Ka Makaainana, Volume V, Number 3, 20 January 1896 — Page 4

Page PDF (889.10 KB)

4 HONOLULU, OAHU, POAKAHI, IANUARI 20, 1896.

KA MAKAAINANA,
HE NUPEPA OILI PULE.
-
W.H. KAPU,
Ona, Luna Nui a Lunahooponopono.
Wahi noho, ma Honolulu.
F.J. TESTA (Hoke),
Puuku.

                    KEENA: Helu 327, Alanui Moi, kokoke i Alanui Konia.

-
UKU O KA NUPEPA.

No Ekolu Malama - $.50
No Eono Malama - - 1.00
No Hookahi Makahiki - - 2.00

UKU O NA LUNA NUPEPA.

5 Inoa - - - .15
10 Inoa - - - .20
Maluna aku o 10 Inoa - .25
                    Me ka puuku wale no na hookaa dala ana, aole i kahi mea e ae.

-
POAKAHI, - IANUARI 20, 1869.
-

                    I HOOKAAWALEIA no paha hoi kela mau iwi Alii i loaa ai he kowa e waiho ai na iwi o Peresidena Kole iuka o Maunaala, ka hale ilina i laa no na iwi o na alii o Hawaii nei? Oia, pela no, wahi a na olelo a ka lehulehu o keia mau la iho la. Pololei!

-

                    MAKEHEWA na poe i ike ole ia a i hilinai ole ia hoi ke kauoha mai i ka nupepa me ka hoouna pu ole mai i ke ola. Aole i manaoia e hoopoho wale i ka hana, aka, e loaa hoi paha he wahi pono iki, i hiki ai no hoi ke hoomauia aku me ka hoomanawanui Nolaila, o na kauoha mai o ia ano, aole loa e hoomaopopoia aku ana e makou, oiai, he hooluhi wale no ka pane aku, a o ka pahu opala no ko lakou hopena kupono loa.

-

                    O KAHI mea hilu loa iwaena o na lono hoohuiaina i loaa mai, aia na nupepa o Nu Ioka a me Kapalakiko i kokua ikaika ai i na hana kaeku a lakou nei ma ae mamua ke huli hou mai la a nanali mai no ia lakou, ma ke kue ana i ka manao hoohuiaina me ka lohe mua ole ia o ka manao o ka lahui nona ka aina. Aia hoi, nanali la! Malia no ka loaa maunu ole aku paha. Kupaiaanaha keia loli ano e ana o ia poe i kokua mua i na hana kaili hewa, a ko ai no hoi ka mea i oleloia - "he wa no e ikeia ai ke kolohe."

-

                    EKOLU MAKAHIKI i hala ae, i ka la 17 noi, o ka noho mana ana o lakou nei ma ae ma ka hoeuli o ke Aupuni a lakou i kaili aku ai, a iloko o ia manawa, mahope iho o ka hehiku nui ana i ka lakou mau hoohiki mua, heaha ka mea i loaa ia lakou? Mawaho ae hoi o na kulana hanohano a me na oihana e ulakolako a e haakei ai ka noho ana, ua oi loa aku ka mamao o ka iini nui o lakou i ka wa o ke kuehu nui ana i ko ka hale poe ponoi, oia hoi, ka hoohuiaina. Oia nae paha hoi, mawaho lakou ia wa, a eia nui hoi maloko i nei wa.

