Ka Makaainana, Volume V, Number 19, 11 May 1896 — Page 6
| This text was transcribed by: | Betty Yang Green |
| This work is dedicated to: | Awaiaulu |
HONOLULU , OAHU, POAKAHI, MEI 11, 1896
MOOKUAUHAU ALII.
Na Iwikuamoo o Hawaii Nei mai Kahiko Loa.
(Hoomauia mai ka helo 18)
Maanei aole e hewa ke hoonohonoho hou ia aku ka Kamehameha ka Nui mau wahine a me na keiki a me kona mau makahiki i hanauia ai, a pela aku.
(a) Kalaninuikupuapaikalani-
(e) Kamehameha I. ka i noho ia Pelenli w, loaa o Maheha Kapulikoliko w, Kahanoku Kamau k, Kaikoolani k. a me Kiliwehi w; me Kaahumanu w, aohe pua; me Kaheiheimalie w, loaa o Kamamalu w a me Kinau w; me Kalanikauikaalaneo Keopuolani w, loaa o Liholiho k, Kauikeaouli k, a me Harieta Nahienaena w.
(i) Hanauia o Kamehameha I. mawaena o ka 1736 me 1740 ma Kokoike, Kohala Akau, Hawaii; noho Moi no ka mokupuni holookoa o Hawaii i ka 1791, mahope iho o ka make powa ia ana o Keoua Kuahuula ma Kawaihae; i ka 1795 noho Moi no na mokupuni hui mahope iho o ka hooili kaua ma Nuu anu; i ka 1810 komo wale mai o Kauai malalo o kona malu; i ka la 8 o Mei, 1819, make oia ma Kailua, Kona Akau, Hawaii.
(o) Hanauia o Liholiho ma Hilo, Hawaii, i ka 1797; kau i ka noho kalaunu i ka 1819, malalo o ka inoa Moi, Kamehameha II; make ma Ladana i Iulai 14, 1824.
(u) Hanauia o Kauikeaouli i Augate 11, 1813, ma Keauhou, Kona Akau, Hawaii; kau i ka noho Moi malalo o ka inoa Kamehameha III., i Iune 6, 1825; mare me Hakaleleponi Kalama i Feberuari 2, 1837, aohe pua; make oia i Dekemaba 15, 1854.
Eia malalo iho na hoakaka a ke kakaolelo kaulana o Hawaii nei, S. M. Kamakau, i paiia ma ka Buke II. o Ka Nonanona , Okatoba 11, 1842, no keia mookuauhau ae.
O keia kuauhau alii, o ia na kupuna o na alii a me na kanaka o Hawaii nei. Ua hoomanamaia aku ma kela wahi keia wahi o Hawaii nei. Ua okoa na alii, a ua okoa na kanaka. Ua hele na alii ma ko lakou aoao kiekie, ua hele na kanaka ma ko lakou aoao haahaa.
O na alii o Oahu a me Kauai, o ko Hawaii a me Maui a me Molokai, hookahi no kupuna. Aka, ua hoomauamauaia aku a ua hui hou aku no nae ma ke kau wahi.
Ma ke kuamoo kuauhau o Nanaulu, ua manaoia oia kekahi o na kupuna o ko Kahiki a me Polapola, no ka mea, mai ia kuauhau mai a hiki ia Moikeha (ua oleloia oia mai Kahiki mai,) a noho ia Hooipo (o Hinauulua) i Kauai, a hanau mai ka laua mau keiki ekolu, o Hookamalii, Haulanuiaiakea a me Kila. A ua lilo o Haokamalii i kupuna alii no oahu, o Haulanuiaiakea no Kauai a o Kila no Hawaii.
