Ka Makaainana, Volume VI, Number 7, 17 August 1896 — Page 2

Ka Makaainana.

2            HONOLULU, OAHU, POAKAHI, AUGATE 10, 1896.

 

MOOKUAUHAU ALII.

Na Iwikuamoo o Hawaii Nei Mai Kahiko Mai.

(Mai ka Helu 6 mai.)

KO HOAPILI KANEHOA MA.

            1.  Kaulaheanuiokamoku k noho ia Kalanikauleleiaiwi w, loaa o Kekuiapoiwanui w.

            2.  Kaulaheanuiokamoku k noho ia Papaikaniau w, loaa o Kekaulike.

            3.  Kekaulike k noho ia Kekuiapoiwanui w, loaa o Kamehamehanui k, Kalolawahine-o-Honokawailani w me Kahekilinui-a-Kakae k.

            4.  Kamehamehanui k pio ia Kalola w, loaa ke alii niaupio o Kalanikauiokikilo w.

            5.  Kalanikauiokikilo w noho ia Kanoenoe-a-Peleioholani k, loaa o Kalaniomaiheuila II. w me Kalanionaona k.

            6.  Kalanionaona k noho ia Kamehaiku w, loaa o Kauehoa k.

            7.  Kanehoa k noho ia Kepaleiliahi w, loaa o J. G. Ulumaheihei Hoapili Kanehoa, Hoapiliwahine-a-Kanehoa w me D. Makainai-o-Kuakini k.

            HOAKAKA.---O ka inoa maa mau ma ke kahea mau ia o Kalaninoanoa, aka, o ka inoa pololei maoli, o Kalanionaona k.

            8.  J. G. Ulumaheihei Hoapili Kanehoa k mare ia R. Ami w, loaa keia poe 1-Kahaulemoana w (make); 2-Lydia Kamakanoe; 3-Albert Kalemoanoa; 4-Ino Kupakee; 5-Davida K. Hoapili I (make) 6-Davida K. Hoapili II.; 7-Wm. Lumaheihei (make); 8-Maria Kalehuaikawekiu.

            9.  Hoapiliwahine-a-Kanehoa w me kana mau kane, he mau pua lehulehu me na moopuna e ola nei.

            10. Makainai-a-Kuakini k mare ia Kauina w loaa keia poe 1-Jesse Makainai k; 2-Keeaumoku k; 3-Kepaleiliahi w; 4-Kaumaumaeha w; 5-Hoapili liilii k; 6-Paulo Hoapili k.

 

MA KA AOAO O KAMEHAIKU (W.)

            11. Liloa k noho ia Akahiokuleana w, loaa o Umi-a-Liloa k.

            12. Umi-a-Liloa k noho ia Kapulani w, loaa o Keawenui-a-Umi k.

            13. Keawenui-a-Umi k noho ia Koihalawai w, loaa o Kanaloakuaana k.      

            14. Kanaloakuaana k noho ia Kaikilani w, loaa o Kehiokalani w, Keakealani k, me Kalani-o-Umi w.

            15. Keakealani k noho ia Kaleimakalii w, loaa o Keawekuikaai k.

            16. Keawekuikaai k noho ia Kihawahine w, loaa o Kaaloaikanoa k.

            17. Kaaloaikanoa k noho ia Umihulumaka w, loaa o Palena, Paia me Luahine.

            18. Luahine noho ia Kauhihookaaokalani, loaa o Kalehunalepe.

            19. Kalehunalepe noho ia Kuapuu, loaa o Kepoomahoe k me Makua.

            20. Makua noho ia Kaluhiokalani, loaa o Kama w.

            21. Kama w noho ia Laioha k, loaa o Kamehaiku w me Kalehunaaukai w.

            22. Kamehaiku w noho ia Kalanionaona k, loaa o Kanehoa k.

            23. Kanehoa k noho ia Kapaleiliahi w, loaa o J. G. Ulumaheihei Hoapili Kanehoa k, Hoapiliwahine-a-Kanehoa w me D. Makainai o Kuakini k.

 

KO MRS. KIA NAHA NAHAOLELUA.

            (E nana ma ko Kamehaiku w mookuauhau, alaila, mai kona muli mai, oia o Kalehunaaukai w e nana mai ai).

