Ka Makaainana, Volume IV, Number 7, 12 August 1895 — Page 8
8 HONOLULU, OAHU, POAKAHI, AUGATE 12, 1895.
[Hoomauia mai ka aoao 5]
-
wale hoi kana mau olelo me ka uku ole. Ea, aohe no ka hoi he oluolu aku a koe mai. Ua like nae hoi kela mau dala a ke Aupuni e uku ai me 5 pa-keneta maluna o $1,000,000. Ola no.
-
Aihue maopopo loa i ko ka lehulehu mau pono a me na dala pu. Pehea hoi kela $10,000 i hooholoia ai i keia mau la aku nei? He mea wale no ka ia e loaa ai o ka ike i ke Aupuni. Aia a pau ke dala, ua ekeeke kela, a ua hoka hoi ke Aupuni, alaila paha ike na pookoi o keia au. Nui no ka maalea o keia nahesa.
-
O ka Loio Kuhina no ka mea nana keia kumuhana i onou ae imua o ka Aha Senate ma ko ke Aupuni aoao. Lehulehu na halawai kukakuka i malamaia e ka Aha Kuhina a me kekahi poe kalepa a poe e ae no keia kumuhana, aohe nae hoi i akaka ka mea i hooholoia, a ua lehulehu no hoi na hale kalepa koikoi i kono ole ia. He keu no paha a ka apiki.
-
Ua akaka loa aenei hoi ka hupo o ka Papa Hoonaauao. Aohe ae o ka Ahaolelo e hooholo i puu dala no ke kuai mai ia Kaakopua a me Keoua Hale. Nui loa kela mau dala, a ua ahona no e kuai ae i wahi okoa a kukulu aku no i na hale no ke kula kiekie; aole hoi i kela hale nani me ka nui o ka lilo no ka hoomae mae ana, i wahi no kahi poe e noho haaheo a haakei mai ai malalo o ko ke Aupuni mau lilo. Pololei!
-
Wahi a ka lonoia i ka auwina la Poaono nei, ua halawai iho la ka Aha Kuhina a hooholo e huikalaia o Gareiga a me Masela, e waiho mai nei ma ka Halemai Moiwahine, ina nae hoi laua e haalele mai i ka aina nei. Aia a kokoke e make, wikiwiki e huikala. Malia he wahi hana maalea nei e hoomalimali ia Beritania Nui a me Amerika Huipuia, oiai, he Pelekane kahi a he Maleka kahi, no ka mea e pili ana i na koi poho. O ka pono loa no oe kuu akea ae no a pau loa, he makehewa hoi ka paa wale ana no, a me ka hoao ae hoi e hoomalimali. E mali wale no aohe e hala, e uku ana no, oiai, ua ku no i kahi o ka hewa.
-
Ma ka Auseteralia i huli hoi mai ai kekahi o na pio kalaiaina i kipakuia ai i na aine e, oia o P.G. Camarino. Ua paaia oia aole e lele mai iuka nei, a mahope o ka loaa ana aku he palapala mai ia Kuhina Haki aku i ka Luna Kiai Awa, ua aea oia e lele mai.
Lawe a Lilo ka Hoku.
Piha makolukolu ke kahua kinipopo i ka auwina la Poaono nei i na poe makaikai, e ake ana e ike nawai ana la e ahai ka lanakila o ke kahua mokomoko. Ma ka nana aku i na poe paani, aia iloko o lakou pakahi ka uwila o ka manaoio hana maoli e loaa ka lanakila. I ke komo mua ana no a Ikeoleie he neo ka mea i loaa, a i ke komo ana aku hoi a ka Hoku, loaa elima ai-puni. I keia manawa i pii mai ai na manao uilani ma ka aoao o ka Haku a hiki wale no i ka eo ana me ka paani ole ia o ke komo eiwa ana. Malalo iho e ikeia ai na holo
1 2 3 4 5 6 7 8 9
Ikeoleia 0 2 2 0 1 0 1 2 0 – 8
Hoku 5 0 0 0 2 1 0 3 * - 11
He eono iho la eo ana i ka Hoku i keia wa.
O Kamehameha me Hoku i keia Poaono iho.
-
KELA A ME KEIA.
-
Ma ka la 22 ae nei e ku mai ai ka Monowai mai na Panalaau Hema mai.
E nana ae na poe kuleana i ka pa ilina o Koula i ka hoolaha e puka aku nei.
Ua hoi mai nei o W.N. Limaikaika ma ka Belegica mai kaua huakai aku nei i Iapana.