Ma ka mookuauhau o Punaimua, oia kekahi kupuna o ko Oahu a me ko Kauai, a me ko Hawaii mau alii. Mai ia Punaimua a hiki mai ia Laamaikahiki, ua oleloia mai Kahiki mai oia a ma Kualoa, Oahu, kahi i pae ai a noho i na wahine eha, no lakou na inoa, o Hoakanuikapuaihelu, Waolena, Manoopupaipai a me Halaula. Ekolu wahine i hanau i ka la hookahi. Na Hoakanuikapuaihelu i hanau mai o. Laulialoa; na Waolena o Ahukinialaa; na Manoopupaipai o Kukonalaa; o Halaula, hanau mai kana o Laapuweluula, he manawa okoa kona hanau ana. Mai ia lakou mai i loaa mai ai kekahi mau kupuna alii o Oahu, Kauai, Hawaii a me Maui.
Ma kahi i hui ai ko Kauai alii me ko Hawaii, o Kalanikukuma noho ia Kapoleiakauila, loaa me ko Kawaii, o Kalanikukuma noho ia Kapoleiakauila, loaa o Kahakumakaliua; o Umi noho ia Mokuahualeiakea loaa o Akahiilikapu, o keia me Kahakumakaliua hanau o Koihalawai, noho ia Keawenuiaumi loaa o Kanaloakuaana.
O kahi hoi i hui ai ko Oahu poe alii me ko Hawaii, o Kaihikapuakakuihewa noho ia Ipuwaiahoalani, loaa o Kaukahikua anuaauakane; o Makakaualii noho ia Kapukamola, loaa o Iwikauiaua, ka mea i noho aku ia Kauakahikuaanaauakane; o Kaneikauaiwilani ka i noho ia Keakealani, loaa o Kalanikauleleiaiwi.
Nolaila, ua hui na alii i hala aku nei, a o na alii kahiko loa ua hui lakou; nolaila, ua hele aku na alii o kela a me keia aina e makaikai a e hana lealea pu, no ka mea, ua olelo pinepine ia pela ma na kaao. Aka, he nui na mea e ino ai lakou, o ke kaua aku a kaua mai.
O na mookuauhau i hoemana manaia o Nanaulu, o Nan, Kapulani, Punaimua, Kuhelani, Hanalaaiki, Kanaloa, Kalahumoku, makalae a me Kahau, a me na poe ie ae. Hookahi wale no mea nona ia mau kupuna i keia manawa.
O na kanaka o keia mookuauhau, mai mua mai a hope, o na mea i hoomanamanaia aku ma na keiki, aole ia no keia kuauhau, i hoomaopopo wale ia no kela mana keia mana i mea e maopopo ai.
(No kahi wa aku.)
Ua hiki i ka manu okalika ke hele i na mile he 25 iloko o hookahi hora.
ILOKO O KA MALUHIA.
Na Huaolelo Hope a na Poe Kaulana.
He kakaikahi loa paha na poe e make aku ana i hiki ke haawi ae i mau huaolelo hope loa mamua o ko lakou hela ana no kela ao, na na poe e ola ana e hoomanao aku. Iwaena o ia poe kakaikahi, eia iho na poe kaulana o na au i hala i loaa aku ia makou ma ka makou no i ana.
Karomowela – Alaila, ua ola au.
Goethe – E hookuu i ka malamalama e komo mai.
Byron – E hiamoe au ano.
Thos. Jefferson – Ke waiho nei au i ko’u uhane i ke Akua, a o kuu kaikamahine i kuu aina.
Augustus Kaisara – Aloha, Livia, e hoomanao i ka loihi o ko kaua noho ana.
Mozart – E hookuu mai e lohe au i kela mau leo mele a’u i hauoli mau ai.
Marie Antoinette – E ka Haku, e hoomama a hoopalupalu i ka naau o kuu poe enemi. Adiu a mau loa, e a’u mau keiki, ke hele nei au e hui me ko onkou makuakane.
Andrew Jackson – Heaha ka pilikia e a’u mau keiki? Ua hooweliweli aku anuei ko’u mau nanaina ia oukou? O, mai uwe oukou. I poe keiki maikai oukou, a e hui no kakou a pau ma ka lani.
Benjamin Franklin – Aole hiki i ke kanaka e make ana ke hana oluolu.
Sa Humphrey Gilbert – Ua like no ko kakou kokoke ana i ka lani ma ke kai e like me ko ka aina.
