Ka Makaainana, Volume V, Number 21, 25 May 1896 — Page 2

2 HONOLULU, OAHU, POAKAHI, MEI 25, 1896.

IO SEPINE
—KA—
EMEPE RESE PUUWAI OLU O FARANI.
MOKUNA II.
KA MA RE ANA O IOSEPINE.

                O Io sepine iloko o kela manawa, ua piha iaia ka umikumamalima makahiki, aka nae, iloko o ia manawa aole loa e hiki iaia ke apo aku i keia mau mea e waiho aku nei imua ona. O ke kanaka hoi e manaoia aku nei i kokoolua nona, ua pakeu aku kona mau makahiki. Eia nae, e launa mau ana no laua i na wa a pau. E noho pu ana laua iloko o ka rumi heluhelu buke, e holoholo lio like ana a e hoohala manawa mau ana hoi iloko o na ululaau ma ke ano he ipo i ka ipo. I ka wa hoi a ka mahina e pahola iho ai i kona malamalama maluna o ua wahi mokupuni la, aia laua e holoholo waapa ana iloko o ka muliwai, hanu malie ae ana hoi i ka olu nahe a ke kehau e ko mai ana mawaena o na kuahiwi, a i kekahi manawa hoi haawi ae la laua i kekahi mele i maa a i panaau like no ia laua, a ua lilo hoi ia he mea hauoli loa i na poe na lakou e hoe ana ko laua wahi waapa palanaiki. Ua hookahaha loa ia na hoa'loha o Iosepine no keia mea. Ua hoike oia i kona manao pilipaa ma na ano a pau imua o Bohane, aka nae, o kona puuwai aia no maluna o Uilama, a ua koho wale iho la no nae oia ia manawa—ua loaa paha ia Uilama he mau hoa'loha ma Enelani i hoopoina ai oia i na hoomanao ana iaia (Iosepine) a me ka mokupuni a laua i walea ai iloko o ko laua mau la opio, kahi hoi a ke aloha i kukuni paa mua loa ai iloko o Iosepine.
            Mahope iho o ka paa ana o ka hipuu o ka hoopalau mawaena o Io sepine a me Bohane, haalele iho la ua keonimana la i na kapakai o Matinuku a holo aku la no Farani no ka hoomakaukau ana i na mea e pono ai ko laua mare ana. Iaia i hala aku ai ua kamailio iho la oia i na makua o Iosepine e hahai ae ka laua kaikamahine iaia mahope iho o ka hala ana o kekahi mau mahina elua, a ma Parisa laua e mareia ai. O keia mau mea a pau, o ia ka na makua i hooko aku ai. Aole no ka makemake maoli o Iosepine ke kumu o laua i hoopalau ai, aka, mamuli wale no o ka makemake o na makua no ka hanohano a me ka waiwai. Hoea mai la kona la e haalele ai i ua wahi mokupuni la. Me ka naau mokumokuahua a me na waimaka e helelei ana i haalele iho ai oia i ka lepo aloha o kona aina hanau a me kahi hoi ana i holoholo ai i kona mau la kamalii. O na poe negero, mai ka elemakule a i ka mea opiopio loa, aia lakou ke hoopuni la iaia me ka uwe ana nona, e hoike maoli mai ana no i ka mokumokuahua o ko lakou naau i ke aloha. Kau aku la ua Iosepine la iluna o ka oneki o ka moku, a huli mai la e nana i kona poe hoa holoholo o na la kamalii e ku pohai ana ma na lae kahakai. Hu mai la kona aloha no lakou a kahe makawalu mai la kona waimaka. O kona puuwai ua piha i ke aloha no lakou. Hao ae la na pea o kona halelana au i ke kai a puhi malie aku la ka makani ia lakou maluna no ka moana nui akea, a ke hoomau la no nae oia i ka nana ana i na kualono uliuli o kona aina hanau a hiki i ka nalowale loa ana mai kona ike ana aku.
            O keia huakai ana e holo nei no Farani, ua halawai me na poino o ka moana. I kekahi la aneane loa ka moku e holoaia iloko o ka hohonu. Ua noho hamau loa hoi o Iosepine iloko o ia mau la a ka ino nui e holapu ana. A i ka wa a ka ino i akakuu mai ai, ua hoohoia ae la ka aina e ka mea nana e nana ana, a o ia ka wa o Iosepine i puka ae ai mai loko mai o kona rumi a hele holoholo ae la iluna o ka oneki me ka nana ana i ke ano o ka aina ana e noho aku ai. Aohe i emo kuu aku la ka heleuma o ka moku a kau aku la oia maluna o ka waapa, e hoeia ana hoi no uka. Pae aku la oia maluna o ka lepo o Farani, a o ia pu no hoi ka manawa i hoea mai ai ke kaa nana e lawe aku iaia. Maluna o ia kaa i kau aku ai oia a lawe pololei ia aku la no ka Hale Fonatinebolo, kahi hoi ana i hui pu aku ai me Alekanedero Bohane. Ua apo mai o Bohane iaia me ka puuwai hamama a ua haawiia mai hoi iaia na hookipa hanohano ana.
            Mamua iho nae o ko Io sepine hiki ana i Fonatinebolo, ua loaa mai la he lono iaia e hoike ana aia o Uilama a me kona makuakane ilaila kahi i noho ai. Ua hoonaue koke ia kona puuwai i kona wa i lohe ai i kela lono, a o kona noonoo maikai ua like me ka lau laau e luli ana i o a ianei. Hoi hou mai la iloko ona na hoomanao ana o kela mau la kamalii o laua e u holoholo pu ai, aka nae, aole loa e hiki iaia ke hooiaio iho ke mau la no paha. A no ia mea, i kekahi la ua kauoha aku la oia ia Uilama a me kona makuakane e hele mai imua ona, oiai, ua makemake loa oia e ike ia laua. Ua hookoia ka makemake o Iosepine a ua pumehana kela hui ana o lakou. I kahi la ae, ua hele hookahi aku la o Uilama e ike iaia; eia nae, o kona makemake ua hooleia mai la e Iosepine. Nolaila, kakau awiwi iho la oia he leta nana a haawiia aku la ma na lima o kekahi kauwa me kona kipe pu aku i ua kauwa la. Ma kela hana ana a Uilama, ua lawe pololei ia aku la ka palapala a haawiia ma ka lima o ua wahine la, a ma ia palapala e ninau aku ana oia heaha la ke kumu nui o kona hana ana mai pela iaia.
[A oili hou aku.]

