Ka Makaainana, Volume VII, Number 14, 5 April 1897 — Page 2

2 HONOLULU, OAHU, POAKAHI, APERILA 5, 1897.

LEONE DE BOANE
KA MEA OHUMU KIPI O COADOVA

MOKUNA V.
HE HAKAKA KAMAHAO.
[Mai ka Helu 13.]

                Ia Mi ramolina i komo a i hele aku ai imua, ua eu ae ka naita a ku i kona mau kapuai, a no kekahi manawa uuku ua nana aku a nana mai laua kahi i kahi me ka puai leo ole. O ka powa ka mea mua i kamailio.
                "E Leone de Boane," wahi aku ana, me kamaikai kuio, "ke pahaohao nei paha hoi oe no ke ano a me ka manao o keia mau mea a pau. Ua ninau iho paha hoi oe ia oe iho i ka ninau no na wa lehulehu mai kou hiki ana mai ianei."
                Ua kaukaulua ka nai ta ma kana pane—aole no kona nele i ka mea e pane aku ai, aka, no kona lilo loa i ka hakilo a i ka hoomaopopo pono ana i ka hiona o ke kanaka kamahao e ku aku nei imua ona. He mea oiaio, ua olelo iho no paha oia iaia iho, e like me ke ano o ke kanaka imua ona, he mau ouli a loina maikai no kahi ona. A he mea oiaio loa no hoi, aia maluna o kona helehelena kamahao na kahakahana kuio a oolea, a i kahi wa no hoi, ua o ae na olino o ke ano hiena hoomainoino; aka, he hiohiona naauao ka nanaina o kona lae nui a laula, a o ka olapa ana hoi a kona mau maka poni a uwila, mawaho ae o ke ano ahiu, aole i nele me na haawina o ka pumehana a me ka makee hanohano. Ma ka hoopokole ana, aole oia he kanaka i hanauia no kekahi kulana haahaa—aole no hoi oia i hiena maoli mai ma kona ouli la—eia nae, aole oia he mea e kuemi hope ana mai kekahi mea mai maloko o ka mea ana i hiipoi ai. O ia ano kanaka, ke lilo i kipi, he keu a ka mea ku o ka weliia. O ia ano kanaka, ke lilo i mea haihai kanawai, he keu a ka mea ikaika loa. O ia ano kanaka, ke paa kona manao ma kekahi mea, aole loa oia e aui iki ae ana oiai ka hanu ola e kamau ana iloko o kona kino.
                "O oe ka o Mi ramolina, ke alii o na powa o ka Morena?" wahi a Leone, me ka nana pono aku i ka Mua haihai kanawai.
                "Owau no ia," wahi aku a ka pane malie a akahele.
                "Alaila, ua makemake au e maopopo no keaha la oe i hana mai ai ia'u e like la me kau i hana ai."
                "Ua manao no au ua makemake oe e maopopo no ia mea; a e hoomalamalama koke aku no au ia oe ano. He hoohiki paa loa ka makou o ka mauna nei—he aelike hoi i hanaia no ko makou palekana iho a no ka hoohoihoi ana no hoi ia makou iho. Ua hoohikiia makou e hoopai aku no ka make ana o kahi hoa o makou ma na ano a pau e hiki ana. Ke komo kahi mea iloko o ko makou poai, a lilo hoi i mea malalo aku o ko'u mana, ua ike a ua maopopo iaia, ina oia e haule, e haule pu aku ana no me ka lima nana oia i hoohaule. Ua manao au ua hiki ia oe ke hoomaopopo mai no ia mea i keia wa."
                "Aole a'u mea e hoole aku ai," wahi aku o ka de Boane pane me ka hopo ole; "a aole no hoi au e hoohupo ia'u iho no kekahi mea a'u e hauoli ole ai. Na'u i pepehi elua mau kanaka ou."
                "Aole hoi pela," i keakea aku ai o Gaberiela, "na'u kekahi o laua i pepehi."
                "Eia nae, ma ka'u hana," i pakui aku ai ka naita, me ka hoomau aku no o ke kamailio ana i ka powa. "Owau nei la ka mea i hewa no ia hana; a aole no hoi au e hoihoi hou mai ia mea no kekahi mau ola he umikumamalua. He wahine opiopio nawaliwali me ke kokua ole ka i aneane loa e pilikia, a na'u oia i hoopakele."
                "O na kanaka na laua i alualu aku e hoopoino i kela lede, ua ano kaha loa aku no paha hoi laua mawaho ae o na palena kupono," wahi a Miramolina, "eia nae, he kumu alakai kiekie loa ko ka mea i hanaia. A eia nae hoi, ina paha laua i ike owai la ua lede la, ina no paha ua hana ole laua i ka laua mea i hana ai. Aole nae hoi ia o ka mea i manaoia. Ua hala aku elua o ko makou mau kanaka oi kelakela loa, a e ukuia hoi ka hoopai no ia mea."
                "E ae mai ia'u e ninau aku ia oe i hookahi ninau," i panai aku ai ka naita.
                "E ninau i kau mea i makemake ai, a e pane aku no hoi au e like la me ka'u e manao ai."
                "Pehea la oe i lohe ai nawai ou mau kanaka i pepehi?"
                "Pehea?" i pane aku ai ka powa. Me he la ua lilo ka ninau i mea hooluaiele ae iaia no ka manawa, aka, ua hoi mai no kona noonoo maikai iloko o ka manawa pokole. "Pehea ka hoi au i lohe ai i na mea a pau e hanaia ana ma keia mau mauna?"
                "Malia paha he mau kiu kau ma na wahi a pau," i pane emoole aku ai o Leone; "eia nae, aole loa he mau kiu kekahi i ike na kowai lima la i hana i ka mea au e kamailio nei. Auhea oe, ua loaa mai ka ike ia oe kahi wahi okoa loa mai."
                "A—ke kamailio mai nei oe ma ke ano o ua nane la, e Sa Naita. E hoomoakaka mai ia oe iho."
Aole i pau.

