Ka Makaainana, Volume V, Number 3, 20 January 1896 — Page 6
6 HONOLULU, OAHU, POAKAHI, IANUARI 20, 1895.
NA AINA MAMAO.
Mau Lono Huikau mai kela a
me keia Wahi Like Ole.
Ao Omamalu Kaua o ke Ao a Puni.
O ka lono kaua i puoho ae mawaena o Amerika Huipuia a me Beritania Nui, ma na lono hope loa mai nei, me he la na lilo aku ia i mea koiaweawe loa a o ka nalo loa aku paha hoi koe. A i keia wa hoi, ua puoho hou ae ia ma Europa, mawaena o Enelani a me Geremania, e pili ana no kekahi okana-aina ma ka hema-hikina o Aferika. Wahi a ka oleloia, ke ake la o Enelani e hoohui aku ia Taranavaala, he apana panalaau no Holani, aka, ua kuokoa ae nona iho ma ke ano he Repubalika, i loaa hoi he hoomahuahua ana ae i ka Panalaau Lae, ma Aferika Hema. Nolaila, ua makemake ole o Geremania i keia hana, no ka mea, he hoohahana loa ana aku hoi ia i kona mau panalaau, a ua hoaano ae ia Enelani. O kekahi ka o na kahua hana a Geremania, o ia no ka hoouna ae he 500,000 koa ma na moku a lawe pio mai ia Ladana iloko o elua a ekolu paha la ma ia hope iho. Ma ko Kouna vona Moloke manao, ua ike oia he eiwa mau ano e hiki ai ke komo aku ia Enelani, aka, aole loa he ala e hiki ai ke puka iwaho. A hiki hoi i keia wa o ko Enelani kulana, ua ikaika loa oia ma na mokukaua, a ua loaa ole hoi he wahi e hiki ai i kahi pualikoa kuwaho ke komo aku.
Ma ko Enelani aoao hoi, aia no oia ko hana la i na moku kana me ka manao e aa mai i ke ao holookoa, a me ka oleloia no hoi ina o Geremania e hoao ae ana o hoeu me ka manao e neeu mai no na palena o Enelani, iloko o iwakalua-kumamaha hora, e hoea aku no he heluna nui o na mokukaua Beritania ma ka waha o ka Muliwai Elebe a ma ka hookomo ana aku o ke Kategata, alaila, o ke panikuia aku no ia o kona mau aumokukaua o ke Kai Balatica iloko o ia kaikuono. Ua hooiaia hoi ko Rusia kokua ae ia Geremania, a e hana pu aku no hoi o Farani me Rusia. Aka, o Potugala hoi, kekahi mea i kuleana ma ke kahi o na wahi e hoopaapaaia la, ia Lorenezo Makueza, ma ke Kaikuono o Delagoa, e kuikawa no oia, aole hoi e ae i na moku o na aupuni paonioni e komo ma ia awa, a i na koa hoi, aole e hele ma ka aina. Nui ke inoia o na Geremania ma Enelani i keia wa, mamuli hoi o ke paee i poha ae la.
Ua loheia no hoi ua uwalo ae o Peresidena Karuga o ka Repubalika Boa ma ka palapala i ka Emeperoa o Geremania a me Peresidena Kalivilana o Amerika Huipuia. O kana palapala i ka Peresidena o Amerika Huipuia, e noi aku ana no ke kokua aku a ia Repubalika nui i ko Beritania manao e hoolilo i ke kuokoa o kona aupuni i mea ole.
Iloko o ka Hale Ahaolelo Geremania, ma Berelina, i ka la 9 nei, i ka hoopuka iki ia ana ae no o kahi mau olelo no ko ano e me Enelani no - Aferika Hema, mai ia Kouna vona Kanita, ke alakai o kekahi aoao kalaiana, ma ka olelo ana ae na aponoia mawaho aku ke kulana manao hana kupaa o ke Aupuni Imiperiala ma ka hoopakele ana ae i ka pono a pomaikai o ka lahui a me ka emepaea Geremania. Ua apoia aku keia mau olelo me na hooho leo paiakuli o ka piha hauoli.
Kokua Rusia ia Amerika Huipuia.