Mau Olelo Hoalohaloha.

Ia MRS. AMI HOAPILI, D. MAKAINAI, na keiki a me na moopuna:
                LUULUU WALE: O makou, o na makaainana e noho ana ma Keauhou-uka, Kona Akau, ma o ko makou komite la, ke panai aku nei i keia palapala hoalohaloha; a
            NO KA MEA, mamuli o ka lokomaikai o na Lani, ua oluolu i ke Akua, ka Mea Mana Loa, ka lawe ana aku i ka hanu ola o JOHN GREEN HOAPILI, kau aliikane, kou kaikuaana, ko oukou makuakane a o ko oukou kupunakane i aloha nui ia, a hoonele iho la ia oe i ke kane ole, i ke kaikuaana ole, i ka makua a kupuna ole e paiauma aku me ka u kaumaha ana nona; a
            NO KA MEA, o makou o na hoahanau Hoole Pope, mamuli o kona lokomaikai, ua haawi manawalea mai oia i kekahi wahi o kona aina i wahi e kukulu iho ai i ko makou halehalawai, oia o "Kaukaiuanu," a he kia hoomanao hoi ia na makou e hiipoi mau ai me ka poina ole, a mamuli o ia hana lokomaikai ua lilo ia i mea na makou e hoomanao mau ai; Nolaila,
                E Hooholoia: O makou o na makamaka, na hoa'loha, he mau makaainana hoi no ke alii i hala aku, ke komo pu aku nei e auamo a e hoomaha ae hoi i na kaumaha a me na manao pilihua i kau iho maluna o oukou;
                E Hooholoia: Ke hoomanao ae nei makou e leha aku na maka iluna me ka nonoi ana aku i ka lokomaikai o na Lani e hoomama mai i ko oukou mau luuluu, o ia ka ka Buke nui i olelo mai ai, "Na Iehova no i haawi mai, na Iehova no i lawe aku. E hoomaikaiia Kona inoa."
Me ka paumoko.
                Henr y L. Kawewehi, John Ala, Lorrin Kuhaupio, K. P. Kupaka, Chas. Punahoa.