Ke pii ae la ka oluolu o ka haole makai kaulio i hou ia ai i ka pahi e Keo, mauka o Koiuiu.
Apopo e holo aku ai ka Pekina no Kina me Iapana ke pau ae ka hanaia ana o kona epaepa i poino.
Ma ke Kalaudine o ka Poalua iho la i huli hoi aku ai ka Ilamuku i pau Hikikoki a me ka wahine no Hilo.
Aia o Alapoki Kauka a me kona ohana i Kualoa, Koolaupoko, kahi i hoomaha a hoohala manawa ai.
He eono ka nui o na heihei waapa e malamaia aku ana malalo o Manana, Ewa, ma ka 21 o Sepatemaba aenei.
Ma keia holo ana mai nei o ka Pekina ua hakiia iho la kekahi epaepa o kona huila, a o ia kekahi mea nana i hooulolohi loa iaia.
Ua lonoia ae ua pau aku na koi poho a na poe Pelekane i hoopaahao hewa ia ai i ka waiho ia aku e ke Komisina Beritania imua o ke Aupuni.
Ma keia huli hoi ana aku a ka Auseteralia, e lawe pu aku ana oia i ka lio heihei Lolokulani no ke komo pu ana aku e heihei me na lio o Kaleponi.
Ua haalele aku ia Kapalakiko he eha hora mamua o ka haalele ana aku o ka mokumahu Auseteralia ka mokupea Barena no Honolulu nei.
O ka mokupea Beritania Edinabuga mai Ladana mai no Tacoma, ua ku aku oia ma Valaparaisa, mamuli o ka make ana o ke kapena.
Ua haawiia iho nei ia G.P. Kamauoha he laikini loio piha imua o na Aha a pau o keia Aupuni e Lunakanawai Kiekie Alapaki Kauka.
Ua hanau mai na ka wahine a J.H. Wudehausi opio, i ka wana o Poalua iho la, la 6 nei, he keikikane.
Ua hookohu aku ke Aupuni ia G.W. Kamika a me J.F. Hakafila i mau lala no ka papa kahu o ka Halemai Moiwahine.
Loaa hou mai nei no ka lono no ka huikau ae o na kaupaona kanawai o Maui ma kekahi o na hale o Iana-Hi. Maea no la!
Ekolu mau Pake aeahaukae i hoounaia e ka Lunakanawai Apana i Kawa i ka Poakahi iho la, a ilaila lakou e noho ai no eha malama pakahi.
Ua hoopauia o Kale Notele opio mai ka nono luna dute ana no Hilo, a ke paniia la kona wahi e T.A. Wala a hookohuia kekahi mea ma ia wahi.
No ko Pilipo Lui ae ana i kona hewa imua o ka Aha Apana i ka Poalima nei, no ka hoeha ana ia Ahulau, ua kopiia oia he $10 a me na koina.
E haawi ana ka Hui Waapa Leilani he hulahula maloko o kela halau nui e ku nei iwaho o Pawaa, oia ka Paka Kuokoa i keia Poakolu iho.
He heluna nui o na kumukula o Kaleponi ka i hoea mai ma ka Auseteralia no ka makaikai a me ka hoohala ana i kekahi mau la ma ko kakou mau kaiaulu nei.
E holo mai ana no Honolulu nei ka mokukaua Amerika Olimepia ma ka la 20, a mahope o kona ku ana maanei no kekahi mau la, e holo loa aku ai oia no Kina.
Ma ka hora 2 o ka wanaao nei i hekau mai ai ka mokumahu hou Aselouna iwaho o Mamala, a i ka hora 4 i hookomo mai ai a pili ma ka uwapo makai iho o ka Hale Dute Kahiko.
E ku aku ana he hale keaka Pake hou ma nei mua iho ma alanui Moi nei, kokoke no i ka hale keaka e ku nei. E loaa ana ua mea hanakuli hou i na poe e noho koke ana malaila.
Mamuli o ke paonioni o na hui o Kewiki Ma a me Hakafila Ma, na ko lakou ano agena no na mokumahu, ua haule loa ka uku ohua no Iapana mai ka $20 a ka $9. E haule hou iho ana paha.
Po Poalua iho la i haawi ae ai ke Kuhina Amerika a me Misasa Wilisi he aha hoolaulea i ke kapena a me na alii o ka Beninetona ma ko laua wahi noho ma alanui Moi nei, ma o iho o Kamaki Kuea.
