Ka Nonanona, Volume III, Number 2, 4 July 1843 — Page 8
8 KA NONANONA. (IULAI,
pio ke pepehi aku ia hai ma kela hana lapuwale. Aole loa; he makani wale no kana hoopiopio ana; aole mana e make ai. O ka Diabolo kona Akua e pule aku ai a e kokua mai ai; aole nae he mana ko ka Diabolo e make ai ke kanaka. O Iehova wale no ka mea mana e make ai kakou. Olelo keia olelo malalo iho "ua maeele ka lima o ka Kahanaumaikai". Lapuwale! no ke aha ka maeele? No ka hoopiopio anei? Aole; no ka makau wale o ke kanaka Hawaii. Ina manao kekahi e hoopiopio mai ia'u, e hana mai no e like me kona makemake, aole o'u makau i kona hoopiopio ana. No ka naaupo o ko Hawaii nei a me ka makau wale ka make; ua maa keia hana maanei a ua paa keia mea lapuwale iloko o ka naau o na kamalii. Nolaila ikaika loa ka makau a make wale kekahi poe malaila, aole loa no ka mana o ka hoopiopio. He mea lapuwale loa ia, a e pono no e hoolei loa aku ia ia. Ma ke kanawai hea o ke kino a o ka uhane paha e make ai ke kanaka i ka hoopiopio?
NO KA HOOPAI ANA IA NALAUMAEWA
Aloha oe e ka Nonanona. Eia ka mea e haawi aku ia oe, a nau hoi e ahai ae ma keia mau Mokupuni; no ka mea, o oe wale no ka mea ikaika, a hiki wawe hoi i ka hai aku imua o ka poe a pau e heluhelu ana i keia manao.
A nolaila, e hai aku oe i ka mooolelo no Nalaumaewa a me ka hoopai ana ia ia.
Eia na hana ana i hana'i. Ua hoopiopio oia ia Kahanaumaikai a me Kapule, a me kana kane a me Kahanaumaikai wahine a Kekualaula.
Penei kana hana ana i Kahanaumaikai. I ka wa i hele ai o Kahanaumaikai ma kona hale kuai aku, a hiki ma ka pa o Kaaoaohema malalo aku, halawai iho la o Kahanaumaikai me Nalaumaewa, a lalau aku o Nalaumaewa i ka lima o Kahanaumaikai me ka i aku; aloha oe, aloha no hoi ka mea i make aku la. A hana aku la no hoi o Nalaumaewa ma ka hana hoopiopio. A ia wa, kau mai la ka makau ia Kahanaumaikai, makemake iho la ia i kaawale aku o Nalaumaewa Nolaila, i aku la oia, e hele au e ike i ka mai o Kaaoaohema. A i ko Kahanaumaikai hele ana'ku, hele aku la no hoi o Nalaumaewa mahope ona, me ka opea ana i kona mau lima iho i ke kua.
A hiki laua ma kahi o Kaaoaohema, komo aku la o Kahanaumaikai iloko, a komo pu aku la na hoi o Nalaumaewa a noho iho la ma ko Kahanaumaikai aoao.
Alaila, puni loa iho la o Kahanaumaikai i ka makau. A nolaila, puka koke ia iwaho me ka manao e hoi aku i kona hale. A hiki oia ma kona hale, o ka maeele koke mai la no ia o ka lima a Nalaumaewa i aloha aku ai, o ka pii koke mai la no ia o ka wela ma kona kino. Oia ka hoomaka ana o kona mai.
A nolaila manao iho la o Kahanaumaikai, ua hoopiopio ia no oia e Nalaumaewa.
A i ka wa i hookolokoloia'i e na Lunakanawai, ua hoike ia mai kekahi mau mea e ae ana i hana'i a mai, e like me kona hana ana ia Kahanaumaikai;
A i ka wa i ninau aku ai na Lunakanawai, ae mai no oia, ua ike no oia i ka hoopiopio a me ka anaana. A nolaila ua hoopaiia oia e like me ke kanawai. Ina i ike ia kekahi hewa e ulu ana, pono no i na Lunakanawai e imi i mea e pio ai, a e hoopai hoi e like me ko lakou noonoo ana.
A nolaila, eia ka uku pono i noonooia'i. E lawe hele ia oia ma Oahu nei a puni, i ike mai na mea a pau i ke ano o kana hana ana. A puni o Oahu nei, alaila e hoihoi ia mai oia ma ka Papu nei, a e hoopaa ia i ka hao i na malama elima. Aka, ina i manao oia e uku, e uku no, he iwakaluakumamalima na dala, alaila hemo.
Eia ka poe nana i hookolokolo a hoopai.
I. Halali; Honokaupu; Haeai; Kaihiwa; Waolani. Kekuanaoa ke kiaaina.
E ike oukou e na mea a pau, na kanaka kahiko i ao ia a akamai i ka pepehi aku ia hai, e like me Nalaumaewa nei. Ke ike nei oukou i ka uku kaumaha i kauia maluna ona. E like me ka mea ino a Nalaumaewa i kanu aku ai pela no oia e ohi mai ai i ka hua ino. A o ka awa awa a me ka mulea ka i loaa ia ia, o ka pilikia hoi a me ke kaumaha, he mau hoaloha ia nona. A o ka hilahila hoi ka mea e akaaka ana ia ia. Nolaila, e noonoo maoli e ka poe i aoia ma keia mau hana a akamai, o ka haalele aku