Mamuli o na houpuupu kaua mawaena o Amerika Huipuia a me Beritania Nui a me ka unuhiia aku o na dala-Enelani mai Amerika aku, i ka wa o kela palapala a Peresidena Kalivilana i puka ae ai, ua hoikeia ae ka Rusia kokua ia Amerika Huipuia, oia hoi, he $60,000,000 ma ke gula, a e koe ana no hoi ma kona waihona he $300,000,000. Nui no. Ua oleloia o keia kekahi kumu i kuhau ai ko Enelani poe i ka unuhi aku i ka lakou mau dala.
Aia o Rusia ke hoao la ma na ano a pau i mea e na ai o kona inaina ia Enelani, a nolaila mai paha hoi kekahi kumu o keia kokua, ke ulu io ae paha hoi ke kaua i nui ka walaauia a puni ke ao nei. O kekahi no paha hoi, aia no na maka o ka Bea Keokeo ke haka pono la no ka wa e hiki ai iaia ke lawe a lilo mai ia Inia, ia panalaau nui a ikaika o Enelani.
He mea hiki ole ke hooleia ua ohumu pu ae keia mau mana nui, Rusia me Amerika Huipuia, ke hoea mai he wa no kahi a me kahi paha e kaua ai me Enelani, e haawi aku hoi kahi i na kokua ana ma na ano a pau. O kekahi hoike no kela, aia kela alahao nui a Rusia e hoomoe la ma Siberia, ua maawe aku na aweawe o ka hee mai kona pu aku a ua komo i Peresia, Afeganitana a ma Belukisitana, a ua kiei aku hoi ia Inia. Ma ko Amerika aoao ae hoi, ua manaoia oia e hoomoe i alahao ma Alasaka a hiki i ka palena pau e hiki ai ke hoomoe, alaila, ma na moku e kukai aku ai kahi a me kahi ma ke Kowa Berina.
Hoauheeia na Poe Abesinia.
Ua lonoia ae ma Roma, la 9 nei, ua hoauhee aku na Italia ma Abesinia, Aferika, i na pualikoa o emeperoa Meneliki ma Makelete, ma ka la 7 (Poalua) aku ka ulele ana ae. Nui ka poino ma ka aoao o na paele Soa, a he ekolu wale no hoi na make ma ka aoao o na koa paele o na Italia a me kekahi poe kakaikahi i eha.
Na Hunahuna Laulaha.
E hoomoeia aku ana he elua mau uweaolelo moana mawaena o Iapana a me Foamosa.
He mokuku na ko ka Ahahui Misionari o Ladana i hanaia ma Nu Kilani no ka hana euanelio ma Nu Gini.
Ua kuahaua ae ka Moi o Korea, oiai, e oki ana oia i kona lauoho huelo, ua makemake oia i ko na makaainana hana pu aku e like la me ia.
Lehulehu o na mokukaua Rukini a me kekahi mau waapa-topido i hoi ae ma Sanatuna e hoolulu ai no ke kau o ka hooilo. Oia kahi i lilo mai iaia mai ia Kina mai.
Mamuli o kekahi ulia pahu iloko o ka waihona hoahu lanahu o ka mokukaua Beritania Repulse, i ku kahiko ai i o kakou nei mamua, oiai oia o ku ana ma Chatham, Enelani, ua poino eiwa kanaka.
Elua mau alii o Asanati, Aferika, i manaoia he mau kipi, ke hele la no ka aekai e hui pu ai me ke Kiaaina o na poe paele noho hoa'loha, he ona nui hoi o kekahi waihona hoahu pauda a lako kaua, ma kahi kokoke ia Komasi.
Lehulehu o na poe Korea i komo pu ma na hana pepehi i ka Moiwahine i pau i ka hookoia na hoopai, hui pu me ka mea i ninini ai i ka aila maluna o ke kino make a puhi ahi ia ai. Ua pau lakou i ka liia i ka la hookahi no i hooholoia ai o ko lakou hoopai.
Ua loheia ma Sana Peterobuga, la 9 nei, ua haawi aku o Iapana ia Rusia i ka pono kaokoa o ku kona mau aumokukaua ma na awakumoku a pau o Iapana me ke keakea ole ia, me ka manao e hoolilo i ko Rusia manao e lawe ae i awakumoku nona ma Korea i mea ole a haule pu.