KE ALA O KA LAULEA OLE.
-

                    Ina o ka laulea o ka noho'na o na aoao kalaiaina a pau a me na lahui a pau o kakou nei ka mea i makemakeia, mahope iho hoi o na hana aloha a ke Aupuni ma ka hookuu ana ae i na pio kalaiaina a pau, alaila, aole o na hana o ka Poalua iho la, i lawelaweia mauka o Maunaala, ma ka lawe ana aku i na iwi o na Moi Kamehameha II. me Kamehameha III. a waihoia iloko o ka luapao a ke Alii Pauahi no ka ohana alii Kamehameha a pau, ka mea e loaa io ai o ia haawina. Ka i no paha hoi i ka pau ana ae o na pio i ka hemo i ka la mua o nei makahiki, e hoomaka mai ana la hoi na hana no ka hoolaulea ana mai i ka lahui a me ka aihue pu aku hoi i ka manao, eia ka auanei hoi aole loa, aka, e hooi loa ia aku ana na hana e hiki ole loa ai ke loaa ia haawina, oia hoi, mahope mai nei o ke kaili ana i ke Aupuni a me ka aina, hoohaahaa a hoohilahila i ke Aliiaimoku o ka lahui, a me na ano hana e ae e hoohaahaa ana a e hoomaopopo ole ana hoi i ka pono o ka lahui kumu.
                    Ke ole makou e kuhihewa, i ko ka Moi Kalakaua wa i ae ai i ka manao hunakele loa o ka palapala kauoha hope loa a ke Alii Pauahi, ua aua mai oia i na iwi o keia mau Kamehameha, no ka mea, he mau alii kiekie loa lana, oia hoi, he mau niaupi; a aole hoi o ia wale ke kumu, aka, he mau mamo laua na Keopulani mai, ia mahele o ka lalani alii Kamehameha, he kupuna no hoi nona a me na lala a pau o kona ohana, a mamuli o ia maawe i pili aku ai lakou i ka lalani alii Kamehameha, a he poe alii Kamehameha no hoi ka olelo ana no lakou, i hiki ole loa hoi ko hooleia i keia au. Mamuli o ia mau kumu i paaia ai, eia nae, aia a ua hala oia a ua haule hoi kona kaikuahine, ke Aliiaimoku e ola nei, mai kona kulana aku o ka hanohano a me ka mana, ua oni hou mai la ka o C.R. Bihopa a ua aeia aku hoi kona manao e ke Aupuni o ku nei ma o ke Kuhina Kalaiaina la.
                    A hiki mai la nae hoi i keia wa, oiai no ka aina nei e noho ana me ka laulea pono a like ole o na ano lahui like ole me ka lahui oiwi, ua kaa aenei hoi na ke Kuhina Waiwai e hooi hou ae i ka hoomakili ana i ke kulana i makili mua; a ma kahi hoi o ka hoolaulea mai i ka lahui, ke hanaia mai la no nei hana hoehaeha a hoowalania i mea e hooi loa aku ai i ka mamao o ia mea. Ka i no paha hoi ua ana lakou nei ma ae, a o ka noho like aku ka hopena i makemakeia ma na ano a pau, eia no ka auanei hoi aole i ana, a he mau hoopalaimaka wale ana no ia a ka poai hemolele o noho mana nei ma ke ano "uhiuhi lau mamane." Nolaila, no makou iho, aole makou i makaukau e hoolaulea aku, a me he la, pela mai ana no paha hoi ka lahui e kakoo mai ai ia makou.

