Ka Nonanona, Volume III, Number 2, 4 July 1843 — Page 9

1843.) KA NONANONA. 9

kou pomaikai; a o ka makau hoi i ka popilikia kou mea e hanohano ai.
Kakauolelo, John H. Paehewa.

NO PAALUA.

                Ua akakaka hewa o keia keiki ma ka palapala a Kapeau malalo iho. Ua aihue i ke dala o ke aupuni, i $414.78, a ke paa la i ka hao; ua ike maka au ia ia iloko o ka hale paahao. E na keiki o Lahainaluna ke ike nei kakou, he makehewa ka ike a me ke akamai, ke ole ka pono ke ole ka makau i ke Akua. Make hewa a poho wale ko oukou kula ana ke loaa ole ia oukou ka noho malie, a me ka hana pololei. O ka makau i ke Akua, oia ka mea e pono ai.
                Noho pu o Daniela me na lii o Babulona. a lilo ia ia ka hana a ke aupuni: aole nae i lohe kakou, ua hana kolohe o Daniela. Pela no hoi o Iosepa ma Aigupita; he kanaka kaulana loa ia, no ka mea, ua makau i ke Akua, a ola ke aupuni ia ia. Ina pela na luna a me na kakauolelo o keia aupuni, pomaikai maoli.
                E na luna a pau loa, ka poe hana i ka hana o ke aupuni, e nana mai i keia keiki kakauolelo, a e hoomanao, aia hapai ke kuko hanan mai ka hewa, a oo ka hewa hoopuka ia mai ka make.

Honolulu, Iune 27, 1843.
                E ka Nonanona e, aloha oe ke hai pono aku nei au ia oe i ka nui o na dala i lilo iho nei, au i lohe iho nei i keia mau la i hala iho nei, a hiki mai i keia la, ua hai hewaia'ku oe mamua, a me kekahi poe e ae, e olelo wale ia ana. Aole nae no ka poe hai aku ka hewa, aka no ka J. W. D. Paalua no ka hewa no kona kakau ana ma ka Buke, ua nui loa ka hewa, aka, i keia la, ua hooponpono ia e G. L. Kapeau a me G. P. Judd a me W. Paty a ua maopopo maikai ka mea i lilo i ka aihue. Eia ka nui o na dala. 414, 78.
                Aole pono o kela lohe mamua eia mai ka pono. Oia la i maopopo i ka poe e hoomanao ana. G. L. KAPEAU.

KE KANAKA POMAIKAI IO.

                Ma ke kulanakauhale o ka hanau hou, i kahi i hanau ai keia kanaka a ma ke kihapai o ka mihi. Ua hele no ia i ke kula o ka hoolohe, a ke noho nei no ia ma ka papu o ka hoomanawanui; o kana oihana he hooikaika maoli, a he nui kana waiwai iloko o ka noho oluolu mamuli o Kristo. Pinepine kona hoole ia ia iho, o kona aahu o ka haahaa no ia, a i kona wa hele i kahi alii, komo no ia i ka aahu keokeo o ko Iesu pono. O kana ai kakahiaka o ka pule mehameha no ia a pela no hoi kana ai ahiahi. Aole ike ko ke ao nei i kana berena e ai ai, a o kona mea inu, o ka waiu oiaio no ia o ka ke Akua olelo. Pela no keia kanaka pomaikai maoli; pomaikai kona ola ana, a pomaikai hoi kona make ana. Pomaikai ke kanaka i ae oluolu i ka ke Akua, a piha kona naau i ka lokomaikai o ka Haku, aia ka auamo o Kristo ma kona ai, aia hoi ke ao nei malalo o kona wawae. Penei e loaa i keia pomaikai, e pule ikaika, e manaoio nauwe ole, e kali me ka hoomanawanui, e noho hemolele, e hoomake i kela la i keia la, e kiai i ka naau, e paku i na maka a me na pepeiao, e malama i ka manawa, e aloha ia Kristo, a e imi i ka nani pau ole. L.

KA POMAIKAI A ME KA POINO I HIKI MAI I KO HAWAII NEI, I KA HOLO ANA MAI O NA MOKU.

                Ua pomaikai, a ua pono keia pae aina, i ka hiki ana mai o ka ke Akua Olelo a me na kumu nana e hai aku i kana olelo Hemolele a me na palapala e ae kekahi e naauao ai keia lahuikanaka.
                O ka ke Akua olelo, oia ka mea e kuhikuhi mai ana, aia ke Akua ma ka lani a me ke ala o hiki aku ai i kahi ola mau loa maluna. A he mea no hoi ia nana i hookaakaa mai i na maka o keia lahuikanaka makapo, e noho ana iloko o ka malu o ka make.
                Aka, o na palapala naauao e ae, he mea ia e ao mai ana i na kanaka, a e hoopau ai i ka pouli nui a me na kapu ino kela manawa, i hala'ku la mahope.
                Eia kekahi, o ka hiki nui ana mai o ka poe naauao, nana e wehewehe mai i na mea