Ka Nonanona, Volume III, Number 5, 25 July 1843 — Page 22

22 KA NONANONA. (JULY,

O KA AWA.

Lahaina, Iulai 14, 1843.
E Samuela G. Damon.
                Ua ike au i kau palapala i ninau mai ai ia'u no ka Awa. O ka awa, oia ka mea i makemake nui ia e na kanaka a pau, a me na lii a pau o ko makou pae aina nei; mai ka wa kahiko mai ka makemake ia oia mea.
                Eia na mea i makemake nui ia ai ka awa, o ka ona, no ka mea, oia wale no ka mea o na kanaka ma Hawaii nei.
                Eia ka lua, o ka nanaka o ka ili e like me ke kua o ka ea.
                Eia ke kolu, he mea hoowiwi i ke kino o ka poe nui, he mea e uuku ai ka ai ana i ka ai.
                Eia kekahi, o ka awa, oia ka mea mohai nui ia i na akua kii o makou.
I ke kanu ana o ka awa, hookahi makahiki, alaila oo ka awa; o kahi malalo o ke aa, oia ka mea inu; penei ka hana ana, e kaulai a maloo, alaila na kekahi e mama, a maloko o ke poi, a hui pu me ka wai, alaila, kanana a pau, hoolei i ke oka, o ka wai ka mea inu, a pau ka inu ana, alaila, ai aku i ka ai, a ona, alaila, hiamoe.
                Eia nae na kina o ka awa, he mea hoopailua ka awa, he mea eha loa no ka maka, a me na lima, a me na wawae; aole nae e eha ka mea inu uuku; he mea palaualelo, aole e hana ke kanaka inu awa. Ua kapaia ke kanuka inu awa he alii, no ka hana ole. He mea haaheo ke kanaka inu ke awa, he mea hoolilo ia ia iho i kaula. Ina lilo loa ke kanaka i ka inu awa, haalele wale oia i kana wahine iho. Ua like ke ano o ka awa me ka Paulo olelo ma Tesalonika I., mokuna 5: 22. A ma kuu ike ana ma ka mai o kuu makuakane, he pala ka mai; ua kauia kela pala i ka awa, ua ola no; a me ka mai hilo, ua ola no, a me kekahi mau mai e ae no hoi, ua ola, oia ka'u mau mea i ike no ka awa. DAVIDA MALO.

KA HOPE O KA INU RAMA.

                "E kauka, kauka e! e nana mai oe iloko o ko'u pu ai, heaha kau mea e ike ai ilaila," wahi a kekahi kanaka inu Rama, i kona uku ana'ku i ke koena loa o kona waiwai i ka mea i kuai mai i ka Rama ia ia.
                I mai la ke kauaka, "aole au ike i kekahi mea ilaila." "E nana hou," wahi a ka mea inu rama. A nana hou no ke kauaka, a i mai la ia, "Aole au ike i kekahi mea ilaila."
                "E nana hou, no ka mea, he wahi mea malaila no." Alaila unuhi ae la ke kauka i kona maka aniani, a nana pono, akahele, iloko o kona pu ai, alaila ua hooiaio, "aole he mea e ilaila." "Ka," wahi a ka mea inu rama, "ole anei oe ike i ko'u kihapai maikai, a me ko'u hale maikai, a he mau lio maikai elua, a me ke kaa? Ua komo keia mau mea a pau iloko o ko'u pu ai."

NA HAUMANA HELE OLE I KE KULA.

                E ka Nonanona, aloha oe. He wahi puolo ka'u e haawi aku ana ia oe, a nau e haawi aku i ko'u mau makamaka a me na hoa'loha i ka luhi hookahi. No ka hiki ole ia'u ke haawi pakahi ia lakou, nolaila nau e lawe, no ka mea, e hele ana mai na haumana mai ka akau a i ka hema, a mai ka hikina a i ke komohana o keia pae aina.
                Auhea oukou, e na makamaka ma ka luhi hookahi, he nui na haumana a oukou e hele mai ana a noho ma ko'u wahi nei, me ke komo ole mai