Ua hookohuia o A.W. Kaaka i Hope Loio Kuhina, a nana e lawelawe aku na hihia hewa haole imua o ke kiure ma keia kau. A i kahi loio Aupuni hoi o ka Aha Apana, Gadeila Vena, iaia na hihia hoohalahala mai lalo aku.
Awiwi loa ka makou hoike ana ma ka helu i hala no ka hookuuia ana o Misasa Luahiwa a me A Mokimana mai ko laua hihia moekolohe i hopuia ai a i hoole heia iho nei imua o ka Aha Apana. I ka Poakolu iho la no i pau ai a hookuuia laua.
Mamuli o ko Lahapa (w) a me Palaha (k) ae ana i ko laua hewa imua o ka Aha Apana i ka Poalima nei, ua hookauluaia ka hoopai ana ia laua no ka hana bia a ko ke Aupuni wa e makemake ai. A pela no hoi me Piikoialii, Hose a me Lii i ka Poaono nei no ia ano hewa like no.
He 75 tini hapa-paona opiu na i loaa i na kiai o ka Oihana Dute mamua o ka moku kiapa Velosite i ka Poaha nei. Mawaho ae o keia, he elua tini nunui ae o eha paona pakahi.
Ekolu la o ka hookolokoloia ana o Kimo Kupihea imua o ke kiure, no ka hewa powa i kekahi Pake o uka o Kalihi, a ua hookuuia. Laki no, ma ka apua ke ola. E ole nae ka loio o ka aoao Alii, oia o Numana, pakele ai.
Eia no ke paa nei maloko o ka Halewai o Keo Koa, ka mea nana i hou kekahi makai kaulio mamua aku nei. Aole ana mau olelo iki e pili ana i ke kumu o kona hou ana i ka makai me ka pahi. E kaliia ana kona hookolokoloia a oluolu pono ae ka haole e noho nei ma ka Halemai Moiwahine
Eia malalo ae nei o Kikihale kekahi wahine Hawaii, pela mai ko makou lohe i hele aku imua o kekahi kahuna e hana aloha ai i kana kane Pake, i ole ai e hoi aku ua keiki lauoho loihi la i kona aina hanau maluna o kekahi o na mokumahu e ku mai nei O keia Pake, o ke kane no ia a ua wahine la e noho mai nei, a aole ona makamake e hoi ua Pake la i kona aina e mare wahine Pake ai. Kupaianaha no hoi na hana la. Aloha loa aku la no paha i ke keiki o Kina.
Molekulehu loa o ka Poalima nei i hookomo mai ai ka mokumahu Belegika mai Kina me Iapana, me 35 Kepani, 500 Pake poe limahana no onei Hora 4 o ke ahiahi Poaono nei i niau loa aku ai oia no Kapalakiko. I ka po Poalima nei no hoi i mo-ku mai ai ke Kulanakauhale o Pekina iwaho o Mamala mai Kapalekiko mai, a i ke kakahiaka Poaono nei i hookomo loa mai ai a mo ku makai iho o ka uwapo o Poka ma. Hora 4 o ke ahiahi Poaono nei i kakae loa aku ai no Kapalakiko.
-
Hui Mea Kahiko Hawaii.
Kuai mai a hoolilo aku i na ano mea kahiko a pau o kakou nei, na Peahi, na Eke-Lauhala a ano e ae paha, na Moena, a pela aku, ma Alanui Moi, mauka ae o ka Hale Repubalika.
HARRY SAYLOR.
aug. 12-tf. Luna Nui.
-
Hoolaha Ilina.
O na mea a pau e loaa nana ia lakou he kuleana ilina ma Koula, ke konoia aku nei lakou e oluolu e hele ae ilaila ma keia Poalua ae, la 13 o Aukake, hora 10 o ke kakahiaka.
F.H. VALENTIN.
aug. 12-1p.
-
HALEPAI MAKAAINANA.
-
F.J. TESTA (Hoke) - - Ona
Aia ma Alanui Konia, mauka o ke kihi Akau, ma ka huli ma Ewa, o Alanui Moi.
Ua makaukau loa e hana i na ano hana paipalapala a pau loa, e laa
Na Bona,
Na Aelike,
Na Laikini,
Na Palapala Kono,
Na Likiki,
Na Bila-poo,
Na Hoolaha Pai Alanui,
A pela aku, a pela aku.
NA HANA BUKE A ME PAI NUPEPA.
Aia malaila e paiia nei na nupepa "Ka Makaainana" a me "Ke Kuokoa" namu.
E hookoia no na kauoha me ka hikiwawe a me eleu. iul 14-mhp