Ka Nonanona, Volume II, Number 21, 23 March 1843 — NO KA HEMAHEMA O KEKAHI LUAKINI MA LANAI. [ARTICLE]

NO KA HEMAHEMA O KEKAHI LUAKINI MA LANAI.

Lanai, Feb. 1, 1843

Auhea oukou e ka poe kukulu luakini o keia pae aina, e nana mai oukou i ka makou hana ana i keia luakini; o ka ha keia o ka makahiki o ka hana ana o keia hale, aole i paa, ua hiolo kekahi aoaoa, ke hana hou nei nae makou, ke halihali nei makou i ke one; ua moa ka puna, o ka uhau hou koe. I ko'u nana ana ma keia hana, nui ka hemahema: eia ka loihi o kahi o ka wai i waiho ai, hookahi mile a me ka hapa ka loihi o ka wai. Eia ka loihi o ka puna a me ke one, eha mile a me ka hapa ka loihi ma ka aoao komohana, pela no hoi ke kii aku i ke one ma ka aoao hikina.

Eia ka loihi o ka pohaku, elua mile ka loihi. Eia ka pohaku kokoke he kohi ilalo e like me ka ai, pela e loaa'i ka pohaku, nui ka hemahema o ka makou hana. Ke ake nei ko makou manao e paa ko makou luakini, kahi e hai ia ai ka olelo a ke Akua. Aole no hoi e pono loa ka hale maoli ma keia wahi, no ka nui o ke anuanu, aole e pono na malihini ke hele mai me kekahi kihei wale no: eia ka pono me ke kapa mahuahua ka pono. Nolaila o keia hale pohaku ka pono loa no keia wahi. Eia no keia hemahema, o ka laau ole, he kakaikahi ka laau loloa loa, aia eha ka loa, a me ka iwilei alaila hiki. Nui ko makou makemake e paa ko makou luakini i keia makahiki. Aka, aole i ikea ka manawa. O kekahi poe o makou i hana i keia hale, ua hele aku kekahi poe. Ua make kekahi mau hoahanau ekolu i ai i ke kino o ka Haku; hookahi i hoakakaia e komo i ka ekalesia, ua hoi aku lakou i ke Akua ola. O kekahi luakini o makou, aia ma ka aoao hikina o keia aina, aole hemahema loa e like me keia hale ua kokoke no ka puna a me ke one, a me ka pohaku, a me kawai, hookahi wale no mea hemahema, o ka wahie, oia wale no ka mea kii aku i kahi loihi. Eia kahi olelo ninau, ina manao oukou i kuu hoike ana i ka hemahema o keia hale, he pono paha, he hewa paha keia hoike ana a'u. Na'u na Kaliliaumoku, Kumuao Kihamaniania.