Ka Makaainana, Volume III, Number 10, 13 May 1895 — Page 6
6 HONOLULU, OAHU, POAKAHI, MEI 13, 1895.
LAUOMIDIHAE
-KA-
OI I MOHAIIA I KE KOKO
- KA -
NANI I ALANA IA I KA OI
O KA PAHIKAUA.
-
Ka Mea Huna Iloko o ke Kiaha
Waina;
Ka Mea Pohihihi i ka Maka o
ke Kuikele.
- A O KE -
KEIKI NUMAREDINA
KE
Komo Lima Maka Popoki.
-
MOKUNA XVII.
Ke alahele no ke Kihapai pua o Numere - Ke aloha welawela, aole i nalohia aku - Owai ke kupua, o oe? - Hehihehi kulana i ka nani o ke Ao Olino - Huhuhui na opua i Awalau.
O keia mau mea a kaua i ike ae la, e ka mea heluhelu, o na kiai no ia o ua aina la e hoohana la i ka lakou mau mea mana me na kamahele alo ehuehu o iloko o ua aina la no ka imi ana i ka mea huna.
He mea oiaio, i ka wa i hoea aku ai o keia poe me ka lakou mau mea make, aole i hopo iho o Numaredina ia lakou; aka, ua ku mai la oia e paio me lakou he alo a he alo, a i ka wa ana i hoomoe mai ai i kana pahikaua imua o na enemi, ua lukuia iho la he eono tausani o na elepani me na apuapu nunui, na pahiolo a me na hamare, oia hoi ka lakou mau mea make.
Aia hoi, i ka wa i ike aku ai na elepani noho muliwai o Aferika i ka poino o keia mau hoa o lakou, ua kukakuka koke iho la lakou e hookuu laelae aku i na opio, a na na leopadi ahiu e pepehi mai ia lakou. No ia mea, ua hookuuia aku la na opio me ka poino e komo iwaena o na kiai makau wale a na kekahi poe okoa aku e pepehi mai.
Hala aku la lakou halawai koke aku la no me ka umi tausani o na poe me na kaa keleawe, ua pa iwakalua kanaka ia hoi o ke kaa hookahi, a o ka ukana hookahi wale no o luna o keia kaa oia no na pahu aniani uwila, a i kapaia hoi e ua kupua la nana i hookumu keia aina me kona mana piha, o "uwila ai honua."
Me keia poe i hooili aku ai o Numaredina hookahi i ke kaua kue aku i na enemi me ka wiwo ole, oiai hoi kona mau kokua ua imi aku la i pono ma kekahi ano e ae, a e ike aku ana no kakou ma keia mua iho.
O keia poe me na kaa kaua keleawe i pa iwakalua kanaka ia o ke kaa hookahi, oia no na moo unahi pakapaka o na wai opilopilo o Basana, a i ka wa i hoomaka ai e paio me Numare dina, ua hookuu mai la lakou i ua mau pahu aniani uwila ai honua nei e a i ka honua holookoa, a iloko o kela manawa ua paa ae la ke alahele o Numaredina e hiki aku ai i kahi ana i kaunui ai a he lapalapa ahi nui ke paku mai ana i kona alahele me ka weliweli. O ka wela o ke ahi ke hahani loa mai la i ko lakou mau kapuai wawe, a o ia no ka wa i loheia aku ai ka leo o na poe kiai i ka pane nui ana ae, - "E pepehi iaia a make, aole e hoopakele." O keia no hoi ka manawa i oi palua ae ai ka weliweli o na hana a ua poe kiai la, ke hele la a "enaena ke ahi a ka wahine" ia lakou.
Aka nae, aole no i hopo iho ua keiki la i ka nui hanaino a ka enemi, ua hoolele koke aku la no ia e like me ka ikaika i loaa iaia e kue ana hoi i ka ma na o kela uwila ai honua e lalapa la imua ona a me kona mau kaikuahine, a iloko o ia mana wa no i hoea mai ai kona pokii mai loko mai o ka enaena o ua ahi la, a i ka wa a na kiai i honi ai i ka hohono o ka hulu popoki ua hooho ae la lakou, -
"Ke hohono mai nei ka hulu o Boba, e holo kakou i pakele mai ka mana mai a me ka make a keia keiki. O Boba kona kokua, kela popoki eleele o Pameburia."
Ia manawa no i haalele iho ai lakou i ka lakou mau kaa kaua keleawe me na pahu uwila, a holo aku la e hui pu me na kanaka ihu loloa e hele mai ana maluna o na hoki me na ihe maka kolu keleawe ma ko lakou mau lima, a o ka huaolelo hoo a lakou i pane aku ai imua o ia poe, -
"Ua ana, ua ana makou i ka nani o kela keiki a me kona mau hoahele. E hookuu lanakila aku kakou ia lakou e komo iloko o ka nani o ke kihapaipua o Numere me ka hoopoino ole aku."
