 3

Ka Makaainana.

 

HONOLULU, OAHU, POAKAHI, AUGATE 20, 1894.

____________________________

 

NA MOKUPUNI.

      Malalo o keia poo ae la e hoopuka mau aku ai makou, mai keia manawa aku, i na mea hou mai kela a me keia pea o ko kakou aina nei, ma ke ana he mau lono pili kuloko iho ia no kakou nei.

-----

"Ku Wale Iho no ka Huila wai, Aohe Wai e Niniu Hou ai."

      Ma kekuono poli lauae i poniia e na kilihune ua haao e Waiohinu, kahi i hoopuka mua ia ai keia mau huaolelo ae la e ke keiki oniu huila wai o na "pali alolua o Waipio," nona ka inao, J.W.L. Konohiki Kaupiko.  Ma Waiohinu i hoomaka ai oia e hoohana i kana huila-wai, nana aku oe ia la, "niniu poahi ka'u lehua."  Ke alawa iho oe malalo, aohe nao ai i ka papaa i keia wa, ke ku wale nei ua huila-wai nei no ka wai ole, a no ia kumu i kuwo paiauma ae ai ua keiki la o

"Hoaiai iluna ka wai o Hiilawe, Ua hele wale a hoohuelo i na pali."

      Eia iho ua puana e hoopilipili ai no ka huila-wai a pili nakekeke ole:

      1.  O na hana Ekalesia, ke ku wale nei ka huila-wai.  I na mahina i kaa hope aku, he ikeia aku ia he mahuahua iki na poe e kamoe ae ana no kahi o ka "huila-wai o hanahana pono" (halepule).  Ia wa no, o ka puulu o na wahi ououo wahine o ke au palauhulu, he ike mau ia i na Poalima halawai i ke kapaepae wahi lio ae.  He loa o Pahala, he mea ole ia i ka ihu hanu o ka Palaunu: he a hauwalaoa ae ko Punaluu, mea ole ke alu i ka ihona pali.  Uleuleu lua na manu, mahalo aku, olioli mai.

      Mahope iho o ka holo ana aku nei o Kahunapule J. Kauhane, me ka puolo i kapalapalaia mawaho, "J. Kauhane, Elele no ko keia ao e hele ana e kau i kumukanawai no ke kino lepo make wale, aole no ko ka uhane," ua ikeia ke ku wale ana ka huila-wai o na hana pono.  Ma Waiohinu, ke kiei aku ma na paia, he kau ke ano, he meha pu wale no ia; haule aku hoi i Naalehu, no kumaki paea, kupikimola; ha-lo ae i Honuapo, e moe malie ana ka honu, aohe puha ae; kaalo iho i Punaluu, o ka luahine kaikapu wale no; no pahala hoi, aole e kala i kanu ola ia ai.  O ka hau keia mahope o ko ke kahuhipa alualu nui ano i ka hanohano a me ka waiwai pau wale i ka mu.  Eia ka Iesu:  "O ke kahuhipa mai kai, oia ka i haawi i kona ola no na hipa."  O na wahi hipa wahine keia o ke au palauhulu, ua "heha Waipio."  Ua pau ka anapa ana o ke daimana: o ka pipi, ua hoi i ke kula e umo ai, o ke koi ulei o Manuka, ua ulalahi loa mai nei.

      Ke koi mai nei o Madimosele Wahine ia oukou e hoopaanaau i keia himeni:

      E na hoa paaua nei,

      E ku ma ka huila wai,

      Hookahe ae i ka wai,

      I poahi mau ka huila.

Hui -- E niniu la, e niniu,

           E poahi ka huila-wai,

           Pela no ka niniu,

           O na hana pono a pau.

      2.  No na hana Aupuni.  I na mahina i hala aku, ua ku wale ka huila-wai aohe mau hihia.  I ko'u kiei ana aku ia loko o ka rumi hookolokolo, pakele au mai paa i ka upena a ka nananana e olokea ana ia loko.  O ka aa moni a na loio, ua punaheluia paha.  E aho no nae ka pila umeume, he hawele umoki-ha wale no; o Keoni paha, o ke aha aku la la kana wahi kualapaa o ka hoi ana i ka uka lupua?  Ano iho nei nae, loaa kahi hihia opiuina, mamuli o ka elue o kahi makai maka imoimo.  Ohi no la i ka a-la nemonemo.  Ke loheia mai nei ane he nui na hihia kuai waiona o keia mau la iho.  Ina me keia ke kulana o na apana a pau, mimino ka waihona o ke Aupuni hou, pau na wahi koa i ka make.  Maikai no kela.

