Ka Nonanona, Volume I, Number 24, 24 May 1842 — Page 120

120 KA NONANONA. [MEI,

ua kupono anei keia mau oihana, i ka la Sabati? e hoakaka mai oe.
                Eia kekahi; I ka malama Aperila, 6 la, make aku la kekahi hoahanau o lakou. A i ka la 7 kanu ia. Mamua o ke kanu ana, he wahi pule; pau ka pule ana, kauoha aku la o Timoteo penei. "E na hoahanau, o ko oukou wahi keia, o ka pule. Nolaila, e pule oukou i elua malama; alaila pau ko oukou pule ana." A i ko lakou pule ana, ekolu pule o ka la hookahi. Penei; i ka puka ana mai o ka la, alaila pule, awakea, pule hou, a ahiahi, pule hou. Ke ninau hou aku nei au ia oe, ua pono anei keia pule i ka mea i kapaia he kupapau? KAMANANAI.

                Auhea oe e Kamananai? O ka hana a ka poe Pope au i ike ai i ka la Sabati; aole no he pono oia, no ka mea, ua hai ia ke kanawai eha o ke Akua. Aka o kau ike ana ma Waianae he mea uuku i kekahi hana a lakou. He hana maoli no, a he lealea maoli no lakou ma na aina o lakou i ka la Sabati. Ua hoolilo lakou ia la, i la lealea nui, a paani nui hoi. Alaila ua akaka ia kakou ke ano o lakou, he Anikristo; ka mea ku e ia Kristo no ia, i olelo ia mai ma ka olelo a ke Akua. No ka mea, ua hoolilo lakou i ko ke Akua kanawai i mea ole. E nana oe ma ka Paulo II Tes. II. 4, a me ka Daniela VII. 25. Alaila i olelo ia mai kekahi mea hookiekie, nana e hookahuli i na manawa, a me na kanawai. Oia no keia au i ike ai, kekahi hoailona nui ia e akaka ai ko ka pope ano. Ua ku e kana hana i ka Kristo. Ua hookahuli i na manawa, a me na kanawai o ko kakou Haku.
                O ka pule a Timoteo ma i pule ai i ke kupapau; oia no kekahi hewa nui o lakou, ka poe mamuli o ka Pope. Aole no i pono ke kupapau i ka lakou pule; aole loa e pono ka uhane ka mea i puka aku ai mailoko aku o ua kupapau la, i ka lakou pule ana. Aole noloko mai o ka ke Akua olelo ia pule. Ua ao ia mai kakou e ia. O ka poe make iloko o ka hewa, he mau ko lakou hewa; a o ka poe make iloko o ka pono, he mau ko lakou pono. Eia no ma keia ao ko ke kanaka wahi e huli ai, e pule ai, a e mihi ai no hoi. Aka, ma ka ka poe Pope olelo, ua hele ka uhane o kanaka ma "kahi hoomaemae," ke make kona kino, a malaila e noho ai iloko o ke ahi, e hoomaemae ana, a puka hou aku, a hele i ka lani. Eia ka hiki wawe o ka maemae ana, wahi a lakou, e pule nui i ke Akua, a i na uhane maikai ma ka lani, e hoopakele ai. Ua hooliloia keia hana a lakou i mea waiwai loa no na kumu a lakou, ma na aina puni i ka lakou. Ma ke kuai ana o kekahi poe waiwai i na kumu e pule i ko lakou mea make, e eha ana iloko o kahi hoomaemae, iloko hoi o ke ahi, malaila lakou i waiwai ai. A ina nui ke kala, nui ka pule a na kumu i pau koke ka hoomaemae ana. Auhea oe, he naaupo loa ia. Aole a kakou i ao ia mai pela e ko kakou Haku, aole loa. Penei kana, "I keia la, o oe pu kekahi me au iloko o ka Paredaiso." Luka 23, 43. Aole i olelo ia mai he wahi ahi kekahi, i wahi e hoomaemae ia, a puka hou aku, o ke ahi mau loa. Oia ka kakou i lohe. E nana oe ma Luka XVI. 19 malaila iho, a pau ia mokuna. Ua ao ia mai kakou ilaila i na wahi e hele ai na uhane ke make ke kino, a he mea mau ko laila noho ana. "Ua waiho ia mai he awawa nui iwaena o makou a me oukou, i ole ai e hiki ka poe e manao ana e hele aku mai keia wahi io oukou la, a o ko laila poe, aole e hiki ke hele mai io oukou nei."

Honolulu, Oahu, Mar. 13, 1842.
                E Kalaka e; aloha oe. Ke hai aku nei au i kau ninau ma ka Nonanona pepa 8 aoao 30 no ke kiekie o Lahaainaluna, mai ka ili o ke kai ae, a hiki i kahi o na hale e ku ana; a mai kahi o ka hale a i ka piko o ka puu o Paupau. Eia ke kiekie o ka puu, mai ke kai ae a i ka hale, he 94,02 anana kiekie, 564 kapuai. Mai ka hale ae, a i ka puu he 520 anana, 3120 kapuai. Ua pono anei keia?