Ka Makaainana, Volume VII, Number 14, 5 April 1897 — Page 3
HONOLULU, OAHU, POAKAHI, APE RILA 5, 1897. 3
NA PALAPALA.
[Aole maluna iho o makou ke koikoi o na hala a me na hewa no na manao i hoopukaia malalo o keia poo, aka, aia no maluna o na poe na lakou i kakau mai.]
Mai Malama i na Haku Elua.
E KA LUNAHOOPONOPONO:
He kauoha keia na ka Haku i Kana mau haumana, e hele lakou e lawelawe i ka hana me ka lawe ole i elua hana, a he kauoha paa keia aole e hiki ke wehe ae. Ma keia kukulumanao, aia malaila ko'u kahua wehewehe a kalaimanao ana.
Me ka ehaeha o ko'u naau i ka hooia m ai — ua pono, ua maikai, ua nemonemo a lilelile ka nani o ka lilo ana o ke alakai ana o na hana a elua, maluna o ke kino hookahi i elua hana. Ke kalai mai nei Ke Aloha Aina, ua kupono i ka Peresidena o ka Hui Aloha Aina ke lilo i alakai no ka Hui Hookuonoono Lahui. Ma keia wahi i loaa ai kela mau hua e kau ae la maluna, "Mai malama i na haku elua," a o ka hoopau pono loa ana aku hoi me keia pakui, "o hoowahawaha i kekahi a aloha i kekahi."
Eia ka manao o ka Haku ma Kana kauoha i Kana mau haumana— O ka hana i kauohaia, o ia ka oihana hai i ka Euanelio iwaena o na poe Iudaio a me ko na aina e, aole o ka puni waiwai, o ia ka mole o ka hewa. Eia ka Paulo ia Timoteo, kana keiki ma ka manaoio, (Timoteo 6:9 a me 10): "Aka, o na poe e makemake ana i ka waiwai nui, ua haule lakou i na hoowalewaleia a me ka pahele, a iloko o kela kuko lapuwale a me keia kuko lapuwale e pono ole ai na mea e poholo ai na kanaka i ka poino, a me ka make. No ka mea, o ka puni dala, o ka mole no ia o na hewa a pau. Ua kuko nui ia ia e kekahi poe a ua haalele lakou i ka manaoio, ua houhou lakou ia lakou iho i na ehaeha he nui."
Ma keia manao o Paulo ia Timoteo, ua pili kela ao ana ia kakou. Ua ninau mai nei Ke Aloha Aina ma kona helu 13, Maraki 27, ma ka aoao 3, nona ke poo—"Kukahalelo ke A, na Hale o Kaupo," e kei ana i na mea i hanaia ma ka la koho Peresidena, ua kohoia i alakai no ka lahui, ma ke ano he makua nana e malama ma ko ka lahui aoao no ka pono o ka aina, kona kuokoa. E Ke Aloha Aina, i mai nei oe i KA MAKAAINANA he kalai aupuni moowini a hawawa loa ia. Ke hooia aku nei keia makapeni, he kalai naauao ia, he puniu i piha i ka lolo naauao; aole e like me kau, he lolo hakahaka. A penei ka hoohalike ana: O Peresidena Kole ma ka aoao o ke Aupuni Repubalika o Hawaii nei, a o J. K. Kaulia ma ka aoao o ka lahui, e paa ana i ka lahui mai na hookikina ana mai a kela aoao, e hoohiki mai i loaa ka hana, me na maka inaina a me ke akamai e pelo ana.
Eia ka ninau ia oe, ua hiki anei ia Kole ke iho mai mai kona noho mai a kukulu i ahahui hookuonoono lahui? Haina, aole, aole no i Olekukahi, aole no i Olekulua. E like me ka hiki ole ia Kole ke iho mai, pela no ka hiki ole ia J. K. Kaulia ke iho mai, mai kahi ana e ku nei. Ua like no ia me ka pali kiekie, aia no iaia ka paa i ka lahui; no ka mea hoi, o kahi ana e ku nei, o ke ola ia o ka lahui, a o kalaiaina a me huli waiwai, he mau hana like ole keia.