      3.  O na hana huli dala.  He oki haalele loa ka loaa o na wahi hana e ae e loaa ai kahi mea poepoe, o ka hana pau-weko wale no a ka mahiko, a no ia kumu ua hoi ko makou Matini i ka lae o Kaia, o ka momo,u hoi ke heleuluulu la i kai o Hopeloa.  Ke noalaia la na hana lawaia ma ia kaha kanaka ole.  O kahi kupakako ukulele (Kuaana) a lakou, eia no inka nei kahi i hokiokio ai i na mele hokiokio aama.  Pau ae la.

      Auwe, mai poina hoi au.  Ma keia Poakahi, Iulai 30, 3 holo aku ai o J. Kauhane e hui me kona mau hoa hoohiki kanaka no Kohala.  E na hoa makaainana, mai ae mai i ka ianei.  Eia oia ke hahai nei i ka ala nemonemo o Pelekane, ma ke komo kauhale, he oki ia, he hewa o Keletino. 

L. M. POHAKEA.

Haoaloa, Kau, Iulai 28, 1894.

________

 

Pauahi ma Mahukona.

      Iulai 31, ua pau iho la ka halekuai nui o Mahukona i ke ahi ma ka hora 8 o ia ahiahi, a me na keena kupakako, ka hale ukana o ka halekuai, ke keena Hale Leta a me ke keena Dute Awa e pili pu ana me ke keena hale leta.  Ua hemo lihilihi mai no na wahi ukana o ka halekuai o ke koena aku ua amu ae la na alelo manamana o ke ahi.  Ua nui na hooikaika ana a na keiki hana o Mahukona ia po, me ke kiloi ana i na mea e loaa ana i ko lakou  mau lima ma ka aoao ma Kona o ka halekuai, oia na pu-a pili i ole ai e pau ike ahi.  O ke kao lawe ukana kahiko e waiho ana ma ka aoao o ka halekuai, ua pau i ke ahi.  Ua lele aku no kekahi huna ahi iluna o ka hale kaaahi ma ka aoao ma Kohala o ke halekuai.  Me ka nui o ka hooikaika ana o na keiki hana o Mahukona ma ia po pauahi i pakele ai, no ka mea, he hookahi kaaahi iloko kahi i waiho ai.  Mail loko ae no o ke kaaahi ka wai i pakele ai, ina ua pau pu me na hale e pili pu ana, a me na paila papa e ahu lala kukui ana ma ia wahi.  Ua hoohalikeia no hoi na kini pipi, na kini kamano a me na kini mea-ai e ae me na i'a e holo ana ma na lae kahakai ia po.  Ua oia na kini mea-ai i ke o, aole no hoi he o ana i hoi hele mai, hoi mai no ke o me kana ukana i manaoia ai, oiai, he nui na kini e ahu mokaki ana o kela me keia ano.

      Augate 1, malaila au kahi i makaikai ai i ke kahua pauahi, aia hoi, e ahu ana na mea a pau o kela a me keia ano.  Malaila ae no hoi na poe i hele ai ai i kai o Mahukona e hoohiki ai i na kanaka e makemake ana i ke Aupuni Repubalika, oia o J. Kauhane me J. K. Nahale.  A no ka maikai ole o ka hili ana o ka laua upena, nolaila, ua nui ole ka i'a komo iloko.

      Augate 2 i noho ai ke kiure koronelo no kela pauahi, mai kakahiaka a ahiahi, he elima wale no nae poe i hiki mai, o ke ono aole i hiki.

      Iloko a keia mau la e makaukau ai ke kahua o ka halekuai hou, a eia ke hoomakukauia nei ka hale leta a me ka hale dute awa.

                  G. W. KAULANOHOIKAIU.

      Kohala, Hawaii, Aug 10, '94.

________

 

Na poe o Hawaii i Hoohiki.

      Ma ka la 6 iho nei, ua hiki mai ma Kawaihae nei na luna hoopaa inoa a hoohiki  hoi o ke Aupuni pakaha, oia o J. K. Nahale, J. Kauhane, J. W. Nihi a me James London.