John Quincy Adams – Kuokoa mau loa!
Socrates – E Crito, ua aie kaua he hookahi moa kane ia Eseculapiusa; e uku koke aku, a mai hole i keia.
Rikeke III. – Aole au e auhee i hookahi kapuai e like me ka loihi o ka hanu ola iloko o’u, no ka mea, o ka Mea e noho mana ana maluna o ke kai a me ka aina wale no ka Mea hiki ke hoopokole i ko’u mau la. Ke make nei au i keia la he Moi no Enelani.
Stonewall Jackson – E a’e aku kakou maluna o ka muliwai o ka make a e hoomaha hoi malalo o ka malumalu o na laau o ka lani.
Bihopa Kerr – E hana i ko ke Akua makemake.
Haku Chesterfield – E lawe mai i hono no Kalaohi.
John Randolph – E haeha! Ehaehe! Kakau iho! Kakau iho! Hoonui ae! Noonui ae!
Winfied Scott – E Kimo, e malama pono i na lio.
Thos. Hobbes – Ke lawe nei au i na ehaeha iloko o ka po.
Isabela o Aragona – Mai uwe no’u a mai hoopau i kou Manawa ma ka pule ana no ke ola o kuu uhane.
Ferederika V. – Aole loa he kulu koko ma ko’u mau lima
Mirabo – E make au iloko o ke o ana o na leo mele maikai.
Haku Bacon – Kou mau mea, e ka Haku, o ia ka’u mau buke, aka, ua oi ae kau Olelo Hemolele. Ua ike au ia Oe iwaena e na anaina, ka waonahele a me na malapua; aka, ua loaa Oe ia’u iloko o Kou luakini.
Robert Burns – Mai ae iina pualikoa hehena e kip u maluna o ko’u he kupapau.
Haku Tenterden – E na kenimana o ke kiure, e noonoo i ka oukou elelo hooholo ano.
Kale II. – Mai hookuu ia Nele e noho pololei.
Kadinela Wuluae – Ina paha ia’u keia mau pono, ua hiki ia’u ke hoopakele i kuu Moi, aia wale no i ke Akua.
William Pitt, ka Opio – Kuu aina, auwe, pehea la au i aloha ai i kuu aina.
Addison (ia Wawiki) – Ua hoouna au ia oe e hele e naua i ka make ana o na poe Karisitiano.
Madame Rolana – Auwe, e ke kuokoa, pehea ka nui o na karaima i hanaia ma kou inoa!
(E hoomauia aku ana.)
Huina Waiwai Nui!
Hoemi Nui Loa La!!
Pomaikai Nui ma na Mahele a pau ma ko L. B. Kerr Halekuai,
Alanui Moiwahine.
30 i-a Kalakoa no 81.
Papale Mauu Laiki no 25 keneta pakahi 12 i-a Kalakoa Huluhulu no $1,
18 i-a Lipine no 25 keneta,
15 i-a Makalena Keokeo no $1.
Na Hainaka Silika. 10 keneta pakahi.
Na Pua a me na Hulu Papale, aneane e haawi wale ia.
Ua makemakeia e lilo pau loa aku na waiwai, aohe hookoe ana iho i kahi mea. o ka emi oiaio keia i ike ole ia mamua. E hele koke mai, i loaa koke no na mea e anoiia ana. Na ka hiki mua no ka wae mua.
L. B. Kerr,
apr 27ti Alanei Moiwahine.
HALEKUAI LAHUI KALAHIKI.
Hehu 405, Alanui Moi, ma Waikiki aku o
Alanui Nuuanu, ma ka aoao mauka, ke keena mua o ka “Hawaii Holomua.”
Ma ia halekuai o na oiwi e loaa ai na anoi a me na paihi o na ano hou loa, e laa
Na Kalakoa, Na Keokeo,
Na Makalena, Na Kinamu,
Na Huluhulu, N. Lihilihi,
Na Kamaa o na Kano, Wahine me Keiki, a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunu kunuia no ka hoikeike ana i na mea kuai.
M. PALAU, Luna Nui
ek 14-tf