[Aole i pau.]
-
Eia ke ike hou ia aku nei na ipu aimaka momona ma na makeke kuai o kakou nei.
E aho iki keia mau la iho la, ua loaa he haule wahi ua ia. A ua hoi mai no hoi ka makani kamaaina, a e aho ia i ka makani wela ma ka hema mai.
NA PALAPALA.
[Aole maluna iho o makou ke koikoi o na hala a me na hewa no na manao i hoopukaia malalo o keia poo, aka, aia no maluna iho o na poe na lakou a kakau mai.]
-
He Haanui Wale No.
E MR. LUNAHOOPONOPONO:
Ua ha lo iho kou mea heluhelu ma na lono nupepa e pili ana i kau hoike no ka na "elemakule kalaiaina" nupepa - he mea oiaio kau i hoike ae ai, he walawalaau wale iho no ka lakou. Ua pau loa ka puni ana o na kanaka i ka lakou nei haanui, no ka mea, ua hoike ae ka elemakule kuka keokeo e hele pahua nei me ke kookoo, i kona uku mau ia mai e ka aoao Aupuni. I kekahi Poaono ua uku aku o loio W.R. Kakela eke opeope ia laua o Kukamano he $1 pakahi paha, oia ka hoike i lonoia. Aohe manaolana no lakou, he hoopunipuni, a ke hele nei i na Poaono a pau e makilo. Pela no lakou e hoike nei ia lakou iho.
Ua hoao aku kekahi mea e noi ia lakou e kokua i KA MAKAAINANA, ua peku mai lakou me ka i mai o ka elemakule kapakahi, ua hiki no ia lakou ke kukulu i ka lakou nupepa maluna o ko lakou mau kamaa puu kapakahi a ihu pinana. Ua lawe aku no hoi lakou i kahi awelu buke a lakou e hoopunipuni i ka haole o ka Hoku, a ke puha nei ka elemakule opaha, ke hanaia nei kana hana e ka halepai o ka Hoku. He hoopunipuni, ua nui loa ka huhu o ka haole i keia poe kanaka makua hoopunipuni. Aole o ia wale, ua hele nui aku no i ka Buletina, a ua kipakuia mai me ka hoihoi ole ia a me ka hoole loa ia no hoi.
MEA HELUHELU.
-
Ua haawi makana mai nei o T.H. Davisi me ka wahine, oiai no laua ma Enelani, he $l,000 a me $500 pakahi no ka luakini o Kawaiahao.
Ua kauia ae na pahuhao leta ma na kihi alanui, ua pena omaomao ia. Aia ma ke kaa holo honua ka mea e kii mau nei e ohi i na la a pau, oia o Dug lasa Balaunu.
Ua loaa aku ke kino make o kekahi Kepani makai o Kahihi, iloko o ka loko, kokoke i ka pa ma'i i kakahiaka Poakahi i hala, ua pau na helehele a i ka nahunahuia e na papai. Ua hoike koke ia ka lono i ka oihana makai a ua kiiia aku oia e kanu Ua manao wale ia o ke Kepani pupule keia i mahuka mai ai mai Kahakaaulana aku.
Ianei ilio nei kekahi poe Maui ma ka hihia a Tamaki Kalaka e hoopii nei i ka Hui Mahiko o Wailuku a me Samuela Paka, e pili ana no kekahi aelike kuai aina. Poakahi a Poalua, Aperila 29 me 30, i hooloheia ai imua o Lunakanawai Kaapuni Kupa ma ke keena a hoomoeia a no kahi o keia mau la iho e hoopau loa ai. Ua hoi nui aku nei no ua poe Maui nei.
Hora 8:30 PM o ka Poakolu, la 1 nei, ua noia ae la e ka Rev. H W Peok, i kokuaia e ka Rev. D P Burnie, o Misita D W Kobeta me Masi Me Walakahauki, ma kahi noho o na makua o ka wahine ma alanui Nuuanu. A ma ka Miowera o ka Poaha mai i holo aku ai laua no Kanada e hoohala ai i ko laua mau la mua iloko o ka noho mare ana.
Auwina la o ka la 30 o Aperila, ua hele aku kekahi o na makai kaulio e hoolimalima lio holoholo nona i kekahi o na hui kaa e ku nei ma alanui Papu, a loaa mai la. Me kona ona no i hookiki kaha iho ai ma na alanui a hoea i ka Halewai, a ilaila i makaikai loihi mai ai o Paka iaia a haawiia ae la ke kauoha no kona hopuia no ka ona. I kona wa i huliia ai ua loaa aku he pu panapana ua piha i na poka, a ua piha pu no hoi me kekahi eke o kona lole wawae i na poka.
