Ka Nonanona, Volume II, Number 21, 23 March 1843 — Page 107

1843 ] KA NONANONA. 107

pono i keia wa. E hui ka poe naauao a pau a hoopii aku i ka lio imua o na 'lii.

Lanui, Ian. 26, 1843.
NO KA HOLOHOLONA WAIWAI, A ME KA HOLOHOLONA WAIWAI OLE.

                Auhea oe e ka Nonanona; nau e hoike aku i ka waiwai o keia mau holoholona, a me ka waiwai ole o kekahi. Eia ka'u mau holoholona i ike ai i ka wa o Kamehameha I, a hiki mai ia Kamehameha II. O ka puaa, o ka ilio, o ka moa, oia ka'u mau holoholona kamaaina i ike ai ma keia aina, a hiki mai nei ia Kamehameha III. I kekahi makahiki o kona noho aupuni ana, luku mai ke Akua i ka ilio, pau loa ka ilio i ka make i ka mai; kakaikahi ka ilio ola, a mahope mai, hiki mai ka manu palahu, hanai nui na kanaka i ka manu, a me ke kao, a me ka puaa no hoi, a hiki i ka wa ulumoku, holo nui na kanaka i ke kuai manu, a me ke kuai kao.
            Nui kua lole o kanaka, a me ke dala, aole wahi hemahema o kanaka, a hala kekahi mau makahiki, alaila, huli hou kekahi aoao o keia aina i ka hanai ilio. O ka aoao hema, a me ka aoao hikina hema, o ka aoao akau, a me ke komohana akau. Aole o lakou hanai nui wale, i ka ilio, o ka manu a me ke kao ka lakou mea hanai nui. Eia ka holoholona waiwa i ole i keia wa, o ka ilio, aole au i ike, aole hoi i lohe; Ua holo aku kekahi poe hanai ilio o Lanai nei i Lahaina i ke kuai i ka wa ulumoku, aole au i lohe, hookahi ilio, hookahi apa lole e like me ka puaa, ehiku ilio, hookahi apa lole e like me ke kao, he umi ilio hookahi apa lole e like me na palahu he umi: pela no ka poe hihia ma ke kanawai, aole au i lohe ma ko makou aina nei, ua hookaa ia kekahi moekolohe ma ka ilio: Aole hoi i haawi ia kekahi mau ilio i mea kokua i ke aupuni, i ka aie i ko na aina e, i na kumu ao, i ka poe hana luakini, i ka poe kapili moku, oia na hana o ke aupuni. Aole loa i lohe ia ia mau mea.
                Auhea kakou e na kanaka naaupo o Hawaii nei, e nana aku kakou i ka kakou mau kumu, aole au i ike i kekahi misionari e hanai ilio ana, e mama ana i ka ai a ka ilio, aole loa. Ma keia aina kekahi poe hanai ilio, aole hemo o ka pilikia o ko lakou mau kahu. Eia keia mau hewa o ka ilio, o ka ai manu, O ka ai i ke kao, ma ka aoao hikina o keia aina, olelo mai kekahi mea kao ia'u, ua pau loa ke kao i ka ilio, ma ka aoao hema o keia aina, pau loa ka manu a ka poe hanai manu i ka ilio a ka poe hanai ilio. Eia ka hanai ana i ka ilio, he mama ka ai i ka waha, a me ia e mama pu ai, nui ka luhi o ke kahu i ka hanai ana, aka o ka waiwai, aole waiwai.
            I ka wa kahiko he waiwai ka ilio, i keia wa aole.
            Eia ka hanai ana i ka manu, o ke kii aku a hoihoi mai i ka hale e hanai i ka ai, oia wale no ka hana. Eia ka hanai ana i ke kao, o ka pa mua i paa, a paa, hookomo i ke kao iloko, a mahope mai, o ka hoihoi mai i ka pa, oia wale no ka hana o keia mau holoholona, aka, o ka waiwai o koia mau holoholona, ua mahuahua. Ua lako ka poe hanai manu, a me ka poe hanai kao, ma keia aina, aka, o ka hanai ilio ua ole loa ia.
            Ina ua hewa ka'u kakau ana i ka waiwai ole o ka ilio, e hoike mai kekahi i ka waiwai, a me ka poino o ka hanai ilio i ka hanai manu, a me ka hanai kao.                     Na KALILIAAMOKU.