      Eia iho na inoa i pili i kepau o Humuula: Wm. Hookuanui, he luna Leta a malama hale no Waila ma; Opeka M. Kekuewa, Kapena Makai; J. E. Laau, he makemake oihana; Kaaihue, he mea puni wale i ka mali leo ia; Kamaka, he kapena moku no Wm. Hookuanui.  Ua koi ika ika ia o S. Kapela, he kumukua no Kakalawena, Kona Akau, aole oia i ae e kakau.  Ke haawi nei au i ko'u mahalo piha, oiai, ua kakau mua ia kona inoa i ka buke hoopaa inoa a ua holoi hou ia.

      Penei iho kahi moolelo pokole no ua o S. Kapela: Maka la 26 o Iulai, ua hopuia no ka mai lepera, a ua hoopaaia mamuli o ka ike a ke kauka o ka eha ma ka wawae he mai lepera ia.  Ua hookuu ka Makai Nui J. K. Nahale no elua pule.  Ua hele o S. Kapela i Kohala ia Kauka Bona, ua hoole o Kauka Bona aole he mai lepera.  Nolaila, na hoi mai oia a Kawaihae nei, kali no ua Hope Makai Nui nei, a ma ka la @ ua hiki mai oia (Nahale) a ua hiki pu ae no hoi me ka Peresidena o ka Papa Ola, W. O. Kamika.  Ua nana no ka Peresidena i ka leta a ke kauka, a ua nana pu ia no na lala o ka mea i manaoia he mai.  Ua hooholo no ka Peresiden aole no ke mai, o ke kauka nae ka mea mana, nolaila, ua hoihoi hou ia e nana e kekahi kauka o Kona, oia hoi, o Kauka Makuaina, oiai, he kauka okoa ka mea nana i nana mua, oia hoi o Kauka Kinikale.

      Eia iho hoi na poe o ka aina mauna, i aloha ole i ka aina me ka Moi: S. H. Mahuka, Lunakanawai Apana; S. M. Kekoa, Hope Makai Nui: G. K. Pipi, malama halepaahao; G. Pa, makai; J. Kipulu, he kahu hoki no S. Paka; Toma Lina ke, he hoohei bipi na S. Paka; Kawaihae nei.  Auwe no hoi keia poe aloha ole i ka aina ke haawi nei i ke EA ia Amerika.         IMIMEAHOU.

-----

Poe Kanu Maia ma Ulupalakua.

      Ma ka la 8, Poaha, ua ikeia aku o kumumaia J. W. Kalua me kona mau hoa haole me na eke loli mai o Kaupo ma ka Hale Hookolokolo o Ulupalakua nei e kanu maia nui ana.  Aole i hua iloko o keia wa a ua mau akua lapu la e noho ana, aole ke aloha aina i hele aku, hookahi wale no o kahi hanai kao kumakaia aina oia o Kuihelani.  Elua no Makena, o Kukahiko me kahi makai inu panini, Kaholokai.  O na kumukula me ka maki Kula, aole lakou i hoohiki, aole makemake.  Mai mua loa mai no ko lakou hoole.

            J. N. SILAIAKEALOHAAINA.         Augate 10, 1849.

-----

 

      Poakahi i hala, imua o ka Aha Kaapuni ma ke kiure, i hoopau wale ia ai kela hoopii a Kuauau ma ko ke Aupuni aoao, e ue ana i ka luna hooponopono o ka "Holomua" namu no ka hoeueu hoohaunaele.  Ahu no hoi ka pala!

      Kakahiaka Poalima, la 10 nei, i hopuia ai o Keaka, he kanaka e hana nei ma ka pa kuai papa o Lui & Kuke, no ke kaa ole o kona auhau.  Ua hookaa mua no ka oia malalo o ka inoa haole no Keaka, a hopuia iho la hoi ma kona inoa Hawaii.  No ka loaa koke ole a ka palapala hookaa mua, paa ai oia.  He keu aku no a ka apiki, aia no ke ola a loaa kela palapala mua ke koaa io hoi.

______________

 

J. K. KAHOOKANO.

LOIO a he Notari no ka Lehulehu.

      Keena Hana:  Alanui Kaahumanu.  Honolulu.  Jan. 8, '94