Ka Nonanona, Volume II, Number 24, 9 May 1843 — Page 116
KA NONANONA.
"E ka mea hiamoe e hele oe i ka nonanona, e nana i kona aoao a e hoonaauao iho." Solomona
Buke 2. HONOLULU, OAHU, MEI 9, 1843. Pepa 24.
Lahainaluna, Maui, Aperila 24, 1843.
NO KA HEWA O KA RAMA.
Auhea oe e ka Nonanona; ua akaka ka hewa o ka rama ma keia mea.
Ua make kekahi haole o luna o ka moku okohola, he malamamoku ia, ua make ia i Aperila 21, 1843; ma Lahaina nei kona wahi i make ai, penei kona make ana.
He ahaaina maluna o ua moku la i ka po; alaila, kii ua malamamoku la i ka pahu rama malalo o ka moku; a haule oia mawaena o ke kowa o na pahu, haki iho la kona ai, a eha ae la kona kino a pau. I ka wa i ninau aku ai kekahi poe no ke kumu o ia make ana, olelo mai la kekahi poe, no kona ona i ka rama kona mea i make ai: olelo mai kekahi poe, aole oia i ona a haule wale no, nolaila, aole akaka ke ano o ka make ana. Ua akaka ke kumu o kona make ana, no ka rama, aole nae au i ike pono, na E— i hoakaka mai ia makou i ka pule po.
Eia kekahi, he wahine kana a me na keiki, i kona wa i eha ai, alaila, olelo oia i kekahi haole e palapala i kana wahine, palapala no ka haole ana i olelo aku ai, a na ua haole eha la e hai aku ka manao ia ia, pela oia i hai mai ai ia ia, a paa ka palapala, alaila, olelo ia e kau i kona inoa, a make iho la ia i loko o ka rama.
Aloha ino ia haole! o kona uhane ka hoi ka mea aloha: ina oia i make i loko o ka Haku, ina ua pomaikai ia. Auhea oukou e ka poe inu i ka rama a me na mea ona e ae, mai hana hou oukou i na mea ona, ua ike kakou i keia haole, ua make ia no kona ona, nolaila, o ka poe ona a pau ea, e haalele lakou i na mea ona a pau, no ka mea, ua papa mai o Iehova, mai hana oukou i na mea ona a pau.
Ua pau, m e ke aloha no nae i keia haole make no ka ona.
Na WILLIAM HUMPHRIES.
HE OLELO NANE NO KEKAHI ILIO A ME KONA AKA.
E au ana kekahi ilio ma kahawai me kahi apana io iloko o kona waha; ike oia i kona aka iho iloko o ka wai a kuhihewa oia, he ilio okoa me kahi apana io ma kona waha, nahu koke aku oia i loaa kela apana io hou, aole nae i loaa, he aka wale no; a o kona apaha io ponoi, lilo aku ia a poholo loa no ilalo ma kahi loaa ole.
E ka poe noonoo e imi oukou i ke ano o keia olelo nane. Eia paha ke ano; lapuwale kakou ke haalele aku i ka mea oiaio a hou i keaka. E noonoo oukou, owai kekahi poe kanaka i hana pela?
HE OLELO NANE NO KEKAHI BUKE PEPA KEOKEO A ME KAHI BUKE I PAIIA.
O kahi buke kanana a me kahi buke i paiia, ua waiho pu ia laua ma kahi hookahi maluna o ka papa. A o ka buke kanana, ua lawe pinepineia e ka poe i hele mai, ua weheia, a ua pani kokeia hoi me ka hoowahawaha, a me ka olelo ana peneia: "Kahaha! aole mea iloko o keia buke." Aka, o ka buke i paiia, i ka wa i weheia'i ua mahaloia peneia, "Eia kahi mea maikai maloko."
O ka buke i paiia, ua lawe pinepine ia ma kahi kanaka, i ka halehalawai, a i ka hale ahaolelo, ma kela wahi keia wahi; a ua huliia e na kanaka a me na wahine mai ka mua a i ka hope; ua mahaloia a ua makemakeia a ua lilo hoi ia i mea e kamakamailio nui ai no na kanaka a me na wahine.
I kekahi la, i ka wa i hoihoiia'i ua buke la ma kona wahi ma ka papa, ninau mai ka buke kanana ia ia; "Heaha kou mea i makemake nuii'i e na kanaka a me na wahine? a lawe pinepineia oe a ua mahaloia, a ua huliia no hoi, aka, owau, ua haaleleia, a ua waiho wale ia ma ka papa. I ko'u manao, ua like ko'u nui me kou, a ua like hoi ko'u mau makahiki me kou, a ua hoonaniia no hoi au mawaho e like me oe; no ke aha la e haalele ai na kanaka ia'u a makemake ia oe?" I aku la ka buke i paiia ia ia, "Aole au i oi aku ia oe ma ia mau mea au i olelo ai, aka, he mea no ko'u maloko."
E na haumana a me na kanaka e ae, pehea e hana'i kakou i like kakou me ka buke i paiia, aole like me ka buke kanana? Ina i like kakou me ka buke kanana, aohe mea maloko, mawaho wale no ka hoonani ana; e makemakeia anei kakou e na kanaka a me na'lii? E hooikaika kakou i loaa kahi mea maloko.