-
PAU KAKOU I KA HOOHUIIA.
-

                    Ae, o keia ae la ka lono i loaa mai i ka Poalima nei ma ka Alameda mai, oia hoi, aole kakou i lilo a i pau loa i ka hoohuiia e Amerika Huipuia, aka, ua waihoia aku he olelo hooholo hui imua o ka Hale o na Lunamakaainana o ka Ahaolelo. Na Lunamakaainana Spaulding (Repubalika) o Misigana i waiho aku ua olelo hooholo la i ka la 8 nei, a mahope iho o ka heluheluia ana, ua haawiia aku i ko Komite o ko na Aina E. (Mamuli o ka piha loa o keia helu me na mea pili kuloko e ae, ua hiki ole ia makou ke unuhi ae a hoopuka koke aku i ua olelo hooholo nei, nolaila, ua waihoia aku no hoi ia a no nei mua aku.)
                    Ma ka manao o ka ohua palemo alaula, na moakaka a maopopo ole na olelo o na olelo hooholo la, eia nae, o ka hua apala o ke Kai Make, o ia nei makana Makahiki Hou a ka poai Repubalika o Amerika Huipuia i haawi mai la ia Misita Kole ma o nei a hiki ae i ka makahiki 1898. No makou iho hoi, aia ko makou haaloulou ana maloko, no ka mea, i ke kilohi pono ana iho, ikeia iho la no he haawina puanuanu loa ka mea e loaa ana ia lakou nei ma ae o nei; a i ka lahui Hawaii hoi, he olino mai o ka malamalama no ka hoailona ana mai i ka hoomaka ana o ka hopena o ka noho mana haakei ana mai o na poe o keia au ole garesia e ku nei. A e hewa ole no hoi paha ia makou ke olelo ae, mai mua mai a hiki mai no i nei wa, he hoa'loha oiaio a maikai o Peresidena Kalivilana no ka lahui kumu a oiwi o Hawaii nei.
                    Ua ike a ua hoomaopopo iho makou aia no he wa e hoea mai ana e loaa ai ia kakou he leo no ka hana ana i kumukanawai hou no ka aina nei, a i ole ia, he koho ana paha hoi no ka ninau hoohuiaina. O keia hiona ae la ka makou i anoi nui ai, a pela no hoi me na poe hoa'loha oiaio o Hawaii nei. A oiai hoi na balota e hoomakaukauia ana, ke olelo aku nei makou ia kakou a pau, e hakilo pono ia lakou nei ma ae, ia lakou no a pau loa, no ka mea, ua aoia mai no kakou e na wai i hala ae aohe mea hiki ole i keia poe hoomaemae Hemolele ke hana, o na ano hana maalea a pahele no a pau, aohe mea koe aku. "O ka makaala mau loa ke kumukuai o ka lanakila."

-
"HAEHAE KA MANU!"
-

                    He mau pule i hala ae, ua make kekahi kanaka mamuli o kekahi ulia kaamahu ma Wailuku, mamuli o ka inoino o ka hanaia ana o ke alahao. Ua hooholo ka aha koronero i make kela kanaka mamuli o kela ulia. Mahope iho o ka puka ana ae o ia olelo hooholo, ua holo mai ka luna nui o ka mahiko o Wailuku ianei, oiai, no ia hui kela alahao.

-

                    Iaia ianei, ua aoaoia aku paha hoi oia o Pi Ki Keoni, peresidena o ka hui kalepa o C. Burua Ma, a hoi koke aku oia, a ia wa i haiia hou ia aku ai ma kahi o ka ulia i loaa ai, a mamuli o ia ua nalowale aku na ano a pau e ike lea ia ai o ke kumu i loaa ai o ka ulia. A mahope aku nei hoi ka Ilamuku kamalii a me kekahi eneginia i kamaaina i na alahao, a ua waiwai ole ka laua huakai.

-

                    Hoi mai nei hoi laua, ua waiwai ole ka laua hoike o ka ke Aupuni hoou ia ana aku nei ia laua e hoomaopopo, a o ka hopena o ia hana, e waiho hoopopopuluia ana kela karaima. Owai ka i hewa? O kela hui mahiko no, a na ke Aupuni paha hoi ka pono e hoopii aku, mahope iho o ka puka ana o ka olelo hooholo a ka aha koronero.

-

                    Malia e popopulu loa io aku ana no, no ka mea, he kanaka maoli ilihune wale no ka mea i make. Ina paha hoi he haole, eeu koke na puapua o lakou nei ma ae. Eia nae, ua nalo loa aku la na moali e akaka ai o ka hewa, a ua hauoli paha hoi ka Loio Kuhina no ia mea, oiai, ke ole makou e kuhihewa, oia no kekahi mea i kuleana i ua mahiko la.

-

                    Aia hoi ka pono ma ke kanawai ma ka aoao o ka mea i make, a he mea pono hoi i kona ohana, ina he ohana kahi ona, e koi poho ae i kela hui mahiko. Malia ua nele a ua ilihune, pehea la e hiki ai ke hoopii aku? O ka makou hoi ia e olelo ae, ina no hoi paha e kokuaia ae, loaa no hoi paha he hooko ana no ka makemake.

-

                    Ua maopopo loa ua loihi na la i hala ae, aole loa he eueu iki ae o ko ka Loio Kuhina puapua, a ma ona la i moe lolii loa ai ke Aupuni. Malia o ke alanui hookahi aku no nei me kekahi mau hana e ae o keia au, he kinai wale ia no me ka hoomaopopo ole ia,