Ka Makaainana, Volume II, Number 21, 19 November 1894 — NA MOKUPUNI. [ARTICLE]

NA MOKUPUNI.

Mau Lono Huikau mai na Apana Kuwaho mai o keia Paeaina.

Ka Hele ana i ka Laula o Kohala. O kou mea kakau, no ka aina ia o ke kai maokioki, nona keia uhene ana: Aloha no ka lai o Kona, Waianuhea lua kela O ke kehau i ke ahiahi, Pa kolonahe lua i ke kula. Hui: Aole no e like aku, Me Kona Kaiopua i ka lai Opua hinano ua malie, Hiolo na wainaoa a ke kehau ! Ma ka wehekaiao ana o ka la 1 o Okatoba, 1894, i haalele iho ai kou mea kakau ia Kona, mahope iho o na muki aloha ana me Hokuloa, i kamoe aku la no Huehue, a ma ka hora 8:30 A. M. hiki aku la ma ka home nani o J. Maguire a malaila i pepehiia iho ai kou mea kakau e Keoni Bulu, a kamoe loa aku la no Kiholo, a mailaila aku no ka pahoehoe hou e komopoo aku la i ka nenelu o ke a o Kaniku, a ka malihini e uiha iho ai. A oiai makou e kuoe ana, eia ka enaena o ka la ke anai iho nei maluna, a he ku i ka weliweli, aka, aole e hiki ia oe ke alo ae, e ma ka hora 2 P.M. hiki aku la makou i Kalahuipuaa, a apu ae la ka manao pilihua. O na mea oi loa aku o ko'u ehaeha, no Mrs. K. Koki a me Mrs. L. Kaanaana, ua ma-uha na kino, opa mai la na lio, he ku oe i ka ehaeha ke nana aku. He mea ole no nae ia, oiai, e hii ana i ka ahui hala o Halaomapuana, a ma puako makou i mawehe ae ai, a pii laua no Waimea a hele hoi makou e

paio me na one o Kaunaoa, aole i kana mai ka nenelu. Ma Puako i noho ai o Lalamilo, a nana kela leho ai o "Kalokunu," aka, ua hala aela ia, hiki aku la makou ma Kawaihae, a hookipaia aku la ma ka home waipahe o Mr. a me Mrs. O. M. Kekuewa, a no laua kou mea kakau e poina ole nei. Ma ka hora 8 A.M. o Okatoba 2, motio loa kau la no ka Ua Kipuupuu o Waimea, a i ka hala hope ana ae o Keahukauina, ia wa i halawai mai ai makou me na keiki kamaaina o ua aina mauna la, nana aku no hoi oe houhou liilii lua i ka ili, a me he mea la he iniki na ka ipo ahi, a hoomanao ae la au ia, "Hole Waimea i ka ihe a ka makani, Hao mai na ala a ke Kipuupuu, He laau kalaihi ia na ke a'u Oo i ka nahele o Mahiki Ku aku la i ka Malana ke kipuu, Puhalu ka maka o ka Howai o Uli, Nini au eha ka pua o Koaie, Eha i ke anu ka nahele o Waikaia, He aloha e ! " Me ka awiwi hiki aku la makou a hookipaia aku la ma ka

home o Rev. J. Kalino, a'u e poina ole nei he aie kaa ole au na kona lokomaikai, a ma ka hora 10 o Okatoba 3, haalele iho la makou i ka aina mauna me kona mau puu e ku kinikini ana a kamoe loa aku la a hiki ma ka home nani o J. Maguire, ma Kahuwa Ranch, a na aie nui loa kou mea kakau ia Mrs. Maguire, mamuli o kona oluolu waipahe, au e ka malihini hele e hilahila ole iho ai, a ma ka nana ana i ke ano o ka aina, he ano kamahao no, oia hoi, ua alaiia e na puu ma o a maanei, a o ka oi loa aku no nae o Pili me Kalahikiola, na puu haelelua, a ma ka nana ana i o a ianei, pela ka i aloha ai o Moolau ia Kahua, wahi ana, "he koena la pumehana," a pela io no. Ma ka hora 8 A. M., Okatoba 4, haalele ia Kahua no Kohala-loko. Ia wa i alawa hope ae ai e ike aku la ia Huehue e oku ae ana a ike pu mai la i na ao opua ua o Kona e hookiikii ae ana, a ia Kuili hoi e au ana i ke kai. Hoomanao ae la au, "Aia i Kuili o Kanaueue, E naue kaua i ka ai hoopau." Hala hope ae la na aina noo Kona, ke huli la ke alo no Kohala, a ma Nunulu ku ana o Puuohale, e kiei mai ana hoi o Khoni, e huli pono mai ana hoi o Awalua i ko maka, hoomanao ae la au, "Aloha mai au ka luna i Kehoni, E hoi aku au he malihini oe." Aole i pau.