            24. Kalehunaaukai w noho ia Lima k, loaa o Nakookoo w.

            25. Nakookoo w noho ia Kapokini k, loaa o Kalakini w.

            26. Kalakini w mare ia Henry St. John, loaa o Elizabeta Kahelemanawaole w me Henry Kalaeokekoi k. Ua make ka inoa hope.

            27. Elizabeta Kahelemanawaole w mare is Kia Nahaolelua k, loaa mai keia poe keiki: 1-Edward Nahono-o-Piilani (make), 2-Henry St. John Kaleookekoi, 3-George William Lua, 4-John Vivian St. John Kapokini, 5-Charles Kalaninoheainamoku, 6-Albert Kamainiualani, 7-Alexander Pahukula Kuanamoa, 8-Elizabeth Alice Kalakini, 9-Emma Rhoda Kaaiohelo.

            HOAKAKA—He kane elua no ka Nakookoo w, i mare ai, oia o John Stevens, he haole, a na ia kane mai o William Kapahukula, Enelani k, a me Keliikui k. Ua moe wahine no keia poe, aka, ua pau nae wale no i ka make me ka loaa wahi pua ole.

 

KO KA MOIWAHINE KANEMAKE KAPIOLANI HOU NO.

            (E nana i na mookuauhau mua aenei, e hoomaka ana mai ke keiki hiapo a Kalehunalepe laua o Kuapuu.)

            28. Kepoomahoe k noho ia Kekaulikeikawekiuokalani w loaa o Kalanikauleleiaiwi II w.

            29. Kalanikauleleiaiwi II w noho ia Kanekoa-a-Kalanikeeaumoku k, loaa o Poomaikelani w.

            30. Poomaikelani w noho ia Elelule-a-Keawemauhili k, loaa o Kuhio k.

            31. Kuhio k noho ia Kinoiki w, loaa ka Moiwahine Kanemake Kapiolani a me kona mau kaikaina, a pela aku.

            (Ma kekahi mau kuauhau, o Laakea k, ke kane a Paomaikelani w, naua o Kuhio k, aka, ma ke kuauhau a na ahi nona keia ohana, o Elelule k, keiki ponoi a Keawemauhili k me Ululani w, oia ka makuakane oiaio.)

(Aole i pau.)

 

Hala ia Kamaaina o Kakou.

            Mahope o ka waiho mai ana o John Charles Frederick Horn, i kamaaina hoi ia kakou ma ka inoa F. Horn, mea puhi palaoa a hana ko omomo, no na makahiki elua a oi i hala ae, ua aili ae la kona aho hope loa mamua iki iho o ka hora 10 o ka po Poakolu nei, e like no me ka makou i hoike pokole aku ai ma ka helu i hala. Ua hanauia oia ma Deresedena, Geremania, i Augate 11, 1826, nolaila, ua ane ane loa no 6 piha iaia o ke 70 makahiki ma keia ola ana. Elua ona mare wahine ana. Na ka wahine mua, he hookahi kaikamahine, a ia keiki ana i kuakahi a i kualua ai oia i na moopuna. Make ka wahine mua, holo oia i Enelani, a ma Manekaseta, iloko o 1857, mare ai oia @ kana wahine kanemake e ola nei, he wahine Pelekane. A me kana wahine hope, he elima mau keiki, eha e ola nei.

            Ua pae mua mai oia i Honolulu nei iloko o 1862, oia wale no, a mahope ka imi ana mai o kona ohana. Mai kona hiki ana mai a hala aku la oia, aole loa oia i ikeia e palaualelo ana, aka, ua paa mau kona lima i ka hana nona ponoi iho ma kana mau oihana i ao ai i kona mau la. O makou kahi i kamaaina iaia mai ka wa liilii mai.

            Auwina la Poaha i nalo ai kona kino koou wailua ma ka ilina o Maemae, malalo o na lawelawe haipule ana a ka Rev. A. Makinikoki a me na hooponopono hoolewa ana a E. A. Wiliama. Ua ukali aku na lala o na hui malu ona i noho lala ai. Aia ka luuluu a me ke kaumaha maluna o kana wahine a me kona ohana.

