Ka Nonanona, Volume II, Number 5, 2 August 1842 — Page 20

20 KA NONANONA. [IULAI

1837. Mei 23, Hoomaka i ka hana; kua pohaku; 3053 kanaka ma ia hana.

 

1838. Iune 5, Kua wahie a lawe puna; 3119 kanaka; 9 imu puna.

Iulai 31, Eli i ke kahu; na kanaka o Honolulu nei. Sep. 17, Ana i ka hale; loa 144 kapuai, laua 78 kapuai a me na iniha 8. Sep. 18, Hoomaka i ka uhau.

 

1842. Iulai 2, Paa ka hale; 5 makahiki a me na la 9 mai ka la i hoomakaia'i.

 

KA NONANONA.

Honolulu, Tusede, Aug. 2, 1842.

            I keia mau la iho nei ku mai ka moku, Friends kona inoa, no Manila mai, a lawe mai ia i kekahi mau nupepa no Sinegapora. Aole no he nui na mea hou i paiia ma kela mau pepa. Eia wale no, ua emi loa ke kaua ana o ko Beritania o me ko Kina i keia wa; he hapa wale no na koa a me na moku kaua o Biritania malaila; he nui loa na koa pau i ka make, a ke waiho wale nei ke kaua i keia wa. Aole paha pau wawae kela pilikia. Ua noa no ke kuai o na haole malaila, ia wa, holo aku, holo mai ka poe kalepa ma Kanetona. Ke hana nei ko Beritania i kulanakauhale nui ma ka mokupuni i ke kai, o Hong Kong kona inoa. Ua lilo no lakou ia moku. Oia wale no na mea a makou i lohe ai.

            I ka la 25 o Iulai nei ku ma la ka moku kalepa, o British Isles kona inoa, no Mesiko mai. Lawe mai ia i mau palapala no Amerikahuipuia. Eia na mea a makou i ike ai ma na palapala, Eia ae ke hoi mai nei o Tatinawahine me na keiki elua ma ka moku Victoria, a me Mi. Demana me kana wahine, he kahunapule no na haole ma Honolulu. Aia ma kekahi moku e ae na misionari elua, o Kamika, he kahuna lapau, a me Rowela, he kahuna pule. Ma Koloa paha laua e noho ai.

            Aole hoi mai o Binamu ma ma keia mau moku. Aole akaka ka manawa e hoi mai ai.

            Ikaika na hoahanau ma Amerika i ka hoolaha i ka pono o ke Akua ma na aina naaupo i keia wa. Pela ko makou lohe.Pehea kakou na hoahanau o Hawaii nei? Ikaika anei kakou ma kela hana?

 

NA HALAWAI KINAI RAMA.

            Ekolu halawai kinai rama o makou ma Honolulu nei i keia mau la. Elua ma ka luakini hou ma Kawaiahao, a hookahi ma ka hale pule ma Kaumakapili, he mau halawai nui, piha na hale i na kanaka. Hookahi halawai okoa no na kamalii. 1300 a keu aku na kamalii e hele mai; oia hoi, "ka puali inu wai," o Honolulu nei. Aia no i na 'lii ka nui o ka olelo. O Kamehameha III ka mea olelo mua, a pau kana, ku iluna o Kekauluohi, a pau kana, ku mai o Kekuanaoa, Kuakini, Ii a me na mea e ae. Maikai wale no na olelo. Hookahi wale no ano o na olelo a pau, oia hoi, o ka haalele I na mea ona a pau; oia wale no ka pono. E inu wai wale no. Hai aku la na lii i ko lakou manao paa e waiho loa aku i na mea ona; a ina lakou o hoi hope a lalau hou lilo lakou i poe hoohiki wahahee, imua o na kanaka a pau.

 

O PAULO KANOA.

            Ua kohoia oia e na 'lii i luna malama waiwai no ke aupuni. Ekolu a lakou o Kauka Iu da, I. Ii, a me Paula Kanoa.

 

KA PANIKU.

            Ua kuaiia ka moku kiakolu, o Paniku kona inoa, e Kuakini. Eia no ia ma Honolulu nei. Eia na dala i lilo no keia moku $6,500. He moku maikai.

 

            I ka la 30 o Iulai, hoi ke lii i Maui.

 

KA MAKE.

            Eia kekahi, i ka la 25 o Iulai make o Kapihi ma Honolulu nei. He kahu ia no Kauikeaouli. Ma ke ake mam a kona mai.

 

KA NINAU HOIKE POPE.

            E na kanaka a pau o Hawaii nei, eia kuu manao paipai ia oukou, e heluhelu a ike maopopo oukou i ke ano o ua ui nei. Malaila e ike ai oukou i ke ano o ko ka Pope aoao. NONANONA.