Waihona Buke Hawaii.

E loaa no na buke ma ka olelo makuahine no ke kuai ma ke keena o ko makou Puuku. Penei iho kekahi o ia mau buke: Laieikawai - - - $1 00 Gaberiela Lenoa - - - 75R. W. Wilikoki - - - - 50 Hookahuli Aupuni o 1895 - 50 a pela aku, a pela aku. O na buke e ae no hoi kekahi, e laa na buke kanawai, a me kahi mau ano e ae, ke ninau pololei ia mai ia F. J. TESTA (Hoke), 327 Alanui Moi. ok 28-tf

HELE HOOLUOLU.
O. R. L. Co.
MA NA POAONO A ME NA LA PULE.

E haalele mai no na Kaamahu i na hora 9:15 A.M. a me 1:45 P.M., a hoea hou mai i Honolulu nei ma na hora 3:11 a me 5:55 P.M. Na Palapala Uku Puni. Papa 1. Papa 2. Manana - - $ 75 $ 50 Mahiko o Ewa - - 1 00 75 Waianae - - - 1 50 1 25 F. C. Smith, Agena Ohua a Palapala Nui. feb 10-tf

Huina Waiwai Nui!
Hoemi Nui Loa Ia!!

Pomaikai Nui ma na Mahele a pau ma ko L. B. Kerr Halekuai, —Alanui Moiwahine.— 30 i-a Kalakoa no $1. Papale Mauu Laiki no 25 keneta pakahi. 12 i-a Kalakoa Huluhulu no $1, 18 i-a Lipine no 25 keneta, 15 i-a Makalena Keokeo no $1. Na Hainaka Silika 10 keneta pakahi. Na Pua a me na Hulu Papale, aneane e haawi wale ia. Ua makemakeia e lilo pau loa aku na waiwai, aohe hookoe ana iho i kahi mea. O ka emi oiaio keia i ike ole ia mamua. E hele koke mai, i loaa koke no na mea e anoiia ana. Na ka hiki mua no ka wae mua. L. B. Kerr, Alanui Moiwahine. apl 27-tf

C. E. Williams me Keiki.
E d. A. Williams, Luna Nui.

Helu 611, Alanui Moi, ma Ewa iho o ka Pa o Aigupita. He mau mea kuai lako hale o na ano a pau loa. He mau mea Hana Pahu Kupapau a Hooponopono Hoolewa. E hoolakoia no na Kaa Kupapau, na Kaa-pio a me na Kaa-ohana. Ina no e ninau ia laua, e loaa no na Pohaku Kia Hoomanao no na He Kupapau. O ka Ialoa kekahi hana hiki loa ia laua, aia ia malalo o ka lawelawe ponoi ana a Ed. A. Williams, F. D., he mea i puka pono mai ka Kalaka Kula o ka Ialoa Maikai ana iloko o Mei, 1894. —NA TELEPONA— Keena, Helu 179 — Kauhale a me Kahea Po. Helu 815. nov 2-mp. feb 3-mp.

J. K. KAHOOKANO.

LOIO a he Kokua ma ka Kanawai. KEENA HANA: Alanui Kaahumanu, Honolulu. ian 8, '94 1mk