Ma keia kumu, o ka huli waiwai, he hana ino, he hana e hoolilo ai i ka inoa maikai i mea ino a lapuwale, he mea hapala i ka inoa a make kanu. Ninau mai nei oe me ka ninau kamalii: Heaha ka poino o ka lahui aloha aina e loaa mai ana ma ia mea? He niu a me kulolo. Aole ka oe i ike, he hana hapala keia i ka inoa maikai o ke kanaka, o ia ka Iesu i olelo ai, "Mai malama i na haku elua." O aha hoi? O hana i kekahi a hana ole i kekahi mea; o ia kana i holokiki aku nei e kukulu i na ahahui hookuonoono lahui a ku i Manoa, Moiliili, Waikiki, a pela wale aku. Ma ko'u ano he aloha aina a aloha Alii, he hoole au. E pono no e hoolilo i keia hana na ka mea okoa ae, aole nana (J. K. Kaulia). Eia kana hana pono o ka malama i ka lahui ma kona hele kino ana iwaena o na apana a pau mai Hawaii a Kauai, aole ma ka hilinai i kona pono iho, e malama i ka inoa oiai na ilio e nahu ana. E hoohalike me Dawida i kona makuakane, i hoouna ai iaia e malama i na hipa a kona makuakane e hele ana i ke kula e malama ai, e pepehi ana i na liona. Aole o ke ku nana wale aku a poiia mai e ka pueo. A lilo o Dawida i moi no ka Iseraela, waiho oia i ke kahu hipa. E like no me ka Dawida i hana ai, pela no o J. K. Kaulia e hana ai, e hookaawale i ka hookuonoono waiwai na hai e hana; aole no e hewa, e kokua ma ka hooponopono pu ana. "Mai malama i na haku elua, o aloha i kahi a hoowahahawa i kahi."
O ko'u manao, e hookaokoa ia oe iho mai na hana o ia ano oiai ka aina e kuapapanui ana i ka nele a me ka ilihune.
E hookaawale i ka peresidena a me na luna hooko o ka ahahui hookuonoono lahui, a hookaawale i ka Peresidena o ka Hui Aloha Aina. Ua lokahi au e wehe i ka waihona o ka hookuonoono lahui.
E ka lahui, e nana pono mai i keia kumuhana, a na kakou ia e kaana no kakou iho; a nolaila, ke hooki nei au maanei, a nana aku o ka hana mai o na manao kue.
PIPI-O-EWA.
Ewa, Oahu, Ma raki 31, 1897.
Hala ma Kela Kapa.
Auwina la Poaha, Ma raki 25, i make ai o Misasa Caroline D. Kini i ke 70 a keu o kona mau makahiki, ma kahi noho o kana keiki, W. A. Kini, ma alanui Lunalilo, Kulaokahua. Ua kamaaina oia ma o kakou nei a he lehulehu no hoi paha o kakou poe oiwi i hoonaauaoia e ia oiai kona noho kumuao ana ma kekahi mau kula a kahua hoonaauao o kakou nei. Iaia i noho kumupoo ai no kekahi mau kula a me kona launa mau me na Hawaii, ua komohia ke aloha iloko ona no kakou, a hala aku la oia me ke aloha nui no ka lahui oiwi iloko ka pilikia kalaiaina a kakou e auamo nei. Oia ka makuahine o Loio W. A. Kini a me Misasa Mine Dodge. Hora 4 p. m. o ka Poalima ae i hoolewaia ai a nalo iuka o ka ilina o Maemae.
Haole Hana Ekaeka.
Ua ahewaia kela haole Pi Gi imua o ka Aha Apana i kakahiaka Poalua, la 23 o Maraki, no ka moe ana i kekahi kaikamahine maoli uuku malalo o 14 makahiki, a ua hoopaiia no eha malama hana oolea a e uku i na koina. Ma na olelo hoike, ua ikeia na kela haole no i kulai, hue i ke kapa a pinana. Ua hoao ua haole la e pale aohe ka e hiki iaia ke hooko ia ano iini, a ua hooia ae kekahi kauka he ma'i ino kona i kupono ole no ia ano hana. Eia nae hoi ma ko ka Aha manao, ua ku no ka hewa iaia. Ua hoohalahala aku kona loio i keia kau kiure ae o ka Aha Kaapuni.
Ua hoomaopopoia ke ana o ke alanui pali hou o Nuuanu e Ana-aina Buruns, a ma ka oleloia mai, e oi loa aku ana ka ka maikai a me ka nani o na nanaina ma o a maanei o ka aina. Aia ana ka ma kahi o
$40,000 ka nui o na lilo i kohokohoia.
Mamuli o na hooikaika ana a ka Rev. S. H. Davisi o Kona Hema, Hawaii, ua piha aenei ka Waihona Hanai Kahu i ka huina o $3,000. Ua makemake nae hoi oia e piha i ka $5,000 iloko o Augate ae, ma ke ano hoomanao no kona hana ana ma ia kihapai no 25 makahiki mai kona hiki ana mai ianei.