            Poakahi iho la, ua waiho ae ka wahine kanemake i kekahi noi imua o ka Aha Kaapuni ma ka hooponopono waiwai no ka hoaponoia o ka palapala kauoha hope loa a ka mea i make. Ua waiho iho oia i kona waiwai a pau no kana wahine, a oia no hoi ka lunahooko-kauoha malalo o ia palapala. E hoomauia aku ana no kana oihana puhi palaoa a me hana ko omoomo e ka wahine kanemake a me ka laua keikikane, Hermann Horn.

 

            Ua hoea hou mai ka Puali Keaka Lio Hawaii mai. Aole paha i nele ko lakou hoowaka po lea hou ae o Halalii.

            Mamuli o ka ike a na kauka o nei, i kokua pu ia hoi e ko Amerika, ua hoomaopopoia ho ma’i “cancer” ko Julien D. Hayne (Haine), lunahooponopono o ka buke nupepa, Ka Hawaiiana, a no ia mea aole oia e hoi hou mai ana i o kakou nei, koe wale no paha ke loaa iaia he oluolu. Ua hopohopoia nae hoi ia mea a aole loa no oia e hoi hou mai ana.

 

NA MOKUPUNI

 

MauLono o na Apana Like Ole o keia Paeaina.

 

Na Hunahuna Huikau no Molokai-Nui-a-Hina.

            Nui no ka wela o ka la, maloo ka mauu o ke kula, pilikia na wahi holoholona, pilikia na wahi holoholona, pilikia no hoi na kanaka i kahi ole e loaa mai ai o kahi dala. He keu keia o ke au pilikia nui wale; he hune a he pilikia maoli no. No na kanaka, he mau ke kupaa mahope o ko lakou aina, aole loli, aka,

Ke Ohi nei ka Make

i kekahi poe, penei: Ua maka o Kaeha (k) ma Wawaia, Molokai nei. Hanauia ma Kohala Akau, Hawaii, i ka wa i kaua ai o Kamehameha me Keoua a me Keawemauhili, 1785. O ka loihi o kona ola ana, he 111 makahiki.

            Make o Mele, kaikamahine, ma Wawaia no, a i Iulai 25 aku nei kona make ana. Hanauia na Kukana (k) me Napahi (w) ma Kalepolepo, Maui, M. H. 1883, a ua piha iaia na makahiki he 12 me 11 malama.

            Kou oiaio.

JOHN KAHIOLANI.

            Wawaia, Molokai, Aug. 8, 1896.

 

Hauoli ka Lunakanawai Apana.

            Ua haawiia ae i ke ahiahi Poakolu, Iulai 29, he ahaaina aloha hope no Misi Kini Kamera (Miss Jennie Kammerer) ma ka home o ko makou Lunakanawai Apana hou, J. Haiku Mahoe. Na na Kula Sabati a me ke Kula Aupuni o Kaluaaha keia hoomaikai nona. Oia iho nei ka hope kumu o ke Kula Aupuni no na malama eono i hala ae, a ua nui kona mahaloia iloko o ia manawa, a mamuli paha hoi kekahi o ka eueu hou ana ae o na hana kula Sabati i palaleha no kahi wa loihi i hala ae. Ua ohuohu ka hale, ka lanai a me ke kahua o mua iho me na hoohiwahiwa hae a me na lau nahelehele uliuli lipolipo o ka wao. He 200 paha poe a oi i noke iho i ka nuu i na mea-ai i hoomakaukuuia, a ua lawa ua mea a pau. Mahope iho o ka pau ana, he mau haiolelo a me na himeni kekahi i haawiia ae ma na olelo makuahine a me Enelani. Ua hookuuia na hana ia po me ka maluhia

Papaaina Luluu i na Mea-Ai.

            Ma ka Poaono nei, Augate 1, ua wehe ae la o Solomona Kawaihoa he papaaina ma Kamalo, Molokai, he hoomauao hoi no ka piha ana o ka makahiki o ka laua kaikamahine, ka ekolu hoi o kana mau keiki. Mamua iki iho o ka hora 10 a.m., ua hukiia ae la kekahi hae Hawaii maluna o kekahi pahuhae i hoomakaukauia. I ke kani pono ana o ka hora i hoikeia, ua hoo-