Ka Nonanona, Volume I, Number 13, 21 December 1841 — Page 48

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 1. HONOLULU, OAHU, DEKEMABA 21, 1841. Pepa 13.

IOANE KALAVINA.

            O Ioane Kalavina ka inoa o ka mea nana ke kii a oukou e ike nei. Ma Farani no kona wahi i hanau ai i ka makahiki o ko kakou Haku 1500. He uuku wale no ka waiwai a me ka naauao o kona makua. Aka, ua ikeia oia he keiki noho malie me ka hana maikai. Nolaila kokua nui mai kekahi poe mea waiwai ia ia. Ma ko lakou hale i aoia'i oia i kona wa kamalii a pau.
          A nui, komo ae la oia iloko o ke kula nui ma Farani. O ke kumu nana ia i ao he kaulana loa i ka ike a me ka naauao. I ka wa a pau o ko Kalavina noho ana maloko o ia kula, hooikaika loa oia i ke ao palapala. Ma ka pule a me ka malama i ka ke Akua, kana hooikaika ana. E like me ka mahuahua ana o kona ike, pela no i mahuahua ai ka pono maloko o kona naau. A pau kona noho haumana ana malaila, makemake iho la kona makua, e lilo oia i kahuna pope. Aka, aole ia i ae aku. No kona ike maopopo paha i ka hewa nui o ia aoao, kona hoole ana. Koho ae la oia i ka oihana paio kanawai. Aole nae loihi kana hooikaika ana ma ia hana a hoomaka iho la oia e palapala pinepine aku i kona mau hoalauna, i ka hewa a me ka lapuwale o ko ka pope aoao. Ia manawa, nui loa iho la ka ikaika o kekahi poe pono i ke kue aku i keia aoao, a i ka hoolaha aku no hoi i ka oiaio o ka ke Akua olelo, mawaena o kanaka. Huhu nui mai la ka poe pope me he mea la e luku ana lakou i ka poe pono a pau. O ko Kalavina holo ana no ia mai Farani ae a noho iho la i Kainatana. Malaila oia i huli nui ai i ka palapala hemolele. Pela i mahuahua ai iloko ona ke alohaia mai a me ka ike ana'ku i ka Haku e ola'i, ia Iesu Kristo. A liuliu iki iho, hoomaau aku la ke Alii o Farani i ka poe pono nana i ku e i ko ka pope aoao. Ua hooehaeha wale ia kekahi poe, a ua pepehi wale ia a make kekahi poe. Oia kekahi mea i hoowahawaha nui ai o Kalavina ia aoao ino. O kona haalele loa ia i ka ekalesia Roma. Wikiwiki oia e kakau i wahi palapala hoike i ka wahahee o ko lakou manao no ka hiamoe ana o na uhane o ka poe pono a hiki wale aku i ke alahouana. O kekahi kuhihewa no ia o ka poe pope. Mahope iho, haalele oia i ko Farani aupuni a noho iho la i Kainatana. Malaila oia i ao ai i ka olelo Hebera i mea e makaukau nui ai oia e huli pono i ka palapala hemolele. Kaahele ae la oia ma ia wahi aku ia wahi aku me ka hai aku i ka ke Akua olelo, i maopopo ka hewa o ko ka pope aoao i na kanaka a pau a i huli mai lakou mamuli o ka oiaio. Ma Genewa kekahi kulanakauhale ma Helevitia, hookumu iho la oia i kulanui kahi e huli ai na haumana i ka palapala hemolele i makaukau hoi lakou e hoolaha aku ia olelo maikai ma na wahi a pau. Nui loa kona aloha i ka uhane o na kanaka. Minamina oia ia lakou i ko lakou hele ana mamuli o ko ka pope aoao. Aole ona noho wale. Hooikaika mau oia ma kela hana keia hana e pakele ai na kanaka mailoko ae o ko Satana pahele. Aole ma ka waha wale no i ao aku ai oia i kanaka, aka, kakau no hoi oia i na palapala he nui i mea e hoomoakaka ai i ke ano o ka ke Akua olelo. Pela wale aku no i hana'i oia a hiki i kona makahiki 54; o kona make aku la no ia.
          O ko Kalavina ike ma ka ke Akua olelo, oia ka mea nui ana i hoowahawaha aku ai i ko ka pope aoao. Ae wale aku kona mau makua a me kona