Ke hoolaha nei ke Kuhina Kalaiaina ma kekahi o na nupepa namu, e hooliloia aku ana ka Hotele Hawaii a me kona kahua e ku la ma ke kuai kudala akea, ke hiki aku i ka Poakolu, Iulai 28, 1897, a e hoomakaia ke koho ana mai ke $60,000 aku. A ke lilo ole pela, alaila, o ka hoolimalima ke hooliloia aku mai ke koho mua o $4,000 o ka makahiki no 30 makahiki, e like me na hoakaka ana o ke Kanawai 7 o na Kanawai o 1896.
Olelo Hoolaha.
E ike auanei na mea a pau he mau holoholona ka lakou [lio, miula a me na iakake], e holo ana maluna o na aina hanai holoholona ma Molokai—Kaluakoi, Palaau, Iloli, Naiwa, Kahanui, Kalamaula, Kaunakakai, Makakupaiaiki a me ke kula o Kawela. E hooukuia aku ana mai ka la mua aku o Iulai, 1897, no kela a me keia holoholona e hele ana maluna o ua mau aina la he 25 keneta no ka holoholona hookahi o ka mahina, e hookaaia ma ke dala, a i ole, ma ka hana maoli paha maluna o ua mau aina la, ma ka ae like a ma ke kauoha a ka Luna Hooponopono o ua mau aina la i oleloia maluna. O na holoholona i hookaa ole ia,
e hopuia aku ana ma ke ano komohewa. R. W. MEYER, Luna Hooponopono. Kalae, Molokai, Maraki 25, 1897. mar. 29—4ts.
Robert Napunako Boyd
(I TALIA)
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku. Keena Hana: Mauka iho o ka Hale Leta, maluna ae o ka haleaina Pake, Alanui Betela. apl 13-mp
S K PUA,
He Agena no na Waiwai Paa.
He Mea huli i na Kuleana Aina i mea e maopopo ai; He Mea Ohi i na Aie i hiki ole ke Ohiia e na Poe no lakou na Aie, a He Mea Hana i na Ano Palapala Pili Kanawai a pau. KEENA HANA:—Ma ke keena o R. W. Wilikoki, Alanui Konia. aug. 31—1mk.
NO KE KUAI.
He hale o Elima Keena, hookahi makahiki o ka paa ana, a me Elua Apana Aina ma Kalia, Waikiki, ma ka mahele aina o Bruce Waring & Co., e hooliloia aku no i ka mea e makemake mai ana. Aia keia wahi ke pili kokoke la ma kahi noho o E. S. Boyd. KUMUKUAI:—$1,000; $500 ma ke kuike a ma ka Moraki ke koena no ekolu makahiki ma ka 8 pa-keneta ukupanee. No na mea i koe, e ninau ia BRUCE WARING & CO., a i ole, ia F. J. TESTA, ma ke keena o keia nupepa. sep 7—mhp.
William Kamali.
Pena Hale o na ano a pau, Kau Pepa a Lu One paha, e like me ko oukou makemake. Ua hiki ke hoohinuhinu i na Umeke, Pakaukau, Pahu-ume, Moe, Puniu, i hiki ole ke hoomaemae hou ia. Ua hiki ke hookoia na hana me ka eleu loa, a o na kauoha a pau mai na kuaaina mai ua hiki ke hookoia. He oluolu loa ka uku ma ke kuka olelo ana. E kipa mai e na makamaka, mai poina. Keena hana, ma ko S. K. Pua keena, Helu 7 1/2, Alanui Konia. Wahi Noho, Kapalama. mar 15—6m
Hui Papa a Kukulu Hale Oahu.
(OAHU LUMBER & BUILDING CO.)
Leleo, Alanui Moi, kokoke i ke Kahua o ka Hui Alahao & Aina Oahu. Poe Kalepa Laau, Hana Aelike a me Kukulu Hale. Poe Hookomo Mai a Hoolilo aku i na Puka, Olepelepe, Kui, Pepa, Pena, Aila, Na Pono Kamana, A pela aku, a pela aku. Telepone 53. Pahu Leta. apl 20-tf
HALEKUAI LAHUI KALAHIKI
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua." Ma ia halekuai o na oiwi e loaa ai na anoi a me na paihi o na ano hou loa, e laa Na Kalakoa, Na Keokeo, Na Makalena, Na Kinamu, Na Huluhulu, Na Lihilihi, Na Kamaa o na Kane, Wahine me Keiki a pela aku. Oluolu no ke kuai ana. Aohe hewa ke kipa mai e ikemaka, a aohe no hoi he kunukunuia no ka hoikeike ana i na mea kuai. M. PALAU, Luna Nui. ok 14-tf