Ma ke Kauoha.

                Ke kauohaia aku nei na Ahahui Kalaiaina Lala a puni ka Paeaina, e kupaa maluna o ko oukou mau ahahui me ka hookahua ana i kahua no ka noho'na houlakolako ana, me ka malama i na keehina maluhia kue kanawai ole i ke kulana kuokoa o ka Paeaina Hawaii.
JOHN POE KUOHA, Kakauolelo Nui o ka Ahahui Kalaiaina.

Emi Loa Kumukuai.

                Ma ka hale Oiwi, ke kipa ae na makamaka a pau malaila e kuai ai i na lako no kauhale. E wae a pau ka makemake, a ke hookaa aku, e hoomanao e hoihoi hou ia mai ana he elima keneta no kela a me keia dala piha e kuai ai. Mai no a hoopoina iki i nei mea, oiai, o ka pono ia o kela a me keia mea e kuai ana malaila.
                O ka oi loa aku nae paha hoi o ka oluolu loa, no $12 wale no, loaa he kapuahi hao. He $4 e uku mua ai i kinohi, a mahope aku, iloko o elima malama, ma ka $1.60 e hookaa ai o ka malama hookahi. Aole anei keia he oluolu a he maalahi no ka mea e makemake ana e kuai? I mea nae hoi e maopopo loa ai, o ka hele ae no ka pono ilaila e hoao ai. Ke uku kuike ia kela mau dala i kinohi, ua hiki loa no ke kapuahi ke hoihoiia no kauhale, a mahope aku, mai no a hoopoina i ka hookaa mau aku. Ina ua pilikia a hiki ole, hele ae no e kuka, he oluolu loa ka ona oiwi.
                Oluolu na kuka ana a maalahi na lawelawe a hoohana ana ma KA HALE OIWI.

                Aia ma ka luakini o Sana Anaru, ua hookomoia iho nei he mau puka-aniani hou o na aniani i hooluuia, ma ke ano hoomanao no Kapena H. W. Misi, i make. He mau makana mai nei ia na T. H. Keweki, oiai, ua noho puuku loihi ke Kapena no ia luakini. Eia ma ka aoao komohana nei ua mau pukaaniani la.

