Ka Nonanona, Volume I, Number 13, 21 December 1841 — Page 49

49 KA NONANONA. [DEKEMABA,

mau hoalauna mamuli o ia aoao hoopunipuni. Aole paha lakou i heluhelu i ka palapala hemolele. O kekahi hewa nui no ia o kanaka ia manawa. Aka, he kanaka noonoo o Kalavina. Aole ia i ae wale aku mamuli o ko hai. Huli ikaika ae la oia i ka palapala hemolele me ka noonoo. Pela oia i hoomaopopo ai, he okoa ka ke Akua, a he okoa ka ka pope. Nolaila, aole hiki ia ia ke noho mamuli o ia aoao. O ka haalele loa ka pono, i kona manao.
          Ua kapaia kekahi poe, he poe Kala vina. A ua manaoia he ae wale aku ko lakou mamuli o ko Kalavina, e like me ka ae wale ana'ku o ko Roma ekalesia mamuli o ko ka Pope. He kuhihewa loa ia manao o ua poe nei, aole lakou manao, o Kalavina no ke poo o ka ekalesia, aole hoi lakou i manao, he oiaio a he pololei loa kana olelo e like me ka ke Akua olelo. I ko lakou manao, o Iesu wale no ke poo o ka ekalesia a hiki wale aku i ka hopena, a o kana olelo wale no ka i oiaio a i pololei loa, oia hoi ka palapala hemolele. Ke manao nei no lakou he maikai a he pololei kekahi hoomoakaka ana o Kalavina i ke ano o ka ke Akua olelo, a o kekahi hoomoakaka ana ona, aole pololei. Ma kahi i kulike ai kona manao me ka ke Akua, malaila lakou e ae aku ai mamuli ona. Pela i aoia mai ai kakou e hana. I Korineto 11:1. Aka, ma kahi i ku ole ai kona manao me ka ke Akua, malaila lakou e ae ole aku ai mamuli ona. Eia ka mea i mahalo nuiia'i o Kalavina, o kona huli ikaika ana i ka ke Akua olelo me ka ae wale ole aku mamuli o ko ka pope. Hele ae la oia mamuli o ka palapala hemolele me he panana maikai la e kuhikuhi ana ma ke ala e hiki aku ai i ka lani. Pela no hoi ka poe Kalavina. Aole lakou ae wale aku i ka pope. Ma ka palapala hemolele lakou e huli nui ai; oia wale no ko lakou panana e kuhikuhi ai i ke ala e ola'i.

NO KA MOE KOLOHE. Helu 2.

            Pehea ko ke Akua manao i ka lahuikanaka i lilo i ka moe kolohe ana? He oluolu anei? E heluhelu kakou ma kana olelo i akaka lea. Oihanakahuna 18:20, 28. "Mai moe oe i ka wahine a kou hoalauna, e hoohaumia iho ia oe iho me ia. I ole ai e luai aku ka aina ia oukou kekahi, i ka wa e hoohaumia ai oukou ia ia, e like kona luai ana'ku i na lahuikanaka ka poe mamua o oukou." Ieremia 5:7-9. "Pehea la wau e kala'i i keia hewa nui? Ua haalele kau mau keiki ia'u, a ua hoohiki lakou ma na mea akua ole. Hanai aku la au ia lakou a maona, alaila, moe kolohe iho la lakou a hoakoakoa me ka lehulehu lakou, ma na hale o na wahine hookamakama. Holoholo lakou e like me na lio i hanai maikaiia'i; uhuuhu kela mea, keia mea o lakou i ka wahine a kona hoalauna. Aole anei au e hoopai i keia mau mea? Wahi a Iehova. Aole anei e ko ka inaina o kuu uhane i ka lahuikanaka e like me neia?" Hosea 4:2, 3. "O ka hoohiki, ka hoopunipuni, ka pepehi kanaka, ka aihue, a me ka moe kolohe, ka lakou i hoomahuahua ae ai, a pili aku no ke koko i ke koko. No ia mea, e auwe auanei ka aina; a e nawaliwali na mea a pau e noho ana maluna ona, o na holoholona o ke kula, a me na manu o ka lewa; a o na ia hoi o ke kai, e lawe ia'ku lakou."
          Eia kekahi; O ka mea moe kolohe, ua hewa ia i kona iho. Ioba 31:9-12. "Ina ua hoowalewaleia ko'u naau e ka wahine, ina ua hoohalua au ma ka puka o ko'u hoalauna; alaila, e kaapalaoa ko'u wahine na hai, a e kulou na mea e maluna ona. No ka mea, he hewa no ia, a he lawehala no ia imua o na lunakanawai." No ka mea, he ahi ia e hoopau ana, a i ka make, a e uhuki no ia i ka'u mea loaa a pau." Solomona 5:3-6. "O na lehelehe o ka wahine hookamakama he meli ia e kulu ana, a ua oi aku ka pahee o kona waha e like me ka laau awaawa, oioi hoi e like me ka pahikaua oilua. Ke iho la kona kapuwai i ka lua." Solomona 6:24-27. "I malama ia oe i ka wahine ino, i ka malihini i hoomalimali me kana olelo. Mai kuko aku i kona maikai ma kou naau, aole hoi puniheiia e kona mau lihilihi. No ka mea, no ka wahine hookamakama, e mele ke kanaka,