-
W.H. DANIELS,
[BILA DANIELA]
Agena Kuai, a Hooponopono Aina, Mea Hana Palapala Kanawai, Mea Ohi Aie a pela aku.
O na hana a pau e haawiia aku ana iaia, e lawelaweia no ia me ka eleu a me ka omoole.
Keena Hana a me Wahi Noho, aia ma Wailuku, Maui.
mei 6-mk.
-
Hoolaha Hooko Moraki a me
ke Kuai.
Ke hoolahaia aku nei ma keia mamulio kekahi mana kuai i hoikeia maloko o kekahi moraki i hanaia i ka la 21 o IANUARI M.H. 1887, e D KAPOI, KAHAULELIO (w) a me L.W.P. KANEALII, kana kane mare, no Waihee lakou a pau, Apana o Wailuku, Mokupuni o Maui, i ka Hawaiian Commercial and Sugar Co., he hui i hoohuiia, a kopeia ma ke keena o ka Luna Kakau Kope Aupuni maloko o ka Buke 102, ma na aoao 498 me 499, ke manao nei ka Hawaiian Commercial and Sugar Co, e hooko aku i ka moraki i oleloia no kekahi uhaki ana o na kumu i hoakakaia ma ka moraki i oleloia, oia hoi: ka hookaa ole ia o ke kumupaa a me ka ukupanee ke hiki i ka manawa.
Ke hoolaha a aku nei no hoi ma keia e hoolilo ia aku ana na aina, na pono a me na pomaikai a pau i hoikeia a i hoakakaia ma ka moraki i oleloia ma ke kuai kudala akea, aia ke keena kudala o George Hons ma Wailuku, Maui, ma ka POALIMA, la 31 o MEI, M.H. 1895, ma ka hora 12 o ke awakea o ka la i oleloia.
Eia iho ka hoakakaia ana o ka waiwai ma ua moraki la, penei:
1 - O kela mau wahi a pau loa i hoakakaia maloko o ka Palapala Sila Nui Helu 7654, Kuleana 11257 no Waiolama, e loaa ana he ili o 71-100 o ka eka ma Waihee i olelo mua ia, a i hooliloia ia D. Kapoi i olelo a ma kekahi palapala hoolilo a Waiolama i oleloia, i kopeia ma ka Buke 20, ma na aoao 263 me 264.
2- O kela mau wahi a pau loa i hoakakaia ma ka Palapala Sila Nui Helu 1226 no Kihuluhulu a me Kapoi i oleloia, e loaa ana he ili o 29 87-100 eka ma Honuaula, Maui, a no D. Kapoi i oleloia ia kuleana a pau loa ma kona ano oia kekahi o na mea ma ka Palapala Si a a mamuli hoi o kekahi palapala hoolilo mai ia S D W Kanuha, i kopeia ma ka Buke 78, ma na aoao 358 me 359.
3- O kela mau wahi a pau loa i hoakakaia maloko o ka Palapala Sila Nui Helu - Kuleana 3960 no Napahoa, e loaa ana he ili o 1 44-100 eka ma Waihee i olelo mua ia, a o ia no hoi na wahi i hooliloia mai ia D. Kapoi i oleloia ma ka palapala hoolilo a Moses Kealoha, i kopeia ma ka Buke 46, ma na aoao 156 me 157.
4 - O kela mau wahi a pau loa i hoakakaia ma ka Palapala Sila Nui Helu - Kulenana 3925 no Nika I, e loaa ana he ili o 932-100 eka ma Kaanapali, Maui.
5 - O ka pono, kulenana a pomaikai a pau loa o Kahualelio i oleloia iloko o kela mau wahi e waiho la ma Waihee i olelo mua ia, a i akaka i ka heaia o kahi o Haaheo, a i hooliloia ia Polly Kalua ma ka palapala hoolilo a W. Kahinu, i kopeia ma ka Buke 84, ma na aoao 262 me 263, a o ia no hoi ka i hooliloia mai ia Kahaulelio i oleloia ma ka palapala hoolilo a Polly Kalua me Jno W Kalua, kana kane mare, i hanaia i Ianuari 14, 1887, a i kopeia ma ka Buke -, aoao-.
HAWAIIAN COMERCIAL AND SUGAR COMPANY.
Kulike na Kumu. Ma ka aoao o ka mea kuai ka lilo no na palapala.
No na mea hou aku i koe, e ninau ia
JOHN RICHARDSON,
Loio no Hawaiian Commercial and Sugar Comapany, a i ole, ia
GEORGE HONS,
Luna Kudala.
Wialuku, Maui, Mei 4, 1895.
[mei 6 - 4 pl.]