Ke haalele nui la na poe Pole ia Galisia Hikina, ma Europa, no Amerika ka puuhonua. Pela iho la e hooneleia ai ia aina me ka hapanui o kona poe limahana a me na poe mahiai liilii. He elua haneri ohana aia iwaho o ka hau kahi i kali ai no ka loaa mai o ko lakou palapala ae e haalele iho i ka aina.
-
Makehewa na kauoha Buke Mele Lahui ke ole e ukali pu ia mai e ke dala. Ke nele me ia mea, aohe no e hoomaopopoia aku na palapala.
Kulanakauhale Kamahao.
Ua lilo i mea haohao loa i na poe lawaia e noho ana ma na lae kanakai o ka anemoku o Italia, ka hoopoino mau ia o ka lakou mau upena lawaia i na wa a pau a lakou e hele ai o lawaia, i kekahi mau manawa ae nei i hala. Nolaila, i kekahi la ua kauoha ae la na luna aupuni o kahi kauhale hale o Robinigo e hoounaia ona mea nana e luu ilalo e nana ai. I ka hoounaia ana o ka mea luu ilalo o ka hohonu, a ma kahi he 90 kapuai, ua loaa aku la iaia kekahi kulanakauhale nani e ku ana we kona mau alanui e waiho kikeekee ana, na kauhale e aneane aku ana e nalowale mamuli o ka hihia e ka limu, a pela aku. Ua lilo keia he mea pahaohao loa i ka mea nana i luu, a ua olelo ae oia he kulanakauhale nani maoli no Wahi a ka olelo a kekahi kanaka naauao ake akamai, he wahi mokupuni ka hiko kela mamua aku o ke au o Kaisara, a o Sisa kona kulanakauhale. E moe ana hoi ua wahi mokupuni la ma ka aoao komohana o Italia, pela ka hoike a Piline, kekahi o na loea o kela au i o lilo loa. O Iesetiria ka inoa o ua mokupuni la.
-
Aole e puhi ahi ia ana ka opiuma o kahi mokukuna Heneriata a pau ka hoohalahala a na kanaka o ua wahi mokukuna la imua o ka Aha Kiekie.
I ka Poalua iho la i hookohuia aku ai o E. Renken i kapena no na makai kaulio ma kahi o Kuke i hoopauia. He haole iho no, o Wells ka inoa kai hoopiiia, ae la i lutanela.
Ma ka po o ka la 7 iho nei, mauka o Kapalama, ma kahi o D.K. Puhi, i haawiia ae ai he paina hauoli o na makai, a ua ai nui iho lakou a puu na nuku o lakou. A o ka mea lea loa, ua hu a puaa ua poe makai nei ia po, me lio poe la i ao ole ia.
-
NO WAIANAE
O R. & L. CO.
MA NA POAONO A ME NA LA PULE.
E haalele no na Kaamahu ia Honolulu nei ma na hora 9:15 A.M. a me 1:45 P.M o na Poaono. Ke huli hoi mai, e hoea ana i Honolulu nei ma na hora 3:11 a me 5:26 P.M.
Ma na La Pule, e haalele ana ke Kaamahu ma ka hora 9:15 A.M. E hoea hou mai ana i ka hora 5:26 P.M.
NA PALAPALA UKU PUNI:
Papa Ekahi, - - - - - - - $1 75
Papa Elua, - - - - - - - - - 1 25
F.C. SMITH,
Agena Ohua a Palapala Nui.
ok 21-tf
-
Hale Inu Rama o Kaopuaua
(COMMERCIAL SALOON)
Kihi Hikina o na Alanui Beritania me Nuuanu.
WAINA KALEPONI EMI LOA,
Kanakolu Keneta no ka Omole, a
Hookahi Dala no ke Galani,
aia malaila e loaa ai, a o ia no hoi ke ano Waina maikai loa a Van Bergen & Kohler, he hale i kamaainaia no ka maikai o ka lakou Waina, a o Makapoena Ma na agena. Ina o ka mea maikai ka i makemakeia, e pono e hele ilaila, i loaa ai hoi ka mea maikai.
dek 23-mhp.