E HOOPAA POHO

I Kou Hale a me na Pono o loko mai ka poino ana i ke Ahi me ka —HUI— Panihakahaka Ahi Springfield WAIWAI IO, $4,105,374.75. Oluolu a Haahaa loa na hoouku ana. W. F. WILSON, Agena, Helu 209, Alanui Kalepa, Honolulu. [fby. 15—6ml.]

HUI HAWAII KUAI AINA.

NA LUNA NUI. JAS. H. BOYD...............Peresidena C. A. LONG......................Puuku ENOCH JOHNSON............Kakauolelo JOS. PAAKAULA.............Luna Hooia W. C. ACHI..............Luna Hoohana NA LALA O KA PAPA ALAKAI. J. K. KAHOOKANO, R. W. WILCOX, J. W. BIPIKANE. He Hui i kukuluia no ka hookuonoono a kokua ana i ka lahui Hawaii; ua makemakeia na Hawaii a pau loa e komo mai i ka Hui. Honolulu, Ianuari 11 jan. 11—1yr

O Kamaa Wale No!
Pomaikai no ka Mea Ilihune.

Ma keia mua aku he 5% ke hoolaweia ana no kela a me keia kuai ana ma ke dala kuike ma na waiwai a pau o ko makou halekuai. E hoomanao ua kau moakaka ia kumukuai kuike maluna o kela a me keia mea no ke kuai aku. Nolaila, he pomaikai ke kuai ma o ko makou nei halekuai, ua like me he 10 pa-keneta a oi ma na wahi e ae i kau moakaka ole ia kumukuai. Mamuli hoi o ka nui o ka makou hana i ka makahiki 1896 i pau iho la i konoia mai ai makou e hana aku e like me keia ae la, i mea hoi e pomaikai ai o ko makou poe kuai mai a e hoomahuahua loa aku ai no hoi kahi i ka makou hana. O kamaa wale no ka makou e lawelawe nei, i loaa mai ma ke kuai kukaa a ua emi loa iho i ka ko na poe e ae maanei; a nolaila, pela no hoi paha e hoemi loa ia iho ai kumukuai o na kamaa i hiki ole i na wahi e ae ke hoohoa mai. No ka oluolu, ka heahea a me ka hookipa maikai mai ke kumu i pii mau ai o ka makou hana, a ke hauoli nei no ia mea. Aia ka makou mau kamaa ma na wawae o na poe kupono a pau mai Hawaii a Niihau. E kipa a e hoao i ko makou Halekuai Kamaa, a ua hoihoiia kela a me keia ke komo mai, ina no aole e kuai ana.

Hui Kamaa o na Poe Hana D. B. KAMIKA, Luna Nui. Alanui Papu, makai mai o ke kihi o Monikahaae. jry. 25—tf.

F. J. TESTA (Hoke).
MEA OHI A KOI AIE

Mea Huli Moolelo Aina a Waiwai e ae paha. Mea Unuhi a Mahele Olelo Hawaii a Enelani paha. Mea Hana Palapala Kanawai o na Ano a pau. Mea Kuai Mikini Humuhumu Lole. Mea Hoolimalima a Hoolilo Aina. Mea Kuai Waiwai no ka Uku Komisina Haahaa. Ua makaukau mau oia e lawelawe i na ano hana a pau e haawiia mai ana iaia e hana. Kuike ka rula.

E D. A. WILLIAMS.

Helu 514, Alanui Papu, ma Ewa iho o Pa Aloha. He mea kuai lako hale o na ano a pau loa. He mea Hana Pahu Kupapau a Hooponopono Hoolewa. E hoolakoia no na Kaa Kupapau, na Kaa-pio a me na Kaa-ohana. Ina no e ninau iaia, e loaa no na Pohaku Kia Hoomanao no na He Kupapau. O ka Ialoa kekahi hana hiki loa iaia aia ia malalo o ka lawelawe ponoi ana a Ed A. Williams, F. D., he mea i puka pono mai ka Kalaka Kula o ka Ialoa Maikai ana iloko o Mei, 1894. —NA TELEPONA— Keena, Helu 179—Kauhale a me Kahea Po—Helu 815. nov 2-mp. fek 3-mp