Ka Nonanona, Volume I, Number 7, 28 September 1841 — Page 28

28 KA NONANONA. [SEPA TEMABA,

            Ke oa keia o ka hale pule pohaku ma Honolulu. Eia ka loa o na laau; o ke kaola 80 kapuai; o na oa 41 kapuai, 9 iniha; o ke kia uhi iwaena konu, 18 kapuai; o na kia aliiwahine nuku iho, 12 kapuai me na iniha eha. He 14 iniha ka laula o ke poo o ke kia'lii, a ma kona kumu malalo, 16 iniha ka palahalaha.
            O ka loa o keia hale, he 143 kapuai, a o kona laula 79 kapuai a me 6 iniha. Hookahi paha pule koe, a kau ke oa maluna. Pomaikai makou ke paa keia hale nui. Mai ka hoomaka ana i keia hana a hiki mai i keia la, aole mea eha nui, aole hoi hai kekahi iwi iloko o keia hana!

Wailuku, Sep. 9 th, 1841.
          Ke manao nei au e hoakaka iki aku i ko makou hele ana a puni o Maui hikina, me Kaauwai, a me Kaili.
          Maui, Au gate 20. Holo makou i Kalepolepo. Hoike mai ko laila kula, pau ae la, holo i Keaku i Kula, moe malaila, anu maikai i ka po. Kakahiaka 21, hoike kula, pau, holo i Honuaula, hoike kula, malaila ka la Sabati.
          Aumoe 23, holo makou ma ke ala aa, ino, luhi ka lio, a me ke kanaka, a hiki i Kahikinui; hoike kula; holo hou a hiki i Kaupo, moe malaila.
          24. Holo ma ka waa a hiki i Kipahulu, pae iuka, hele wawae a hiki i Hana, moe malaila.
          25. Holo lio a hiki i ka pali ma Kolau, hele wawae a i Ainahiku, ma ka waa a Wailua, mauka a Keanae, ma ka waa aku a hiki i Honomanu, moe malaila.
            26. Kakahiaka holo waa me ka lele ana o ka manu, emo ole pae i Halehaku, hoike kula, alaila hele wawae i Haiku, hoike kula, alaila, i Hamakuapoko, malaila aku i Wailuku.
          I keia hele ana, hai aku la au i ka olelo a ke Akua, he umikumamawalu hui ana. Hoike mai na kula eono, a pau, hoikeike aku au i na haumana.
          Aole au ike i ka haunaele a me ka hewa hou e ulu ana ma Maui nei.
          Ua malu na mea a pau. Hookahi poe hihiu au i ike ai, o ko Wailua poe.
          "Ua nui ke kihapai uuku ka poe lawehana." E pule kakou i ke Akua nona ke kihapai i hoouna aku ia i na lawe hana hou. Na'u na CELINA.

NO KA BAKA.

            Eia kekahi kanawai kinai baka i kauia ma Ma sekuseta ma Amerika, i ka wa kahiko, i ka makahiki 1639.
          Penei ke kanawai, "No ka hoolilo ana i ka baka i mea e pono ole ai ka noho ana o ka poe pono, a no ka puhi ana mawaho o ka hale me ka hilahila ole, a lilo ia i mea e hoinoia'i ke aupuni; nolaila, ea, ua kauia keia kanawai. Ina e ikeia kekahi mea e puhi baka ana ma ke alanui paha, ma ka aina paha, ma kahi kokoke i ka hale noho, aole i hookahi mile ka loihi aku, e uku ia i hookahi hapaha, a ina aole ana dala, e hahauia oia."
          I kela manawa, ua kapu no ma kela aina ka hoopae mai i ka baka no ka moku mai. Ua lilo paha keia mau kanawai i mea ole i keia manawa, aka, he pono paha ia mau kanawai, ua mahaloia e ka poe pono.